ភ្នំពេញ ៖ សមត្ថកិច្ចនគរបាលខណ្ឌសែនសុខ បានចាប់ខ្លួនបុរសម្នាក់ កាលពីម៉ោង៣រសៀលថ្ងៃទី១៤ ខែកញ្ញា ឆ្នាំ២០១៨ សង្ស័យពីបទជួញដូរថ្នាំដ៏សកម្ម ដែលចុងក្រោយសមត្ថកិច្ចឃាត់ខ្លួនរកឃើញថ្នាំញៀនចំនួន១៣កញ្ចប់រួមទាំងជញ្ជីងសម្រាប់ថ្លឹងចែកចាយផង។
សមាសភាពជនសង្ស័យដែលត្រូវបានគេឃាត់ខ្លួនខាងលើ ឈ្មោះ ជា ដារ៉ា ហៅអារ័ត្ន អាយុ២៧ឆ្នាំ ស្នាក់នៅផ្ទះជួលភូមិទំនប់ សង្កាត់ភ្នំពេញថ្មី ខណ្ឌសែនសុខ។
ប្រភពព័ត៌មានពីសមត្ថកិច្ច បានអោយដឹងថា នៅមុនពេលកើតហេតុសមត្ថកិច្ចកំពុងយាមល្បាតក្នុងមូលដ្ឋាន បានប្រទះឃើញជនសង្ស័យខាងលើកំពុងតែធ្វើដំណើរដោយថ្មើរជើងនៅតាមផ្លូវក្នុងភូមិទំនប់ សង្កាត់ភ្នំពេញថ្មី ដោយមានការសង្ស័យក៏ឃាត់ត្រួតពិនិត្យឆែករកឃើញថ្នាំញៀនចំនួន១៣កញ្ចប់នៅក្នុងហោប៉ៅខោ ខាងស្តាំ រួមទាំងជញ្ជីងកុំព្យូរទ័រស៊េរីទំនើបមួយគ្រឿងផង សម្រាប់ថ្លឹងចែកចាយជួញដូរថ្នាំញៀន ជាអាជីព។
ជនសង្ស័យក្រោយពីឃាត់ខ្លួនសមត្ថកិច្ចត្រួតពិនិត្យល្បាយទឹកនោមរបស់គេរកឃើញមានផ្ទុកសារធាតុញៀនកំរិតខ្ពស់ បញ្ជាក់ថា ជននេះជួញដូរផងប្រើប្រាស់ផង ជាអំពើល្មើសច្បាប់ដែលសង្គមគេស្អប់ខ្ពើមបំផុត។
ប៉ូលិសបានសង្ស័យថា ជនសង្ស័យរូបនេះជាមនុស្សជំនិតរបស់មេខ្លោងថ្នាំញៀនព្រោះការជួញដូរនេះមិនធម្មតា ដែលមានថ្នាំញៀនរហូត១៣កញ្ចប់មានទាំងជញ្ជីងសម្រាប់ថ្លឹងទិញលក់ចែកចាយផងដែរ ធ្វើជំនួញថ្នាំញៀនយ៉ាងជំនាញ ហើយសមត្ថកិច្ចកំពុងប្រើចិត្តសាស្ត្រ សាកសួររកមេខ្លោងធំរបស់គេម្នាក់ទៀត ដែលជាអ្នកផលិត និង ផ្តល់ឬលក់ថ្នាំញៀនបន្តមកឲ្យគេ៕
Source: Kampuchea Thmey Daily
0 Comments