លោក ថោង ច័ន្ទ​កិ​ត្យា ចង់​ត្រឡប់​ចាប់​អាជីព​ជា​អាជ្ញាកណ្ដាល​វិញ​ក្រោយ​សម្រេច​ព្យួរ​កញ្ចែ​មួយ​រយៈ​ធំ

​អាជ្ញាកណ្ដាល​ល្បីឈ្មោះ ថោង ច័ន្ទ​កិ​ត្យា ដែល​ជា​អតីត​សមាជិក​អាជ្ញាកណ្ដាល​កម្រិត​អន្តរជាតិ (FIFA) ប្រចាំ​កម្ពុជា បាន​ព្យួរ​កញ្ចែ​របស់​ខ្លួន​អស់​ជិត ២​ឆ្នាំ​មក​ហើយ ខណៈ​ពេល​សាមីខ្លួន​បាន​បង្ហើប​ពី​បំណង​ចង់​ត្រឡប់​ទៅកាន់​វាលស្មៅ​ជាថ្មី ដើម្បី​បំពេញការងារ​ក្នុង​អាជីព​ជាទី​ស្រលាញ់ តែ​ក៏បាន​មើលឃើញ​ពី​ឧបសគ្គ​ចម្បង ២ ចំពោះមុខ​គឺ ការ​សម្រក​ទម្ងន់ និង ពេលវេលា​។



អាជ្ញាកណ្ដាល​ដែល​ជាន់​ទីលាន​ប្រកួត​ក្នុង​ពានរង្វាន់ AFC Champion League បាន​មុនគេ​រូបនេះ​លើកឡើងថា «​ខ្ញុំ​អត់​ទាន់​បោះបង់ចោល​ទេ មានតែ​ចង់​ត្រលប់​ទៅវិញ ប៉ុន្តែ​ខានធ្វើ​ការ ខាន​ហ្វឹកហាត់​យូរ​អញ្ចឹង យើង​អត់ Fit ទេ បើ​និយាយ​ពី​គីឡូ​ឥឡូវ​៨២​ទៅ​ហើយ​។ អញ្ចឹង​ខ្ញុំ​ត្រូវ​ជម្នះ​រឿង​ទម្ងន់​មួយ​សិន ដែល​ជា​រឿង​ចម្បង​ជាងគេ បើសិន​ធ្វើ​ទម្ងន់​បាន នឹង​ព្យាយាម​ខាង​កាយសម្បទា​ឲ្យ​ល្អ​បន្ថែម​ទៀត អាច​ផ្លុំ​វិញ​កើត​ហើយ ចំពោះ​បច្ចេកទេស​អត់​បញ្ហា​ទេ ព្រោះ​ខ្ញុំ​ចូលរួម​គ្រប់​វគ្គ​អាជ្ញាកណ្ដាល អត់​ដែល​រំលង​ទេ​»​។



​ក្រៅពី​បញ្ហា​ប្រឈម​ទាំងនេះ​លោក ថោង ច័ន្ទ​កិ​ត្រា ក៏​ជួប​បញ្ហា​ប្រឈម​មួយទៀត​គឺ​នៅ​មាន​ការងារ​ផ្ទាល់ខ្លួន​ជាច្រើន ដែល​អាច​បង្អាក់​បំណង​វិល​ត្រលប់មក​ពិភព​បាល់ទាត់​។ លោក​កំពុង​ដំណើរ​ភោជនីយដ្ឋាន​មួយកន្លែង​នៅ​ចំការ​ដូង និង រមណីយដ្ឋាន​កែច្នៃ​មួយទៀត នៅ​ម្ដុំ​ព្រែក​កំពឹស​។ «​ពិបាក​មួយទៀត​រឿង​ពេលវេលា​តែម្ដង ខ្ញុំ​ត្រូវ​មើល​ការខុសត្រូវ​មុខរបរ ២​កន្លែង​ផ្សេងគ្នា ដល់​អញ្ចឹង​ពិបាក​ឆ្លៀត​មែនទែន​។ យ៉ាងណា​មិនទាន់​បោះបង់​ចិត្ត​នេះ​ទេ សាកល្បង​បន្តិច​ម្ដងៗ​ព្យាយាម​សន្សឹមៗ​សិន លទ្ធផល​យ៉ាងណា​ចាំ​គិត​ទៀត​»​។ អាជ្ញាកណ្តាល​រូបនេះ​បន្ត​។



លោក ថោង ច័ន្ទ​កិ​ត្យា បាន​ជាប់​ឈ្មោះ​ជា​អាជ្ញាកណ្ដាល FIFA នៅ​ឆ្នាំ​២០១០ ហើយ​លោក​ធ្លាប់​ធ្វើការ​ក្នុង​ប្រកួត​អន្តរជាតិ​ជាច្រើន​ជុំវិញ​ទ្វីបអាស៊ី បូក​ទាំង​ប្រកួត​នានា​នៅក្នុង​តំបន់​អាស៊ាន​។ ដឹកនាំ​ប្រកួត​លើ​ឆាក​អន្តរជាតិ​គឺ​លោក​បាន​ធ្វើជា​អាជ្ញាកណ្ដាល​ទី​៤​ក្នុង​ប្រកួត​ជម្រុះ​ពានរង្វាន់ 2018 FIFA World Cup Russia ប្រចាំ​ទ្វីបអាស៊ី​ជុំ​ទី​២​ក្នុង​ឆ្នាំ​២០១៥ រវាង​ក្រុម​ម្ចាស់ផ្ទះ​កូរ៉េខាងជើង ជាមួយ​ក្រុមម្ចាស់​ផ្ទះ​ កូ​រ៉េ​ខាង​ជើង​ ជាមួយ​ក្រុមយេមេន៕

Source: Kampuchea Thmey Daily