អនុប្រធានគណៈកម្មាធិការជាតិអូឡាំពិកកម្ពុជា លោកថាង ហ្គោដុន(Thang Gordon) បានផ្តល់រង្វាន់លើកទឹកចិត្តដល់ម្ចាស់មេដាយមាសកីឡាអាស៊ី គឺសាលី អ៊ូម៉ើត និង កីឡាការិនីជេសា ខាន់ ។ពិធីប្រគល់រង្វាន់នេះ ធ្វើឡើងក្រោមអធិបតីភាពលោកថោង ខុន ប្រធានប្រធានគណៈកម្មាធិការជាតិអូឡាំពិកកម្ពុជា នៅក្នុងស្នាក់ការការដ្ឋានសាងសង់ពហុកីឡដ្ឋានជាតិមរតកតេជោ កាលពីថ្ងៃទី១៥កញ្ញា។
លោក ថាង ហ្គោដុន ជាជនជាតិសឹង្ហបូរីមានសញ្ជាតិកម្ពុជានិងសព្វថ្ងៃជាអនុប្រធានគណៈកម្មាធិការជាតិអូឡាំពិកកម្ពុជា និងប្រធានសហព័ន្ធកីឡាទូកក្ដោងកម្ពុជា។ លោកគឺជាមេដឹកនាំកីឡាមួយរូបដែលបានចំណាយប្រាក់ច្រើនសន្ធឹកសន្ធាប់ដល់កីឡាកម្ពុជាសម្រាប់ចេញទៅហ្វឹកហាត់នៅក្រៅប្រទេស និង ជួយអភិវឌ្ឍន៍ដល់វិស័យកីឡានៅកម្ពុជា ។
នៅក្នុងការប្រកួតកីឡាអាស៊ីលើកទី១៨នៅប្រទេសឥណ្ឌូនេស៊ីដែលទើបតែនឹងបញ្ចប់នេះកីឡាការិនីកម្ពុជាជេសា ខាន់ដែលលេងប្រភេទកីឡាប្រយុទ្ធជីជិតស៊ូនោះដណ្ដើមបានមេដាយមាសមួយគ្រឿង ។ចំពោះកីឡាករម៉ូតូទឹកគឺកីឡាករសាលី អ៊ូម៉ើតដណ្ដើមបានមេដាយមាសមួយគ្រឿង និង សំរិទ្ធមួយគ្រឿង ។
ជាមួយនឹងជោគជ័យនេះលោក Thang Gordon បានផ្ដល់រង្វាន់លើកទឹកចិត្តសម្រាប់មេដាយមាស៨.០០០ដុល្លារ និងមេដាយសំរិទ្ធ៣.០០០ដុល្លារ ។
សូមបញ្ជាក់ថា នេះជាលើកទី៣ហើយដែលម្ចាស់ជ័យលាភីទាំង២រូបនេះបានទទួលរង្វាន់លើកទឹកចិត្តដែលក្នុងនោះណាហ្គាវើលផ្ដល់រង្វាន់សម្រាប់មេដាយមាស១០.០០០ដុល្លារ និងសំរិទ្ធ៣.០០០ដុល្លារ ។ចំពោះក្រុមហ៊ុនឆ្នោតកីឡាជាតិក៏បានផ្ដល់រង្វាន់លើកទឹកចិត្តដែរ៕
Source: Kampuchea Thmey Daily
0 Comments