ភ្នំពេញ ៖ ដោយកន្លងទៅនៅម្តុំខាងមុខមន្ទីរពេទ្យមិត្តភាព ខ្មែរ សូវៀត ( ហៅ ) មន្ទីរពេទ្យ រុស្ស៊ី តែងមានមត្តិមហាជនទូទៅ រិះគន់អំពីភាពឥតសណ្តាប់ធ្នាប់ ដោយសារតែបងប្អូនប្រជាពលរដ្ឋមួយចំនួនរំលោភយកចិញ្ចើមផ្លូវសាធារណ ធ្វើជាកន្លែងដាក់តាំងទំនិញគ្រប់ប្រភេទលក់ រហូតបង្កការកកស្ទះចរាចរជាញឹកញាប់ ដូច្នេះដើម្បីដោះស្រាយបញ្ហានេះ អាជ្ញាធរខណ្ឌចំការមន បានដាក់កម្លាំងជាប្រចាំដើម្បីរៀបចំសណ្តាប់ធ្នាប់នៅម្តុំតំបន់នោះឲ្យបានល្អប្រសើរ។
ជាក់ស្តែងកាលពីរសៀលថ្ងៃទី២៤ ខែតុលា ឆ្នាំ២០១៨ កម្លាំងសណ្តាប់ធ្នាប់ សាលាខណ្ឌចំការមន ដឹកនាំដោយលោក សុខ បាន ប្រធានសណ្តាប់ធ្នាប់ សាលាខណ្ឌចំការមន បានដាក់កម្លាំងជាប្រចាំនៅម្តុំខាងមុខមន្ទីរពេទ្យមិត្តភាព ខ្មែរ សូវៀត ( ហៅ ) មន្ទីរពេទ្យ រុស្ស៊ី ដើម្បីរៀបចំសណ្តាប់ធ្នាប់ឲ្យបានល្អ។
លោក សុខ បាន ប្រធានសណ្តាប់ធ្នាប់ សាលាខណ្ឌចំការមន ប្រាប់ឲ្យដឹងថា បន្ទាប់ពី ទទួលបានការណែនាំពីលោកអភិបាលខណ្ឌចំការមន លោកបានដឹកនាំកម្លាំងសណ្តាប់ធ្នាប់ជាច្រើននាក់ឈរជើងប្រចាំការនៅម្តុំខាងមុខមន្ទីរពេទ្យមិត្តភាព ខ្មែរ សូវៀត ( ហៅ ) មន្ទីរពេទ្យ រុស្ស៊ី ដើម្បីរៀបចំសណ្តាប់ធ្នាប់នៅតាមបណ្តោយផ្លូវលេខ២៧១ ឲ្យបានល្អប្រសើរ។
លោក សុខ បាន ប្រាប់បន្តថា នៅតំបន់ខាងមន្ទីរពេទ្យមិត្តភាព ខ្មែរ សូវៀត ( ហៅ ) មន្ទីរពេទ្យ រ៉ូស្ស៊ី តាមបណ្តោយផ្លូវលេខ២៧១ នេះ កន្លងទៅតែងមានបងប្អូនប្រជាពលរដ្ឋមួយចំនួនរំលោភយកចិញ្ចើមផ្លូវសាធារណ ធ្វើជាកន្លែងដាក់តាំងទំនិញគ្រប់ប្រភេទ ក៏ដូចជា ម្ហូប អាហារ លក់ នាំឲ្យបាត់បង់ សណ្តាប់ធ្នាប់ របៀបរៀបរយសាធារណ រហូតធ្វើឲ្យមានការកកស្ទះចរាចរជាញឹកញាប់ ដូច្នេះហើយដើម្បីដោះស្រាយនូវបញ្ហានេះ ទើបលោកអភិបាលខណ្ឌចំការមន បានណែនាំដល់កងកម្លាំងរបស់លោក ចុះឈរជើងជាប្រចាំ ដើម្បីរៀបចំសណ្តាប់ធ្នាប់នៅម្តុំតំបន់នោះឲ្យបានល្អប្រសើរ ដោយមិនអនុញ្ញាតឲ្យបងប្អូនប្រជាពលរដ្ឋរំលោភយកចិញ្ចើមផ្លូវសាធារណ ធ្វើជាកន្លែងដាក់តាំង ម្ហូប អាហារ ឬ នំ ចំណី លក់ជាដាច់ខាត ដែលនាំឲ្យបាត់បង់សណ្តាប់ធ្នាប់ របៀបរៀបរយសាធារណ៕
Source: Kampuchea Thmey Daily
0 Comments