បែកធ្លាយព្រះសង្ឃមួយអង្គ ជាចៅអធិការវត្តព្រះពុទ្ធត្រៃរតន៍មង្គល ចាប់រំលោភភរិយាគេបានសម្រេច ព្រមទាំងគំរាមសម្លាប់មួយពូជ

ប៉ៃលិន ៖ មានការបែកធ្លាយព័ត៌មានមួយ ដោយពលរដ្ឋរស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន បានចោទប្រកាន់ព្រះសង្ឃមួយអង្គព្រះនាម អ៊ុំ មង្គល ជាចៅអធិការវត្តព្រះពុទ្ធត្រៃរតន៍មង្គល ហៅវត្តអូរប្រើស ថា បានចាប់រំលោភសេពសន្ថវៈភរិយារបស់គេម្នាក់ ខណៈដែលស្ត្រីរងគ្រោះ ជាអ្នកបម្រើព្រះសង្ឃក្នុងវត្តកើតហេតុខាងលើ ដែលរឿងរ៉ាវទាំងកើតឡើងតាំងពីឆ្នាំ២០១៦ មកម៉្លេះ ទើបតែបែកធ្លាយ ព្រមទាំងមានការប្តឹងដល់សមត្ថកិច្ចនៃស្នងការនគរបាលខេត្តឲ្យជួយដោះស្រាយ ប៉ុន្តែមិនឃើញមានចំណាត់ការ។

បើតាមស្ត្រីរងគ្រោះឈ្មោះ ឆោម ធី ហៅប៉ុមប៉ុយ អាយុ៤៩ឆ្នាំ រស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន បានរៀបរាប់ទាំងទឹកភ្នែកប្រាប់អ្នកយកព័ត៌មាននៅព្រឹកថ្ងៃទី១៧ ខែតុលានេះថា ៖ ក្នុងអំឡុងឆ្នាំ២០១៦ ប្តីរបស់គាត់ បានជួបគ្រោះថ្នាក់ចរាចរណ៍ របួសជើងម្ខាង សម្រាកនៅមន្ទីរពេទ្យខេត្តប៉ៃលិន ចំណែកគាត់បានសុំប្តីរបស់គាត់មកបម្រើព្រះសង្ឃនៅវត្តអូរប្រើស ដោយធ្វើជាអ្នកដាំបាយ។ គាត់ធ្វើការងារក្នុងវត្តអូរប្រើស តាំងពីបង្កើតសាលាឆាន់ចាស់ រហូតដល់សាលាឆាន់ថ្មី មិនដែលមានរឿងអ្វីនោះទេ ទើបតែថ្ងៃទី១៥ ខែធ្នូ ឆ្នាំ២០១៦ វេលាម៉ោង៤ ទៀបភ្លឺ ស្រាប់តែព្រះសង្ឃព្រះនាម អ៊ុំ មង្គល ជាចៅអធិការវត្តអូរប្រើស បានមកចាប់រំលោភសេពសន្ថវៈលើរូបគាត់ រហូតបានសម្រេច ព្រមទាំងគំរាមថា «បើហ៊ានលេចឮដំណឹងនេះចេញទៅខាងក្រៅ នឹងសម្លាប់មួយពូជ» ពេលនោះរូបគាត់មិនបាននិយាយប្រាប់នរណាម្នាក់ឲ្យដឹងនោះឡើយ សូម្បីតែប្តីរបស់ខ្លួន។ស្ត្រីរងគ្រោះបន្តថា ៖ ការចាប់រំលោភលើរូបគាត់ គឺមានចំនួនពីរដង នៅវេលាម៉ោង៤ទៀបភ្លឺ និងម៉ោង១១ ព្រឹក សុទ្ធតែបានសម្រេចទាំងអស់ ដោយខ្លាចការគំរាម រូបគាត់មិនបានប្រាប់អ្នកណាឲ្យដឹងឡើយ ក្រោយមកស្រាប់តែមានការប្តឹងផ្តល់ប្តីរបស់គាត់ ជាមួយព្រះសង្ឃអង្គនេះ ក៏មានការបង្ហើយប្រាប់ប្តីឲ្យដឹងតែម្តង រហូតដល់ដាក់ពាក្យប្តឹងទៅសមត្ថកិច្ចការការិយាល័យជួញដូរមនុស្ស និងការពារអនីតិជន នៃស្នងការនគរបាលខេត្តប៉ៃលិន ប៉ុន្តែរយៈពេលជាងមួយខែទៅហើយមិនមានចំណាត់ការអ្វីលើព្រះសង្ឃអង្គនេះដែរ ទើបគាត់រាយការណ៍ប្រាប់អ្នកយកព័ត៌មានឲ្យជួយផ្សាយ ដើម្បីរកយុត្តិធម៌ជូនគាត់ផងដែរ។ ចំណែកបុរសម្នាក់ឈ្មោះ សេក ក្រាញ់ ត្រូវជាប្តីស្ត្រីរងគ្រោះ បានឲ្យដឹងដែរថា ៖ កាលពីថ្ងៃកើតហេតុលោកមិនបានដឹងអ្វីឡើយ ទើបតែដឹងថ្ងៃក្រោយ ដែលលោកបានទិញស្រាយកទៅហូបជាមួយអ្នកភូមិនៅខាងជើងភ្នំ ក៏គេប្រាប់លោក ពេលនោះលោកមិនជឿនោះទេ ព្រោះរឿងហេតុរយៈពេលជិតពីរឆ្នាំមកហើយដែរ លុះពេលសួរនាំប្រពន្ធ ទើបដឹងថាព្រះសង្ឃជាចៅអធិការវត្តអូរប្រើសនេះ ចាប់រំលោភលើប្រពន្ធរបស់គាត់ ធ្វើឲ្យគាត់ឈឺចាប់យ៉ាងខ្លាំង ដោយគាត់ធ្លាប់បម្រើលោកមិនឲ្យអាក់អន់ស្រពន់ចិត្ត បែរជាព្រះសង្ឃធ្វើបែបនេះលើក្រុមគ្រួសារគាត់ទៅវិញ។ គាត់បានបញ្ជាក់ថា ៖ ក្នុងអំឡុងពេលគាត់ធ្វើជាតៃកុងឡាន ឲ្យព្រះសង្ឃរូបនេះ គឺមានរឿងជាច្រើន ជាពិសេសគឺព្រះសង្ឃអង្គនេះមានស្រីគ្រប់ទីកន្លែង រហូតទិញលេខទូរស័ព្ទឲ្យស្រីប្រើ ទិញរបស់របរឲ្យស្រីក៏មានដែរ។ ជាមួយគ្នានេះគាត់ក៏បានស្នើសុំឲ្យអាជ្ញាធរខេត្ត ឯកឧត្តម អ៊ី ឈាន លោកជំទាវ បាន ស្រីមុំ មេត្តាជួយរកយុត្តិធម៌ឲ្យក្រុមគ្រួសារគាត់ផង ព្រោះគាត់ដាក់ពាក្យប្តឹងសមត្ថកិច្ចរួចហើយ ប៉ុន្តែមិនឃើញមានចំណាត់ការអ្វីឡើយ។

បើតាមសាក្សីម្នាក់ឈ្មោះ នួន សំណាង ភេទប្រុស អាយុ១៥ឆ្នាំ រស់នៅភូមិអូរប្រើស សង្កាត់អូរតាវ៉ៅ បានរៀបរាប់ប្រាប់អ្នកយកព័ត៌មាន ឲ្យដឹងកាលពីថ្ងៃទី១៦ ខែតុលានេះថា ៖ កាលមុនប្អូនប្រុស បានឃើញព្រះសង្ឃនៅក្នុងវត្តអូរប្រើសនេះ ដោយកាលពីវេលាម៉ោងបួនទៀបភ្លឺ ប្អូនបានយកបន្លែទៅឲ្យចុងភៅ(ស្ត្រីរងគ្រោះ)ធ្វើម្ហូប ប៉ុន្តែនៅពេលទៅដល់ស្រាប់តែឃើញព្រះសង្ឃជាចៅអធិការវត្ត កំពុងចាប់ស្ត្រីរងគ្រោះ និងប្រតាយប្រតប់គ្នា ហើយក៏ប្អូនមិនហ៊ានធ្វើអ្វីនោះទេ ព្រោះប្អូននៅក្មេងពេក រួចដើរត្រលប់មកទីលំនៅវិញ តែម្តង ។ ចំណែកស្ត្រីម្នាក់ទៀតជាសាក្សីឈ្មោះ ស៊ីណាត ភេទស្រី អាយុ៥២ឆ្នាំ រស់នៅភូមិអូរប្រើស សង្កាត់អូរតាវ៉ៅ បានឲ្យដឹងដែរថា៖ កាលពីវេលាម៉ោង១០និង៤៨នាទីថ្ងៃទី២៥ ខែកញ្ញា ឆ្នាំ២០១៨ លោកចៅអធិការវត្តអូរប្រើស បានតែតាមទូរស័ព្ទ មកគំរាមគាត់ មិនឲ្យធ្វើសាក្សីឡើយ បើតែធ្វើសាក្សី ប្រយ័ត្នជាប់គុកទាំងម៉ែ ទាំងឪ ពេលនោះគាត់បានតប់ទៅព្រះសង្ឃ អ៊ុំ មង្គលថា តើគាត់មានកំហុសអ្វី បានជាជាប់គុកទាំងឪទាំងម៉ែដូច្នោះ លោកសង្ឃអង្គនេះថា មិនដឹងជាប់រឿងអ្វីដែរ តែសូមប្រយ័ត្ន កុំធ្វើសាក្សីឲ្យសោះ ឆាប់ទៅដកកូនកុំឲ្យធ្វើជាសាក្សីទៅ។

ពាក់ព័ន្ធបញ្ហាខាងលើ ព្រះសង្ឃដែលទទួលរងការចោទប្រកាន់ ព្រះនាម អ៊ុំ មង្គល ជាព្រះចៅអធិការវត្តព្រះពុទ្ធត្រៃរតន៍មង្គល ហៅវត្តអូរប្រើស មានថេរដីកាឲ្យដឹងតាមទូរស័ព្ទកាលពីវេលាម៉ោង១០និង០២នាទីព្រឹកថ្ងៃទី១៧ ខែតុលា ឆ្នាំ២០១៨នេះ ដោយព្រះអង្គបានបដិសេធទាំងស្រុង ចំពោះការចោទប្រកាន់របស់ស្ត្រីខាងលើ ដោយលើកឡើងថាវាជារឿងមិនពិតប្រាកដឡើយ ជារឿងមូលបង្កាច់លោកតែម្តង ហើយករណីនេះព្រះអង្គបានដាក់ពាក្យបណ្តឹងទៅដល់ថ្នាក់លើហើយដែរ ។

ចំណែកលោក សំ សាវឿង ប្រធានមន្ទីរធម្មការ និងសាសនាខេត្តប៉ៃលិន ក៏បានឲ្យដឹងតាមទូរស័ព្ទកាលពីវេលាម៉ោង១០និង១៣នាទីព្រឹកថ្ងៃទី១៧ ខែតុលា ឆ្នាំ២០១៨នេះថា៖លោកដឹងដែរ ព្រមទាំងដោះស្រាយម្តងរួចមកហើយ តាមពិតរឿងមួយនេះកើតហេតុដោយសារតែទំនាស់បុគ្គល កាលពីមុនប្តីស្ត្រីរងគ្រោះជាតៃកុងឡានឲ្យលោកសង្ឃ ប៉ុន្តែមួយរយៈក្រោយមកវាបើកឡានមិនចេះមើលថែ ក៏ព្រះសង្ឃបញ្ឈប់ពីការងារបើកឡានឲ្យ រួចក៏មានទាស់ពាក្យសំដីគ្នា រហូតមានរឿងថាចាប់រំលោភប្រពន្ធគេទៀតផង។ លោកបានបន្តថា ៖ ករណីនេះលោកបានឲ្យសមត្ថកិច្ចរៀបចំសំណុំរឿងបញ្ជូនទៅលើបន្តទៀតហើយដែរ ទុកឲ្យគេដោះស្រាយនៅខាងលើទៅ ។

ចំពោះករណីនេះដែរលោក អេង ភាវ នាយការិយាល័យប្រឆាំងការជួញដូរមនុស្សនិងការពារអនីតិជន នៃស្នងការនគរបាលខេត្តប៉ៃលិន ក៏បានឲ្យដឹងតាមទូរស័ព្ទកាលពីវេលាម៉ោង១០និង២១នាទីព្រឹកថ្ងៃទី១៧ ខែតុលា ឆ្នាំ២០១៨នេះថា ៖ រឿងហេតុខាងលើ លោកបានទទួលពាក្យបណ្តឹងពាក្យស្ត្រីរងគ្រោះហើយដែរ ពេលនេះលោកកំពុងរៀបចំបញ្ជូនសំណុំរឿងទៅតុលាការ ដើម្បីឲ្យដោះស្រាយគ្នានៅខាងលើចុះ ព្រោះខាងលោកមិនមានសមត្ថកិច្ចក្នុងការដោះស្រាយរឿងនេះឡើយ៕