ភ្នំពេញ ៖ ឯកអគ្គរាជទូត តំណាងអចិន្ត្រៃយ៍កម្ពុជា ប្រចាំមន្ទីរអង្គការសហប្រជាជាតិ និងអង្គការអន្ដរជាតិនានា នៅទីក្រុងហ្សឺណែវ លោក ណី សំអុល បានប្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិថា ពីការដោះលែងលោក កឹម សុខា និងអ្នកទោសផ្សេងទៀត កាលពីពេលថ្មីៗនេះថា ផ្អែកតាមមនុស្សធម៌ និងជាអំណាចឆន្ទានុសិទ្ធិរបស់ចៅក្រមស៊ើបសួរ។
ការលើកឡើងនេះ បានធ្វើឡើងតាមរយៈសេចក្តីថ្លែងការណ៍មួយរបស់តំណាងកម្ពុជាប្រចាំនៅអង្គការសហប្រជាជាតិ នៅក្នុងកិច្ចពិភាក្សាទូទៅមួយ នាសម័យប្រជុំលើកទី៣៩ នៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ កាលពីថ្ងៃទី១១ ខែកញ្ញា ឆ្នាំ២០១៨។
ជាកិច្ចចាប់ផ្តើម តំណាងកម្ពុជា វាយតម្លៃខ្ពស់ចំពោះភាពក្លាហានរបស់លោកស្រី Michelle Bachelet ដែលបានលើកឡើងនូវបញ្ហាមួយចំនួន បើទោះបីជាមិនបានគ្រប់ជ្រុងជ្រោយ តែលោកស្រីបានទទួលស្គាល់ការពិត អំពីសមិទ្ធផលរបស់ប្រទេសកម្ពុជា ក្នុងការជំរុញសុទ្ធសេដ្ឋកិច្ច និងសង្គម ប៉ុន្តែគណៈប្រតិភូកម្ពុជា មានការខកចិត្តដែលលោកស្រីឧត្តមស្នងការ និងគណៈប្រតិភូមួយចំនួន ដែលផ្អែកលើព័ត៌មាន ដែលមានលក្ខណៈនយោបាយ បានលាបពណ៌ប្រទេសកម្ពុជាឲ្យខ្មៅងងឹត ពាក់ព័ន្ធនឹងសិទ្ធិប្រជាពលរដ្ឋ និងសិទ្ធិនយោបាយ ដោយការធ្វើព្រងើយកន្តើយចំពោះសេចក្តីត្រូវការជាមូលដ្ឋាន និងផ្លូវដែលគ្រោះថ្នាក់ក្នុងដំណើរឆ្ពោះទៅរកការសម្រេចបាននូវសន្តិភាព ស្ថេរភាព និងការអភិវឌ្ឍប្រទេសកម្ពុជា ដែលទទួលបានដោយការពុះពារយ៉ាងលំបាក។
លោក ណី សំអុល លើកឡើងទៀតថា ពិតណាស់សិទ្ធិមនុស្ស ដូចដែលបានចែងនៅក្នុងធម្មនុញ្ញអង្គការសហប្រជាជាតិ សេចក្តីថ្លែងការណ៍ជាសកលស្ដីពីសិទ្ធិមនុស្ស និងលិខិតតូបករណ៍សិទ្ធិមនុស្សអន្តរជាតិពាក់ព័ន្ធផ្សេងៗទៀត ត្រូវបានដាក់ចូលទៅក្នុងរដ្ឋធម្មនុញ្ញកម្ពុជា ដែលជាច្បាប់កំពូលរបស់ប្រទេស។ ប្រព័ន្ធលទ្ធិប្រជាធិបតេយ្យ សេរីពហុបក្ស ត្រូវបានគោរពយ៉ាងខ្ជាប់ខ្ជួនតាមរយៈការបោះឆ្នោត ដោយសេរី យុត្តិធម៌ និងតាមកាលកំណត់ជាទៀងទាត់។
លោកបន្តថា ការបោះឆ្នោតកាលពីខែកក្កដាកន្លងទៅ បានទទួលការសាទរថា ជាព្រឹត្តិការណ៍ដែលមិនធ្លាប់មានពីមុនមកក្នុងប្រវត្តិសាស្ត្រសម័យទំនើបរបស់ប្រទេសកម្ពុជា ដែលក្នុងនោះមានគណបក្សនយោបាយចំនួន២០ ដែលមាននិន្នាការផ្សេងៗគ្នា បានចូលរួមប្រកួតប្រជែង។ អ្នកសង្កេតការណ៍ជាតិចំនួន៨ ម៉ឺននាក់ អ្នកសង្កេតការណ៍អន្តរជាតិប្រហែល៥០០នាក់ និងភ្នាក់ងារមកពីគណបក្សនយោបាយចំនួន៩ ម៉ឺននាក់បានបញ្ជាក់ថា ការបោះឆ្នោតនេះបានប្រព្រឹត្តទៅដោយសេរីយុត្តិធម៌ និងតម្លាភាព។
តាមលោក ណី សំអុល ដំណើរការបោះឆ្នោតត្រូវបានរៀបចំ ដោយមានសណ្ដាប់ធ្នាប់ និងសន្តិសុខដ៏ល្អប្រសើរ ជាងពេលណាៗទាំងអស់ ដោយពុំមានការគំរាមកំហែង ការបង្ករបួសស្នាម អំពើហិង្សា ឬការបំភិតបំភ័យណាមួយឡើយ ដែលនេះបញ្ជាក់ឲ្យឃើញច្បាស់ថា លទ្ធិប្រជាធិបតេយ្យបានចាក់ឫសយ៉ាងជ្រៅក្នុងសង្គមកម្ពុជា។ ចំនួនអ្នកចូលរួមបោះឆ្នោតដ៏ខ្ពស់រហូតដល់៨៣.២ភាគរយនៃចំនួនប្រជាជនចុះឈ្មោះបោះឆ្នោត បង្ហាញឲ្យឃើញថា សិទ្ធិពលរដ្ឋ និងសិទ្ធនយោបាយត្រូវបានអនុវត្តដោយសេរី និងដោយល្អប្រសើរ។ ចំនួនភាគច្រើនលើសលប់នៃអ្នកបោះឆ្នោត ដែលបានបោះឆ្នោតជូនគណបក្សកាន់អំណាចឲ្យបន្តអាណត្តិថ្មីរបស់ខ្លួន គឺដោយសារតែអ្នកបោះឆ្នោតប្រាថ្នាចង់បានបន្តនូវសន្តិភាព ស្ថេរភាព និងការអភិវឌ្ឍន៍។ ដូច្នេះតើមនុស្សមួយចំនួនផ្សេង ប្រាថ្នាចង់បានអ្វីទៀត ទើបពួកគេពេញចិត្ត?
លោក ណី សំអុល បញ្ជាក់ទៀតថា ជាអកុសល ទោះជាយ៉ាងណាក៏ដោយ ដោយគ្រាន់តែផ្អែកលើអវត្តមានអតីតគណបក្សនយោបាយមួយ ប្រតិភូមួយចំនួនបែរជាមើលឃើញបរិយាកាសសិទ្ធិមនុស្សជុំវិញការបោះឆ្នោត កាលពីខែកក្កដា ក្នុងផ្លូវអវិជ្ជមាន ដោយមើលរំលងនូវការខិតខំប្រឹងប្រែងរបស់គណបក្សនយោបាយចំនួន២០ផ្សេងទៀត ព្រមទាំងចំណេះដឹង និងសិទ្ធិមនុស្សប្រកបដោយភាពចាស់ទុំរបស់ប្រជាជនកម្ពុជា។ បើក្រឡេកមើលសេរីភាពបញ្ចេញមតិវិញ ត្រូវបានអនុវត្តដោយមានករណីយកិច្ច និងការទទួលខុសត្រូវពិសេស ដោយមិនបំពានសិទ្ធិអ្នកដទៃ សន្តិសុខជាតិ និងសណ្តាប់ធ្នាប់សាធារណៈ ដូចមានចែងក្នុងមាត្រា១៩នៃគតិការសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ ដែលកម្ពុជាជារដ្ឋភាគីនៃកតិកាសញ្ញានេះ។ ប្រជាពលរដ្ឋកម្ពុជាគ្រប់រូប មានភាពស្មើគ្នាចំពោះមុខច្បាប់ ដោយឥតប្រកាន់និន្នាការនយោបាយមុខរបរ ឬឋានៈសង្គមឡើយ។
ជនល្មើសត្រូវបានផ្ដន្ទាទោស ដោយអំណាចតុលាការមិនមែនដោយសារពួកគេជានរណានោះទេ ប៉ុន្តែដោយសារបទល្មើសដែលពួកគេបានប្រព្រឹត្ត។ រាជរដ្ឋាភិបាលមិនមានតួនាទីអ្វីនៅក្នុងដំណើរការនីតិវិធីរបស់តុលាការ ដែលជាស្ថាប័នដាច់ដោយឡែក និងឯករាជ្យដែលធានាដោយមាត្រា១២៨ និង១៣០ នៃរដ្ឋធម្មនុញ្ញ។ ហេតុដូច្នេះហើយការដោះលែងលោក កឹមសុខា ក្រោមលក្ខខណ្ឌតុលាការ គឺធ្វើឡើងដោយផ្អែកលើកិច្ចមនុស្សធម៌ ដោយស្របតាមអំណាចឆន្ទានុសិទ្ធិរបស់ចៅក្រមស៊ើបសួរ ហើយការដោះលែងអ្នកជាប់ឃុំ និងអ្នកទោសផ្សេងៗទៀត កាលពីថ្មីៗនេះ គឺជាការអនុវត្តនីតិរដ្ឋ ដែលជាកាតព្វកិច្ចនៃការទទួលខុសត្រូវរបស់រដ្ឋាភិបាល និងរដ្ឋទាំងអស់ ដែលមានមោទនភាពថា ខ្លួនជាអ្នកប្រកាន់នីតិរដ្ឋ៕
Source: Kampuchea Thmey Daily
0 Comments