ភ្នំពេញ ៖ រឿងរ៉ាវតូចសោះ ដែលមានចោរស្រីវ័យក្មេងម្នាក់បានបន្លំលួចយកទូរស័ព្ទដៃមួយគ្រឿងរបស់អាជីវករនៅផ្សារព្រៃទាស្ថិតក្នុងភូមិព្រៃទាង ស្កាត់ចោមចៅទី៣ ខណ្ឌពោធិ៍សែនជ័យ កាលពីព្រឹកថ្ងៃទី១៣ ខែកញ្ញា ឆ្នាំ២០១៨ តែភ្លាមៗនោះ ត្រូវបានម្ចាស់គេចាប់បាននាំគ្នាវាយធ្វើបាបនិងកោរសក់ថតបង្ហោះក្នុងបណ្ដាញសង្គមហ្វេសប៊ុក ដើម្បីបង្អួតស្នាដៃ តែផ្ទុយទៅវិញសមត្ថកិច្ចបានចាត់វិធានការផ្លូវច្បាប់ទៅក្រុមជនដៃដល់ទាំងនោះ ដោយបានឃាត់ខ្លួនបីនាក់យកមកសាកសួរ តែមកដល់ពេលនេះឃាត់តែម្នាក់ទេ ដែលជាអ្នកដៃដល់ជាងគេ។
លោកយឹម សារ៉ាន់ អធិការនៃអធិការដ្ឋាននគរបាលខណ្ឌពោធិ៍សែនជ័យបានឲ្យដឹងថា ជនដៃដល់ដែលត្រូវឃាត់ខ្លួននោះ មានឈ្មោះ សុង ហេង ភេទប្រុស អាយុ៣៥ឆ្នាំ មុខរបរអាជីវករលក់ទូរស័ព្ទនៅក្នុងផ្សារព្រៃទាកន្លែងកើតហេតុ។ ចំណែកស្ដ្រីជាជនសង្ស័យខាងលួចមិនត្រូវបានស្គាល់ឈ្មោះដោយសារពេលនោះពលរដ្ឋដោះលែងទៅបាត់ទៅហើយ។
រឿងរ៉ាវនេះ មុនដំបូងគេគិតថា ជារឿងលួចឆក់ធម្មតាកំប៉ិកកំប៉ុកប៉ុណ្ណោះ ប៉ុន្ដែដោយមានការឃាត់ខ្លួនក្រុមអាជីវករក្នុងផ្សារបីនាក់មកសាកសួរ ទើបរឿងនេះកាន់តែរីករាលដាលធំទៅៗហើយក្រុមអាជីវករក្នុងផ្សារព្រៃទារាប់រយនាក់កាលពីព្រឹកថ្ងៃទី១៥ ខែកញ្ញា ឆ្នាំ២០១៨នេះ ក៏បាននាំគ្នាតវ៉ាសុំឲ្យសមត្ថកិច្ចធ្វើការដោះលែងជនដៃដល់ម្នាក់នោះទៅវិញ ដោយគ្រាន់តែធ្វើការអប់រំគាត់ទៅបានហើយ។
ពាក់ព័ន្ធនឹងការស្នើសុំនេះ ត្រូវបានលោកយឹម សារ៉ាន់ អធិការនគរបាលខណ្ឌពោធិ៍សែនជ័យឲ្យដឹងថា ការតវ៉ាសុំឲ្យមានការដោះលែងវាជាសិទ្ធិរបស់ពួកគាត់តែប៉ុណ្ណោះ ប៉ុន្ដែតាមផ្លូវច្បាប់វាទាល់តែខាងតុលាការទើបអាចសម្រេចបាន ចំពោះសមត្ថកិច្ចគ្មានសិទ្ធិដោះលែងនោះទេ។ ពួកគាត់ធ្វើអ្វីមិនគិតពីផ្លូវច្បាប់ធ្វើអ្វីតាមកំហឹងទល់កំហល់ ដល់មានរឿងបែរជានាំគ្នាតវ៉ាសុំឲ្យមានការដោះលែងដោយមិនផ្អែកលើគោលការណ៍ច្បាប់សោះ ឯសមត្ថកិច្ចមានសិទ្ធិត្រឹមកសាងសំណុំរឿងបញ្ជូនឲ្យតុលាការប៉ុណ្ណោះ បើចង់ឲ្យមានការដោះលែងយ៉ាងណានោះ មានតែគាត់ទៅសុំតុលាការទៅ។
ក្រុមអាជីវករវិញក៏បានលើកឡើងដែរថា នៅក្នុងផ្សារព្រៃទានេះ ឧស្សាហ៍កើតមានករណីចោរកម្មបែបនេះញឹកញាប់ណាស់ ជួនកាលចាប់បានដូចចឹងទៅជួនកាលចាប់មិនបានទេ ហើយរឿងតិចតួចចឹង ពួកគាត់ក៏មិនចង់វែងឆ្ងាយជាមួយសមត្ថកិច្ចដែរ ទើបដូចពេលនេះពួកគាត់ប្រើកម្លាំងមហាជនដោះស្រាយបញ្ហាបែបនេះទៅ៕
Source: Kampuchea Thmey Daily
0 Comments