ព្យុះទីហ្វុង Mangkhut បានវាយប្រហារនៅភាគខាងជើងប្រទេសហ្វីលីពីនកាលពីថ្ងៃសៅរ៍ជាមួយខ្យល់បក់ខ្លាំងនិងភ្លៀងធ្លាក់ឥតឈប់ឈរ ខណៈអាជ្ញាធរបានព្រមានថា មនុស្សរាប់លាននាក់គឺស្ថិតនៅចំផ្លូវនៃការបំផ្លិចបំផ្លាញដ៏ធ្ងន់ធ្ងររបស់ព្យុះនេះ។
ព្យុះដ៏ធំមួយនេះដែលអ្នកព្យាករបានហៅថាជាព្យុះទីហ្វុងខ្លាំងបំផុតក្នុងឆ្នាំនេះបានផ្តួលរំលំដើមឈើ បំប៉ើងដំបូលផ្ទះនិងកាត់ផ្តាច់អគ្គិសនីនៅពេលវាបក់បោកលើកោះ Luzon។
ខណៈដែលវាសំដៅទៅភាគខាងលិចឆ្ពោះទៅកាន់ប្រទេសចិនឆ្លងកាត់ប្រទេសប្រជុំកោះដែលងាយរងគ្រោះដោយគ្រោះមហន្តរាយមួយនេះនោះ ខ្យល់របស់ព្យុះនេះបានកើនឡើងដល់៣៣០គីឡូម៉ែត្រក្នុងមួយម៉ោង។
លោក Chris Perez អ្នកព្យាករអាកាសធាតុរដ្ឋបានព្រមានមនុស្សប្រមាណ៤លាននាក់ដែលស្ថិតនៅចំផ្លូវនៃព្យុះនេះថា “បើអាចធ្វើបានសូមស្នាក់នៅក្នុងផ្ទះកុំចេញទៅក្រៅ”។
មនុស្សរាប់ពាន់នាក់បានភៀសខ្លួនចេញពីលំនៅដ្ឋានរបស់ពួកគេនៅក្នុងតំបន់ដែលមានហានិភ័យខ្ពស់មុនពេលព្យុះនេះមកដល់ដោយសារតែខ្លាចគ្រោះទឹកជំនន់និងការបាក់ដីធំៗ។
កាលពីថ្ងៃសុក្រ អាជ្ញាធរបានតម្លើងការព្រមានអំពីព្យុះនេះដល់កម្រិតខ្ពស់បំផុតលំដាប់ទីពីររបស់ខ្លួននៅក្នុងខេត្ត Luzon ភាគខាងជើងហើយបានដាក់ពង្រាយក្រុមជួយសង្គ្រោះ។
អ្នកព្យាករឧតុនិយមជប៉ុនលោក Hiroshi Ishihara បានប្រាប់ AFP កាលពីថ្ងៃសុក្រថា “ក្នុងចំណោមព្យុះទីហ្វុងទាំងអស់នៅឆ្នាំនេះ នេះគឺជាព្យុះដែលមានកម្លាំងខ្លាំងបំផុត។ វាជាព្យុះទីហ្វុងហឹង្សាដែលមានខ្យល់បក់ខ្លាំងបំផុតក្នុងចំណោមព្យុះទីហ្វុងនៅឆ្នាំនេះ”។
បន្ទាប់ពីវាយប្រហារហ្វីលីពីន ព្យុះ Mangkhut ត្រូវបានគេព្យាករណ៍ថានឹងសំដៅទៅឆ្នេរសមុទ្រភាគខាងត្បូងរបស់ប្រទេសចិនដែលមានប្រជាជនរស់នៅយ៉ាងច្រើននៅសប្តាហ៍នេះ។
គួរបញ្ជាក់ជាថ្មីថា ព្យុះដែលសម្លាប់មនុស្សច្រើនបំផុតក្នុងកំណត់ត្រារបស់ប្រទេសនេះគឺព្យុះទីហ្វុង Haiyan ដែលបណ្តាលឲ្យមនុស្សស្លាប់ឬបាត់ខ្លួនជាង៧,៣៥០នាក់នៅទូទាំងប្រទេសហ្វីលីពីនក្នុងខែវិច្ឆិកាឆ្នាំ២០១៣៕ AFP
Source: Kampuchea Thmey Daily
0 Comments