ភ្នំពេញ ៖ ក្រសួងទេសចរណ៍បានអះអាងថានៅក្នុងពិធីភ្ជុំបិណ្ឌឆ្នាំនេះតំបន់ទេសចរណ៍នានាបានស្រូបភ្ញៀវទេសចរជាតិអន្តរជាតិបានជាង១លាន២សែននាក់កើនឡើងជាង២០ភាគរយ បើប្រៀបធៀបទៅនឹងរយៈពេលដូចគ្នានៅឆ្នាំ២០១៧កន្លងទៅ។
យោងតាមរបាយការណ៍របស់ក្រសួងទេសចរណ៍បានឲ្យដឹងថាការកើនឡើងនៃចំនួនភ្ញៀវទេសចរជាង២០ភាគរយ នេះគឺដោយសារជីវភាពប្រជាពលរដ្ឋកាន់តែធូរធារ មានការរៀបចំរមណីយដ្ឋាននិងគោលដៅទេសចរណ៍បានស្អាតនិងផ្លូវគមនាគមន៍ល្អងាយស្រួលក្នុងការធ្វើដំណើរពីខេត្តមួយទៅខេត្តមួយទៀត។
ជាមួយគ្នានេះដែរមន្ទីរទេសចរណ៍បានចាត់វិធានការទប់ស្កាត់ការដំឡើងថ្លៃហួសហេតុលើម្ហូបអាហារ និងសេវាកម្មទេសចរណ៍ដោយមានការបិទតម្លៃនៅតាមតំបន់ទេសចរណ៍បានត្រឹមត្រូវនិងបរិស្ថានអនាម័យបានល្អប្រសើរដោយភ្ញៀវទេសចរ និងប្រជាពលរដ្ឋមានការយល់ដឹង និងភ្ញាក់រលឹកបន្ទាប់ពីមានការចុះអប់រំណែនាំ ពីមន្ត្រីជំនាញ និងអាជ្ញាធរពាក់ព័ន្ធ។
ទន្ទឹមនឹងនេះបញ្ហាសន្តិសុខសុវត្ថិភាពក៏មានភាពល្អប្រសើរ ដោយមន្ទីរទេសចរណ៍បានសហការយ៉ាងជិតស្និទ្ធជាមួយកម្លាំងមានសមត្ថកិច្ចដោយបានចាត់តាំងក្រុមការងារប្រចាំការ នៅតាមគោលដៅ ទេសចរណ៍សំខាន់ៗ និងមានការលើកស្លាកសញ្ញាគ្រោះថ្នាក់នៅតាមតំបន់ដែលងាយរងគ្រោះផងដែរ។
របាយការណ៍ដដែលបានឲ្យដឹងទៀតថា ក្នុងចំណោមភ្ញៀវទេសចរជាង១លាន២សែននាក់មានភ្ញៀវទេសចរជាតិចំនួន១,២១៣,៦៨៧នាក់ កើនឡើង ២០.២៩ភាគរយនិងភ្ញៀវអន្តរជាតិ មានចំនួន ៤៨,០០៤នាក់ កើនឡើង ២៣.៩៣ភាគរយដែលបានជួយលើកស្ទួយដល់សេដ្ឋកិច្ចជាតិឲ្យកាន់តែប្រសើរឡើងថែមទៀត។
តាមរបាយការណ៍ខាងលើបានបញ្ជាក់ថា ខេត្តសៀមរាបដែលជាតំបន់ទេសចរណ៍ប្រាង្គប្រាសាទនៅតែជាខេត្តទទួលបានភ្ញៀវទេសចរច្រើនជាងគេដដែលនៅក្នុងអំឡុងបុណ្យភ្ជុំបិណ្ឌនេះដោយទទួលបានភ្ញៀវ ទេស ចរសរុប ២៥២,៤២២នាក់ កើនឡើង ៤៧.០៥ភាគរយក្នុងនោះភ្ញៀវជាតិមានចំនួន ២៣០,០០០នាក់ កើនឡើង ៥៣.៣៣ភាគរយ, ភ្ញៀវអន្តរជាតិមានចំនួន ២២,៤២២នាក់ កើនឡើង ៣.៥៨ភាគរយ។
តែយ៉ាងណាក៏ដោយស្ថិតិនៃភ្ញៀវទេសចរទៅកាន់ខេត្តតំបន់ឆ្នេរមានការធ្លាក់ចុះ ដោយសារតែស្ថានភាពផ្លូវមិនសូវអំណោយផលដោយរងការខូចខាតខ្លាំងដោយសារ ជំនន់ទឹកភ្លៀងនិងរយៈពេលបីថ្ងៃនៃពិធីបុណ្យភ្ជុំនេះ មានភ្លៀងធ្លាក់នៅតំបន់ទាំងនោះ។ផ្ទុយទៅវិញភ្ញៀវទេសចរទៅលេងនៅខេត្តកំពតកើនឡើងខ្លាំង ជាពិសេសនៅរមណីយដ្ឋានបូកគោ និងទឹកឈូ៕
Source: Kampuchea Thmey Daily
0 Comments