ភ្នំពេញ ៖ តាមកម្មវិធីគ្រោងទុក នៅថ្ងៃទី១៧ ខែកញ្ញា ឆ្នាំ២០១៨ វេលាម៉ោង១៤រសៀល ក្រុមប្រឹក្សាជំនុំជម្រះសាលាឧទ្ធរណ៍នឹងបើកសវនាការលើសំណុំរឿងព្រហ្មទណ្ឌរបស់លោកកឹម សុខា ដែលទើបត្រូវបានចៅក្រមស៊ើបសួរសាលាដំបូងសម្រេចអោយនៅក្រៅឃុំថ្មីៗនេះ។
នេះបើតាមសេចក្ដីជូនដំណឹងរបស់សាលាឧទ្ធរណ៍ដែលបានបញ្ជូនទៅកាន់អគ្គនាយកដ្ឋានពន្ធនាគារ និងពន្ធនាគារត្រពាំងថ្លុង ។
លោកអ៊ឹម សុផាន អគ្គព្រះរាជអាជ្ញារងអមសាលាឧទ្ធរណ៍បានចេញសេចក្ដីជូនដំណឹងកាលពីថ្ងៃទី ០៧ ខែកញ្ញា ឆ្នាំ២០១៨ថា តបតាមកមកមវត្ថុសំណើសុំអោយនាំជនត្រូវចោទមកសវនាការលើសំណុំរឿងស៊ើបសួរលេខ២៤៩/០៣ ៩ ២០១៧របស់សាលាដំបូងរាជធានីភ្នំពេញពីបទសន្ទិដ្ឋភាពជាមួយបរទេស ប្រព្រឹត្តនៅប្រទេសកម្ពុជា និងទីកន្លែងផ្សេងទៀតកាលពីអំឡុងឆ្នាំ១៩៩៣ ដល់ថ្ងៃទី ០៣កញ្ញាឆ្នាំ២០១៧ បទល្មើសព្រហ្មទណ្ឌដែលមានចែងអោយផ្ដន្ទាទោសតាមបញ្ញត្តិមាត្រា ៤៤៣ នៃក្រមព្រហ្មទណ្ឌ។
យោងតាមដីកាបានអោយលោកកឹម សុខា ជាជនត្រូវចោទ ត្រូវមកសាលាឧទ្ធរណ៍នៅពេលបើកសវនាការជំនុំជម្រះ នៅថ្ងៃទី ១៧ ខែកញ្ញា ឆ្នាំ២០១៨ វេលាម៉ោង១៤រសៀល នៅបន្ទប់សវនាការទី៣ ដោយមានក្រុមប្រឹក្សាចំនួន៣រូប គឺ លោកឃុន លាងម៉េង ជាប្រធានក្រុមប្រឹក្សា លោកចៅក្រម យូ ប៊ុណ្ណា និងលោកចៅក្រមសួស សំអាត។ ពេលបញ្ចប់សវនាការត្រូវនាំជនត្រូវចោទត្រឡប់ទៅពន្ធនាគារវិញដើម្បីបន្តអនុវត្តសេចក្ដីសម្រេចរបស់តុលាការពីមុនមក បើគ្មានសេចក្ដីសម្រេចថ្មីទៀត។
លោក កឹម សុខា ត្រូវបានចៅក្រមស៊ើបសួរសាលាដំបូងរាជធានីភ្នំពេញ លោកគី រិទ្ធី សម្រេចអោយនៅក្រៅឃុំបណ្ដោះអាសន្នកាលពីម៉ោង៣ទៀបភ្លឺថ្ងៃទី ១០កញ្ញា ឆ្នាំ២០១៨ ដែលឥឡូវនេះលោកកឹម សុខារស់នៅផ្ទះលេខ ៩៧ ផ្លូវលេខ៣១៣ សង្កាត់បឹងកក់២ ខណ្ឌទួលគោក ដោយចៅក្រមស៊ើបសួរបានកំហិតមិនអោយជនត្រូវចោទដើររហេតរហូត ជួបភ្ញៀវបរទេសមានការពាក់ព័ន្ធ ឬជួបសកម្មជនធ្វើសកម្មភាពនយោបាយផ្សេងៗឡើយ៕
Source: Kampuchea Thmey Daily
0 Comments