ក្រុម​បឹងកេត តែងតាំង​ឯកឧត្តម សាយ សំ​អាល់ ធ្វើជា​ប្រធានកិត្តិយស​ប្រចាំ​ក្លិប​ខ្លួន​

ក្លិប​ជើងឯក​៣​សម័យកាល​បឹងកេត សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) បានប្រកាស​ប្រាប់​អ្នកគាំទ្រ​របស់ខ្លួន​នៅ​ល្ងាច​ថ្ងៃ​ព្រ​ហ​ស្បតិ៍ ទី​១៣ ខែកញ្ញា ឆ្នាំ​២០១៨ ថា ​ក្លិប​សម្រេច​តែងតាំង​លោក សាយ សំ​អាល់ រដ្ឋមន្ត្រី​ក្រសួងបរិស្ថាន​ធ្វើជា​ប្រធានកិត្តិយស​របស់​ក្លិប​ចាប់ពី​ថ្ងៃ​ជូនដំណឹង​នេះ​តទៅ​។

​ខ្លឹមសារ​ទាំងស្រុង​ដែល​ក្លិប​បាន​ជូនដំណឹង​បញ្ជាក់ថា​៖«​ក្លិប​មាន​កិត្តិយស​សូម​ជម្រាបជូន​ដំណឹង​ដល់​សាធារណជន​ទាំងអស់​អោយបាន​ជ្រាបថា ឯកឧត្តម សាយ សំ​អាល់ ប្រធាន​សហភាព​សហព័ន្ធ​យុវជន​រាជធានី​ភ្នំពេញ និង​ជា​រដ្ឋមន្ត្រី​ក្រសួងបរិស្ថាន បានផ្ដល់​កិត្តិយស​ធ្វើជា​ប្រធានកិត្តិយស​របស់​ក្លិប​បាល់ទាត់​បឹងកេត​ចាប់ពីពេលនេះ​តទៅ​។ លើសពីនេះទៅទៀត ក្លិប​បាល់ទាត់​បឹងកេត និង​សហភាព​សហព័ន្ធ​យុវជន​កម្ពុជា នឹង​ធ្វើជា​ដៃគូ​សហការគ្នា ដើម្បី​ចូលរួម​លើកស្ទួយ​វិស័យ​កីឡាបាល់ទាត់ យុវជន និង​បរិស្ថាន​ផងដែរ​»​។

ប្រភព​មកពី​តំណាង​ក្លិប​មួយ​នេះ​បាន​បញ្ជាក់​ថា​ នៅពេល​ទំនេរ​ពី​សកម្មភាព​ប្រកួត​ជាតិ​និង​លើ​ឆាក​អន្តរជាតិ​ក្លិប​ខ្លួន​នឹង​មាន​ធ្វើ​សកម្មភាព​មនុស្សធម៌​មួយចំនួន​ទៅ​ថ្ងៃ​អនាគត​បូក​ទាំង​សកម្មភាព​ថែរក្សា​បរិស្ថាន​ដែល​មាន​ការ​សហការ​ជាមួយ​ក្រសួងបរិស្ថាន​ផងដែរ​។ ថ្មីៗ​នេះ​ក្លិប​បាន​ធ្វើ​សកម្មភាព​មនុស្សធម៌​ជួយ​ដល់​កុមារ​នៅ​មន្ទីរពេទ្យ​កុមារ​ជាតិ និង​បន្តទៅ​ចែក​អំណោយ​ដល់​ពលរដ្ឋ​ប្រមាណ​២០០​គ្រួសារ​ដែល​រងគ្រោះ​ដោយសារ​ទឹកជំនន់​នៅ​ខេត្តកំពង់ចាម ផងដែរ​។

​ក្លិប​បឹង​កេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផង​ដែរ​។ ចំណែក​ពានរង្វាន់​នៅ​ក្រៅ​ស្រុក​វិញ​ក្រុម​ដែល​មាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផងដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី​២​ប្រចាំ​ទ្វីបអាស៊ី AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូ​ល​ដូចគ្នា​៕

Source: Kampuchea Thmey Daily