ក្រុមគ្រួសារនិងអ្នកវិភាគបានព្យាករណ៍ថា បេក្ខជនឈានមុខនៃការបោះឆ្នោតប្រេស៊ីលលោក Jair Bolsonaro នឹងទទួលបានការគាំទ្រកាន់តែខ្លាំងចេញពីបន្ទប់សង្គ្រោះបន្ទាន់សម្រាប់តំណែងប្រធានាធិបតីមួយថ្ងៃបន្ទាប់ពីគាត់ត្រូវបានគេចាក់ ខណៈកំពុងធ្វើយុទ្ធនាការឃោសនា។
ការប្រកួតប្រជែងសម្រាប់តំណែងប្រធានាធិបតីរបស់ប្រទេសប្រេស៊ីលបានជួបប្រទះនឹងបញ្ហាចុងក្រោយបំផុតកាលពីថ្ងៃព្រហស្បតិ៍នៅពេលដែលសកម្មជនឆ្វេងនិយមម្នាក់បានចាក់លោក Bolsonaro ខណៈដែលគាត់កំពុងធ្វើយុទ្ធនាការឃោសនានៅរដ្ឋ Minas Gerais ភាគអាគ្នេយ៍។
អតីតកាពីតែនកងទ័ពរូបនេះបានទទួលការវះកាត់ភ្លាមៗសម្រាប់របួសជាច្រើនកន្លែងលើដងខ្លួនរបស់គាត់និងត្រូវទទួលការព្យាបាលយ៉ាងតិចមួយសប្តាហ៍នៅក្នុងមន្ទីរពេទ្យក្រុង Sao Paulo ប៉ុន្តែការអវត្តមានជាបណ្តោះអាសន្នរបស់គាត់ត្រូវបានគេរំពឹងថានឹងទទួលបានការគាំទ្រកើនឡើងជាជាងប៉ះពាល់ដល់ឱកាសរបស់គាត់។
កាលពីសប្តាហ៍មុន លោក Bolsonaro ត្រូវបានគេដាក់ឈ្មោះជាបេក្ខជននាំមុខក្នុងការបោះឆ្នោតជុំដំបូងនៅថ្ងៃទី៧ខែតុលាខណៈពេលដែលអតីតប្រធានាធិបតីជាប់ពន្ធនាគារលោក Luiz Inacio Lula da Silva ត្រូវបានហាមឃាត់ពីការឈរឈ្មោះដោយតុលាការបោះឆ្នោតរបស់ប្រទេស។
លោក Jimena Blanco អ្នកវិភាគនយោបាយបាននិយាយថា “ការវាយប្រហារប្រឆាំងនឹងលោក Bolsonaro នឹងមានឥទ្ធិពលដោយផ្ទាល់ទៅលើគោលបំណងរបស់អ្នកបោះឆ្នោត”។
នៅសប្តាហ៍នេះ លោក Bolsonaro បានមើលឃើញពីការនាំមុខ១០ពិន្ទុលើគូប្រជែងជិតបំផុតរបស់ខ្លួនគឺអ្នកបរិស្ថាន Marina Silva និងបេក្ខជនឆ្វេងនិយម Ciro Gomes ។
លោក Bolsonaro មានប្រព័ន្ធផ្សព្វផ្សាយសង្គមដ៏ធំមួយដែលមានអ្នក follow ចំនួន៨.៥លាននាក់។
បើទោះបីគាត់ជាសមាជិកសភាបម្រើការងារយូរអង្វែងក៏ដោយ លោក Bolsonaro បានបង្ហាញខ្លួនឯងថាជាអ្នកខាងក្រៅដែលមិនប៉ះពាល់ដោយរឿងអាស្រូវពុករលួយដែលវាយប្រហារដល់ឥស្សរជននយោបាយជាច្រើននាក់ឡើយ។
ការសន្យាមួយក្នុងយុទ្ធនាការរបស់គាត់គឺធ្វើឲ្យស្របច្បាប់នូវការកាន់អាវុធដើម្បីប្រយុទ្ធប្រឆាំងនឹងឧក្រិដ្ឋកម្មដែលកំពុងកើនឡើងនៅក្នុងប្រទេសមួយដែលប៉ូលិសបានចូលរួមរួចទៅហើយនៅក្នុងសង្គ្រាមកម្រិតទាបប្រឆាំងនឹងក្រុមឧក្រិដ្ឋជន។ មនុស្សប្រហែល៦៤,០០០នាក់បានស្លាប់ក្នុងអំពើមនុស្សឃាតជារៀងរាល់ឆ្នាំ៕ AFP
Source: Kampuchea Thmey Daily
0 Comments