ប្រទេសមីយ៉ាន់ម៉ាកាលពីថ្ងៃសុក្របានជំទាស់ទៅនឹងសេចក្តីសម្រេចរបស់តុលាការព្រហ្មទណ្ឌអន្តរជាតិ (ICC) ដែលផ្តល់អំណាចដល់សាលាក្តីឲ្យស៊ើបអង្កេតឧក្រិដ្ឋកម្មប្រឆាំងនឹងជនជាតិរ៉ូហ៊ីងយ៉ា បើទោះបីជាប្រជាជាតិអាស៊ីអាគ្នេយ៍មួយនេះមិនមែនជាសមាជិករបស់ខ្លួនក៏ដោយ។
ជនជាតិភាគតិចមូស្លីមរ៉ូហ៊ីងយ៉ាប្រមាណ៧០០,០០០នាក់ត្រូវបានបណ្តេញទៅប្រទេសបង់ក្លាដែសដោយការបង្ក្រាបដឹកនាំដោយកងទ័ពមីយ៉ាន់ម៉ាកាលពីខែសីហា។
ពួកគេបានផ្តល់នូវពត៌មានលម្អិតនិងច្បាស់លាស់អំពីយុទ្ធនាការឃាតកម្ម ការរំលោភនិងការដុតបំផ្លាញឥតឈប់ឈរដែលបង្ខំឲ្យពួកគេភៀសខ្លួន។
ប្រទេសមីយ៉ាន់ម៉ាបានបដិសេធការរំលោភបំពានជាប្រព័ន្ធដោយទទូចថា សកម្មភាពយោធារបស់ខ្លួនគឺជាការឆ្លើយតបសមាមាត្រចំពោះការវាយប្រហាររបស់ពួកសកម្មប្រយុទ្ធរ៉ូហ៊ីងយ៉ា។
នៅក្នុងសេចក្តីសម្រេចដែលមិនធ្លាប់មានពីមុនមក កាលពីថ្ងៃព្រហស្បតិ៍ ICC បាននិយាយថា ខ្លួនមានយុត្តាធិការលើវិបត្ដិនេះដោយសារតែ “ការនិរទេស” របស់ពួករ៉ូហ៊ីងយ៉ាទៅប្រទេសបង់ក្លាដែស។
ប៉ុន្តែនៅក្នុងការឆ្លើយតបយ៉ាងខ្លាំងកាលពីថ្ងៃសុក្រពីរដ្ឋាភិបាលមួយដែលត្រូវបានឡោមព័ទ្ធដោយការរិះគន់, មីយ៉ាន់ម៉ាបាននិយាយថា ការសម្រេចនេះគឺជាគុណសម្បត្តិផ្នែកច្បាប់។
សេចក្តីថ្លែងការណ៍មួយដែលចេញផ្សាយដោយការិយាល័យប្រធានាធិបតីបាននិយាយថា “ការសម្រេចចិត្តនេះគឺជាលទ្ធផលនៃជំនឿមិនល្អ ភាពមិនប្រក្រតីខាងនីតិវិធីនិងភាពខ្វះខាតទូទៅនៃតម្លាភាព”។ សេចក្តីថ្លែងការណ៍ដដែលបានបន្ថែមថា ប្រទេសនេះសូមបដិសេធយ៉ាងម៉ឺងម៉ាត់ចំពោះសាលក្រមរបស់តុលាការ។
សេចក្តីថ្លែងការណ៍បានបន្តថា មីយ៉ាន់ម៉ា “មិនមានកាតព្វកិច្ច” ដើម្បីគោរពសេចក្តីសម្រេចរបស់ ICC ទេហើយបន្ថែមថា ការចោទប្រកាន់លើការនិរទេសមិនមែនជាការពិតឡើយ។
ស្របពេលជាមួយគ្នានោះ មីយ៉ាន់ម៉ានិយាយថា ខ្លួនបានត្រៀមខ្លួនរួចរាល់ហើយនិងមានឆន្ទៈក្នុងការទទួលយកអ្នកដែលរត់មកវិញ។ ប៉ុន្តែកិច្ចសន្យា “ការធ្វើមាតុភូមិនិវត្តន៍” ជាមួយប្រទេសបង់ក្លាដែសរហូតមកដល់ពេលនេះមិនមានលទ្ធផលល្អទេ។
ជនភៀសខ្លួននៅក្នុងជំរំដែលមានមនុស្សច្រើនហួសក្នុងប្រទេសបង់ក្លាដែសបាននិយាយថា ពួកគេនឹងមិនវិលត្រឡប់ទៅមីយ៉ាន់ម៉ាវិញទេបើគ្មានសិទ្ធិជាពលរដ្ឋក៏ដូចជាការធានាសន្តិសុខនិងសំណងផងដែរចំពោះការរឹបអូសយកដីនិងភូមិដែលត្រូវបានបំផ្លិចបំផ្លាញ៕ AFP
Source: Kampuchea Thmey Daily
0 Comments