ប្រធានាធិបតីអាមេរិកលោក Donald Trump បានលើកឡើង កាលពីថ្ងៃពុធអំពីការឆ្លើយតបផ្នែកយោធាទៅកាន់ប្រទេសវេណេហ្ស៊ូអេឡាដោយលោកបានប្តេជ្ញាចាត់វិធានការប្រឆាំងនឹងប្រទេសដែលគ្រប់គ្រងដោយអ្នកឆ្វេងនិយមមួយនេះ ស្របពេលដែលសេដ្ឋកិច្ចរបស់ពួកគេកំពុងមានភាពវឹកវរ។
ការគំរាមកំហែងរបស់លោក Trump ត្រូវបានរិះគន់ភ្លាមៗដោយវេណេហ្ស៊ូអេឡាថា ជាការញុះញង់ឲ្យមានការ “បះបោរយោធា” ហើយវាបានកើតឡើងចំពេលដែលសហរដ្ឋអាមេរិកដាក់គំនាបលើផ្ទៃក្នុងរបស់លោកប្រធានាធិបតី Nicolas Maduro រួចទៅហើយស្របពេលវិបត្តិសេដ្ឋកិច្ចកំពុងនាំឲ្យជនជាតិវេណេហ្ស៊ូអេឡាចំនួនពីរលាននាក់ត្រូវចាកចេញពីប្រទេស។
លោក Trump បានប្រាប់ក្រុមអ្នកយកព័ត៌មាននៅទីក្រុងញូវយ៉កដែលជាកន្លែងលោកកំពុងចូលរួមសម័យប្រជុំកម្រិតខ្ពស់ប្រចាំឆ្នាំរបស់មហាសន្និបាតអង្គការសហប្រជាជាតិថា “អ្វីដែលកំពុងកើតឡើងនៅវេណេហ្ស៊ូអេឡាគឺជាភាពអាម៉ាស់មួយ។ ខ្ញុំគ្រាន់តែចង់ឃើញវេណេហ្ស៊ូអេឡារួចផុតក្តីទុក្ខ ខ្ញុំចង់ឲ្យប្រជាជនមានសុវត្ថិភាព យើងនឹងថែរក្សាប្រទេសវេណេហ្ស៊ូអេឡា”។
យ៉ាងណាក្តី នៅក្នុងសុន្ទរកថាទៅកាន់មហាសន្និបាត លោក Maduro បានចោទប្រកាន់អាមេរិកជាថ្មីម្តងទៀតថា មានជាប់ពាក់ព័ន្ធក្នុងការវាយប្រហារកាលពីថ្ងៃទី៤ខែសីហាដោយប្រើប្រាស់យន្តហោះដ្រូនផ្ទុកគ្រាប់បែកអំឡុងពេលក្បួនព្យុហយាត្រាយោធាមួយនៅទីក្រុង Caracas ។
មេដឹកនាំវេណេហ្ស៊ូអេឡារូបនេះបានប្រកាសថា “ថ្វីបើមានភាពខ្វែងគំនិតគ្នាក៏ដោយ” គាត់នឹងសុខចិត្តចាប់ដៃជាមួយលោក Trump ហើយជួបជាមួយគាត់។
មុននេះ លោក Trump បាននិយាយថា លោកក៏មានបំណងចង់ជួបលោក Maduro ផងដែរ។
គួរបញ្ជាក់ថា យោបល់របស់លោក Trump បានធ្វើឡើងក្រោយពេលមានរបាយការណ៍មួយកាលពីដើមខែនេះនៅក្នុងកាសែត The New York Times ដែលបានឲ្យដឹងថា ក្រុមមន្ត្រីមកពីរដ្ឋបាលអាមេរិកបានជួបប្រជុំជាមួយមន្ត្រីយោធាវេណេហ្ស៊ូអេឡាចំនួន៣ដងរួចមកហើយដើម្បីពិភាក្សាអំពីផែនការទម្លាក់លោក Maduro៕ AFP
Source: Kampuchea Thmey Daily
0 Comments