គណៈកម្មការរបស់អង្គការសហប្រជាជាតិកាលពីថ្ងៃពុធបានអំពាវនាវឲ្យក្រុមឧទ្ទាមនៅក្នុងខេត្ត Idlib របស់ប្រទេសស៊ីរីចាកចេញពីតំបន់ជាយក្រុងដើម្បីការពារជនស៊ីវិលពីការរំលោភបំពាន ណាមួយទៀតពីរបប។
សំណើនេះបានធ្វើឡើងបន្ទាប់ពីបេសកជនសន្តិភាពរបស់អង្គការសហប្រជាជាតិសម្រាប់ប្រទេសស៊ីរីលោក Staffan de Mistura កាលពីសប្តាហ៍មុនបានស្នើពេលវេលាកំណត់មួយសម្រាប់អ្នកប្រយុទ្ធនៅខេត្ត Idlib ឲ្យដកចេញពីទីក្រុងរបស់ខ្លួន។
ទីភ្នាក់ងារអង្គការសហប្រជាជាតិនិងអង្គការសង្គ្រោះនានាបានព្រមានម្តងហើយម្តងទៀតថា ការវាយប្រហារធំៗនៅខេត្ត Idlib ដែលជាប់ព្រំប្រទល់ប្រទេសទួរគីអាចបង្កឲ្យមានគ្រោះមហន្តរាយមនុស្សធម៌អាក្រក់បំផុតមួយនៃសង្គ្រាមស៊ីរីរយៈពេលប្រាំពីរឆ្នាំមកនេះ។
កាលពីថ្ងៃពុធ គណៈកម្មការស៊ើបអង្កេតអង្គការសហប្រជាជាតិស្តីពីប្រទេសស៊ីរីបានអំពាវនាវឲ្យពួកជីហាដនិងក្រុមប្រឆាំងនានាចាកចេញពីតំបន់ដែលមានប្រជាជនរស់នៅច្រើនបំផុត។
លោក Paulo Pinheiro ប្រធានគណៈកម្មការបានថ្លែងថា “ក្រុមភេរវករភាគច្រើននិងក្រុមប្រដាប់អាវុធដទៃទៀតនៅតែស្ថិតក្នុងទីក្រុង”។
ខេត្ត Idlib និងតំបន់ជិតៗនោះត្រូវបានគ្រប់គ្រងភាគច្រើនដោយក្រុម Hayat Tahrir al-Sham (HTS) ដែលជាសម្ព័ន្ធភាពមួយដឹកនាំដោយអតីតសម្ព័ន្ធស៊ីរីរបស់ក្រុមអាល់កៃដាព្រមទាំងពួកឧទ្ទាមជាគូប្រជែងផងដែរ។ HTS បានគ្រប់គ្រងទីរួមខេត្ត Idlib ។
ក្រុមឃ្លាំមើលដែលមានមូលដ្ឋាននៅប្រទេសអង់គ្លេសបាននិយាយកាលពីថ្ងៃពុធ ការបាញ់កាំភ្លើងធំបានវាយប្រហារតំបន់ភាគខាងត្បូងនៃខេត្ត Idlib និងតំបន់ដែលគ្រប់គ្រងដោយក្រុមឧទ្ទាមនៃខេត្ត Hama ដែលស្ថិតនៅជិតនោះ។
ប៉ុន្តែក្រុមឃ្លាំមើលសិទិ្ធមនុស្សស៊ីរីបាននិយាយថា សម្រាប់ថ្ងៃទី២ មិនមានការវាយឆ្មក់ពីអាកាសទេបន្ទាប់ពីការវាយប្រហារពីអាកាសនិងការទម្លាក់គ្រាប់បែកធុងកាលពីចុងសប្តាហ៍។
ក្រុមឃ្លាំមើលនេះបាននិយាយថា ចាប់តាំងពីថ្ងៃទី៤ខែកញ្ញាមក ការបាញ់ផ្លោងនិងការវាយប្រហារពីអាកាសដោយរបបនិងប្រទេសរុស្ស៊ីបានសម្លាប់ជនស៊ីវិលយ៉ាងតិច១៥នាក់នៅក្នុងតំបន់ដែលពួកឧទ្ទាមកាន់កាប់។
កាលពីថ្ងៃសុក្រ អ្នកគាំទ្រក្រុមឧទ្ទាមគឺប្រទេសទួរគីនិងសម្ព័ន្ធមិត្តរបស់រដ្ឋាភិបាលគឺប្រទេសរុស្ស៊ីនិងអ៊ីរ៉ង់បានបរាជ័យក្នុងការឈានដល់កិច្ចព្រមព្រៀងមួយនៅក្រុងតេរ៉ង់ដើម្បីចៀសវាងការវាយប្រហារទៅលើខេត្ត Idlib ៕ AFP
Source: Kampuchea Thmey Daily
0 Comments