មនុស្ស​បីនាក់​ត្រូវបាន​សម្លាប់​ក្នុង​ចំណុច​ទេសចរណ៍​ដ៏​ពេញនិយម​របស់​ទីក្រុង ម៉ិ​ក​ស៊ិ​ក​

ប៉ូលិស​បាន​និយាយ​កាលពី​ថ្ងៃ​សុក្រ​ថា ខ្មាន់កាំភ្លើង​បានសម្លាប់​មនុស្ស​ចំនួន​៣​នាក់​និង​រងរបួស​យ៉ាងតិច​៧​នាក់​នៅ​ទីតាំង​ទេសចរណ៍​មួយ​ក្នុង​ទីក្រុង​ម៉ិ​ក​ស៊ិ​ក​។ ប៉ូលិស​បាន​បន្ថែមថា ពួកគេ​បាន​ដេញតាម​បុរស​បីនាក់​ដែល​ស្លៀកពាក់​ជា​តន្ត្រីករ mariachi ដែល​បាន​ជិះ​ម៉ូតូ​រត់គេចខ្លួន​។​
​
ប៉ូលិស​ទីក្រុង​ម៉ិ​ក​ស៊ិ​កបាន​និយាយ​នៅក្នុង​សេចក្តីថ្លែងការណ៍​មួយ​ថា ជនរងគ្រោះ​ត្រូវបាន​សម្លាប់​នៅត្រង់ចំណុច​ប្រសព្វ​មួយ​នៃ​ចំណុច Plaza Garibaldi ដែលជា​ទិសដៅ​ទេសចរណ៍​ដ៏​សំខាន់​មួយ​ពោរពេញ​ទៅដោយ​បារ mariachi ។​
​
បន្ទាប់ពី​រយៈពេល​ជាច្រើន​ឆ្នាំ​នៃ​ឧក្រិដ្ឋកម្ម​ដ៏​សាហាវព្រៃផ្សៃ​បំផុត​ដែល​បាន​ញាំញី​ទីក្រុង​ម៉ិ​ក​ស៊ិ​ក​, រដ្ឋធានី​មួយ​នេះ​បាន​មើលឃើញ​ពី​ការកើនឡើង​នៃ​ការសម្លាប់​មនុស្ស​ចាប់តាំងពី​ឆ្នាំ​២០១៤​ដល់​កម្រិត​ខ្ពស់បំផុត​។​
​
ប៉ូលិស​បាន​និយាយថា ឧក្រិដ្ឋកម្ម​ភាគច្រើន​បានកើត​ឡើង​ពី​ការជួញដូរ​គ្រឿងញៀន​ដែល​ប្រព្រឹត្តឡើង​ដោយ​ក្រុម​អំពើហិង្សា​បើទោះបីជា​រដ្ឋាភិបាល​ទទួល​ស្គាល់​ថា ក្រុម​យ៉ាងហោចណាស់​មួយ​ក្នុងចំណោម​ក្រុម​ទាំងនេះ​មាន​តំណ​ភ្ជាប់​ទៅនឹង​ក្រុម​ជួញដូរ​ថ្នាក់ជាតិ​ដ៏​ធំ​គឺ Jalisco New Generation Cartel ក៏ដោយ​។​

Plaza Garibaldi មាន​ព្រំប្រទល់​ជាប់​នឹង​សង្កាត់ Tepito ដែលជា​សង្កាត់​មួយ​ក្នុងចំណោម​សង្កាត់​ល្បីល្បាញ​បំផុត​របស់​ទីក្រុង​ម៉ិ​ក​ស៊ិ​ក​ដែលជា​កន្លែង​របស់​ក្រុមជើងកាង La Union ដែលជា​ក្រុម​មួយ​ត្រូវបាន​ប៉ូលិស​បន្ទោស​ចំពោះ​ការកើនឡើង​នៃ​ការជួញដូរ​គ្រឿងញៀន​ក្នុង​រដ្ឋធានី​។​
​
កាលពី​ខែសីហា ប៉ូលិស​បាន​ចាប់ខ្លួន​មេដឹកនាំ​ក្រុម​ឧក្រិដ្ឋជន​ឈ្មោះ Roberto Moyado Esparza “El Betito”​។ ចាប់តាំងពី​ពេលនោះ​មក សង្កាត់ Tepito បាន​ទទួលរង​នូវ​រលក​នៃ​អំពើហិង្សា​រួមទាំង​ការសម្លាប់​មនុស្ស​ជាច្រើន​ផងដែរ​៕ REUTERS

​

Source: Kampuchea Thmey Daily