ភ្នំពេញ ៖ ប៉ូលិស បានទទួលឃាត់ខ្លួនជនសង្ស័យម្នាក់បញ្ជូនទៅតុលាការ យោងតាមពាក្យបណ្តឹងរបស់ដើមចោទ ដែលជាប្រធានក្រុមហ៊ុនជំនួញមួយ ប្តឹងចោទបុគ្គលិករបស់ខ្លួនពីបទរំលោភទំនុកចិត្ត ប្រើល្បិចលួចលុយក្រុមហ៊ុនចាយអស់ជាង៨ពាន់ដុល្លារអាមេរិក ចាប់ខ្លួនកាលពីរសៀលថ្ងៃទី១៤ ខែកញ្ញា ឆ្នាំ២០១៨។
ជនជាប់ចោទឈ្មោះ ម៉ន សាវ៉ាន់ ភេទប្រុសអាយុ៣៦ឆ្នាំ មុខរបរបុគ្គលិកក្រុមហ៊ុន ឥណ្ឌូឆាយណាហ្វាម៉ា ផ្នែកទីផ្សារលក់ចែកចាយថ្នាំពេទ្យ តាមខេត្ត ស្នាក់នៅផ្ទះជួល ភូមិ៨ សង្កាត់ទឹកល្អក់៣ ខណ្ឌទួលគោក។
លោកស្រី ឌៀប ពៅ អាយុ៤៦ឆ្នាំ មុខរបរប្រធានក្រុមហ៊ុន ឥណ្ឌូឆាយណា ហ្វាម៉ា មានទីលំនៅ ភូមិទំនប់ សង្កាត់ភ្នំពេញថ្មី បានចោទប្រកាន់ឈ្មោះ ម៉ន សាវ៉ាន ថា ៖ បានប្រើល្បិចលួចលុយរបស់ក្រុមហ៊ុនអស់ចំនួន៨៤៦៦ដុល្លារ ហើយបានគេចខ្លួនចាប់តាំងពីថ្ងៃទី០១ខែមីនា ដល់ខែវិច្ឆិកា ឆ្នាំ២០១៧ មកម្ល៉េះ។
ជនរងគ្រោះជាដើមបណ្តឹងបានបញ្ជាក់ថា ៖ ឈ្មោះ ម៉ន សាវ៉ាន ហៅវ៉ាន នេះ បានមកដាក់ពាក្យសុំធ្វើការក្រុមហ៊ុនរបស់គាត់កាលពីខែកុម្ភៈ ឆ្នាំ២០១៧ ក្នុងមុខងារជាអ្នកលក់ថ្នាំពេទ្យបោះចែកចាយនៅតាមបណ្តាខេត្ត ដោយទទួលប្រាក់បៀវត្សរ៍ចំនួន៦៥០ដុល្លារប្រចាំខែ។ រូបភាពល្បិចកលលួចយកលុយរបស់ជននេះគឺ គេបានយកលុយពីអតិថិជននីមួយៗបានហើយ តែគេមិនអោយក្រុមហ៊ុន ដោយធ្វើវិក្រយបត្របង់លុយផ្សេងប្រគល់អោយអតិថិជន ហើយយកវិក្រយបត្របង់លុយពិតរបស់ក្រុមហ៊ុនមកប្រគល់អោយក្រុមហ៊ុនវិញ ដោយកុហកថា អតិថិជនមិនទាន់មានលុយបង់អោយ...។
ជនជាប់បានគេចខ្លួន បន្ទាប់ពីបានដឹងថា ប្រធានក្រុមហ៊ុនបានដឹងរឿងភូតកុហករបស់ខ្លួនឆបោកលួចយកលុយ ក្រុមហ៊ុន។ ក្រោយមក លុះនៅថ្ងៃទី១៤ ខែកញ្ញាឆ្នាំ២០១៨ ជននេះបានចូលមកក្រុមហ៊ុនវិញបំរុងចរចាដោះស្រាយរឿងលុយនោះ ប៉ុន្តែត្រូវបានក្រុមហ៊ុនបដិសេធ ហើយបាននាំខ្លួនមកប្រគល់អោយប៉ូលិសមូលដ្ឋានចាត់ការតាមច្បាប់តាមបណ្តឹងរបស់លោកស្រី ចោទប្រកាន់ពីបទរំលោភទំនុក ប្រើល្បិចលួចលុយរបស់ក្រុមហ៊ុន៕
Source: Kampuchea Thmey Daily
0 Comments