បាត់ដំបង ៖ ស្ត្រីម្នាក់ ដែលជាប់ពាក់ព័ន្ធនឹងករណី ចែកចាយគ្រឿងញៀនខុសច្បាប់ ត្រូវបានកម្លាំងសមត្ថកិច្ចជំនាញ នៃស្នងការដ្ឋាននគរបាលខេត្ត ធ្វើការឃាត់ខ្លួនបានក្នុងករណីជាក់ស្តែង រួមជាមួយនឹងថ្នាំញៀនមួយចំនួនផងដែរ ខណៈដែលស្ត្រីរូបនេះកំពុងធ្វើសកម្មភាពនៅក្នុងមូលដ្ឋាន។
លោក ស៊ាន សុណាល់ នាយការិយាល័យ ប្រឆាំងគ្រឿងញៀន បានលើកឡើងថា កិច្ចប្រតិបត្តិការនេះ បានធ្វើឡើងកាលពីថ្ងៃទី១២ ខែកញ្ញា ឆ្នាំ២០១៨ វេលាម៉ោង ១១និង ២០ នាទី ព្រឹក ដោយកម្លាំងជំនាញ សហការជាមួយកម្លាំង ការិយាល័យប្រឆាំងបទល្មើស និងកម្លាំងអធិការដ្ឋាន នគរបាលស្រុកបាណន់ បានចុះទៅកាន់ចំណុចភូមិឈើទាល ឃុំឈើទាល ស្រុកបាណន់ ខេត្តបាត់ដំបង។
លោកបានបន្តថា ក្នុងកិច្ចប្រតិបត្តិការនេះ សមត្ថកិច្ចបានឃាត់ខ្លួនមុខសញ្ញាសង្ស័យម្នាក់ ដែលកំពុងធ្វើសកម្មភាព ព្រមទាំងបានដកហូតនូវវត្ថុតាងមួយចំនួនដូចជា ថ្នាំញៀនប្រភេទម៉ាទឹកកកចំនួន ១ កញ្ចប់ មានទម្ងន់ ១១,៩៤ ក្រាម និងសម្ភារៈសម្រាប់សេពមួយចំនួនថែមទៀត រីឯជនសង្ស័យមានឈ្មោះ ព្រំ ស៊ីឡែន ភេទស្រី អាយុ៤០ឆ្នាំរស់នៅភូមិកំពង់ឆ្លង ឃុំឈើទាល ស្រុកបាណន់។
បច្ចុប្បន្នក្រោយពីជនសង្ស័យបានសារភាពរួចមក កម្លាំងបាន និង កំពុង កសាងសំណុំរឿង ដើម្បីបញ្ជូនខ្លួន ជាមួយនឹងវត្ថុតាងទៅកាន់សាលាដំបូងខេត្ត ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments