រដ្ឋមន្ត្រីក្រសួងការបរទេសអាមេរិកលោក Mike Pompeo កាលពីថ្ងៃពុធ បានយល់ព្រមត្រឡប់ទៅប្រទេសកូរ៉េខាងជើងវិញនៅខែក្រោយនេះ ដើម្បីជំរុញកិច្ចចរចារំសាយអាវុធនុយក្លេអ៊ែរ ខណៈដែលលោកប្រធានាធិបតី ដូណាល់ ត្រាំ បានទស្សន៍ទាយអំពីការទម្លាយភាពទាល់ច្រកក្នុងពេលឆាប់ៗនេះ។
លោក Pompeo បានជួបប្រជុំជាមួយសមភាគីកូរ៉េខាងជើងលោក Ri Yong Ho នៅខាងក្រៅមហាសន្និបាតអង្គការសហប្រជាជាតិដើម្បីពិភាក្សាអំពីផែនការសម្រាប់ដំណើរទស្សនកិច្ចលើកទី៤របស់លោកទៅកាន់ប្រទេសជាសត្រូវរបស់អាមេរិកជាយូរមកហើយមួយនេះ។
ក្រសួងការបរទេសបាននិយាយថា លោក Pompeo បានទទួលយកការអញ្ជើញមួយពីមេដឹកនាំកូរ៉េខាងជើងលោកគីមជុងអ៊ុនឲ្យវិលត្រឡប់មកក្រុងព្យុងយ៉ាងវិញនៅក្នុងខែតុលាដើម្បីជំរុញកិច្ចខិតខំប្រឹងប្រែងសម្រាប់ការលុបបំបាត់នុយក្លេអ៊ែររបស់កូរ៉េខាងជើងឲ្យបានពេញលេញ។
លោក Pompeo ក៏នឹងព្យាយាមរៀបចំកិច្ចប្រជុំកំពូលលើកទីពីររវាងលោក ត្រាំ និងលោកគីមផងដែរដែលកិច្ចប្រជុំរបស់ពួកគេកាលពីខែមិថុនានៅប្រទេសសិង្ហបុរីគឺជាលើកដំបូងរវាងមេដឹកនាំកំពុងកាន់តំណែងនៃប្រទេសទាំងពីរ។
លោក ត្រាំ បានសាទរចំពោះគំនិតផ្តួចផ្តើមរបស់គាត់ជាមួយប្រទេសកូរ៉េខាងជើងថាជាជោគជ័យមួយនៃគោលនយោបាយការបរទេសនិងបានថ្លែងអំណរគុណដល់លោកគីម។
ការសរសើររបស់គាត់បានកើតឡើងត្រឹមតែមួយឆ្នាំប៉ុណ្ណោះបន្ទាប់ពីគាត់បានចំអកឲ្យលោកគីមថាជា “បុរសរ៉ុក្កែត” នៅឯអង្គការសហប្រជាជាតិហើយបានគំរាមឆ្លើយតបផ្នែកយោធា។
លោក ត្រាំ បានប្រកាសកាលពីថ្ងៃពុធថា លោកគីមបានផ្ញើលិខិត “អស្ចារ្យ” ថ្មីមួយទៀតហើយបានរំពឹងថា កិច្ចប្រជុំកំពូលលើកទី២នឹងប្រព្រឹត្តទៅក្នុងពេល “យ៉ាងឆាប់រហ័ស”។
លោកបានប្រាប់សន្និសីទសារព័ត៌មានមួយនៅទីក្រុងញូវយ៉កថា “យើងមានទំនាក់ទំនងល្អណាស់ គាត់ចូលចិត្តខ្ញុំហើយខ្ញុំក៏ចូលចិត្តគាត់ដែរ។ ខ្ញុំពិតជាជឿថា គាត់ចង់ធ្វើឲ្យបានសម្រេចហើយគាត់ចង់ធ្វើកិច្ចព្រមព្រៀងមួយ ខ្ញុំក៏ចង់ធ្វើកិច្ចព្រមព្រៀងមួយដែរ”។
លោក ត្រាំ បានបញ្ជាក់ថា សហរដ្ឋអាមេរិកនឹងផ្ទុះសង្គ្រាមជាមួយកូរ៉េខាងជើងបើសិនជាគាត់មិនជាប់ឆ្នោត៕ AFP
Source: Kampuchea Thmey Daily
0 Comments