សាកសព​នៃ​អ្នក​ឡើង​ភ្នំ​ជនជាតិ​កូរ៉េខាងត្បូង​ចំនួន​ប្រាំ​នាក់ ​ត្រូវ​បាន​នាំទៅ​ផ្ទះ​វិញ

សាកសព​អ្នក​ឡើង​ភ្នំ​ជនជាតិ​កូរ៉េខាងត្បូង​ចំនួន​៥​នាក់ ​ដែល​ស្លាប់​នៅក្នុង​គ្រោះ​ថ្នាក់លើ​ភ្នំ​របស់​ប្រទេស​នេ​ប៉ាល់​ ត្រូវបាន​បញ្ជូន​ត្រឡប់​មក​ផ្ទះ​វិញ​ហើយ​នៅ​ថ្ងៃ​ពុធ។

ជនជាតិ​កូរ៉េខាងត្បូង​ដែល​ដឹកនាំ​ដោយ​អ្នក​ឡើង​ភ្នំ Kim Chang-ho គឺ​បាន​ស្ថិតនៅលើ​កំពូលភ្នំ Gurja កាលពី​សប្តាហ៍​មុន​នៅពេលដែល​ជំរំ​របស់​ពួកគេ​ត្រូវបាន​វាយប្រហារ​ដោយ​ខ្យល់​ដ៏​ខ្លាំង​ភ្លាមៗ​ដែល​ប្រហែលជា​បណ្តាលមកពី​ការបាក់​ផ្ទាំង​ទឹកកក​។​

សាកសព​របស់​ពួកគេ​និង​អ្នក​នាំ​ផ្លូវ​ជនជាតិ​នេ​ប៉ាល់​ចំនួន​បួន​នាក់​ត្រូវបាន​គេ​យក​ចេញពី​ទីតាំង​ដាច់ស្រយាល​នៅ​ជួរ​ភ្នំ Dhaulagiri កាលពី​ថ្ងៃអាទិត្យ​។​

ក្រុមគ្រួសារ​និង​មិត្ត​ភ័ក្ត្រ​បាន​សម្លឹងមើល​ទាំង​ទឹកភ្នែក​ខណៈដែល​មឈូស​ទាំង​៥​ត្រូវបាន​គេ​ដាក់ចុះ​ពី​យន្ដហោះ​នៅឯ​អាកាសយានដ្ឋាន Incheon របស់​កូរ៉េខាងត្បូង​កាលពី​ព្រឹក​ថ្ងៃ​ពុធ​។​

លោក Lee In-jung ប្រធាន​សហភាព​សមាគម​ភ្នំ​អាស៊ី​បាន​ប្រាប់​អ្នកយកព័ត៌មាន​ថា “​អ្នក​ឡើង​ភ្នំ​ទាំងអស់​មាន​ភាព​សោកសៅ​ដោយ​ចងចាំ​អំពី​អ្វីដែល​យើង​បាន​ចែករំលែក​ជាមួយ​ជនរងគ្រោះ​”​។

ពិធី​បុណ្យសព​រួមគ្នា​សម្រាប់​អ្នក​ទាំង​៥​នឹងត្រូវ​បានធ្វើ​ឡើង​នៅ​ថ្ងៃ​សុក្រ​។​
​គ្រោះថ្នាក់​នេះ​គឺជា​ហេតុការណ៍​អាក្រក់​បំផុត​របស់​ប្រទេស​នេ​ប៉ាល់​ចាប់តាំងពី​ឆ្នាំ​២០១៥​មក​នៅពេល​ការរញ្ជួយ​ដី​ដ៏​ខ្លាំង​មួយ​បាន​បង្ក​ឲ្យ​មានការ​បាក់​ផ្ទាំង​ទឹកកក​ដែល​បានសម្លាប់​មនុស្ស​ចំនួន​១៨​នាក់​នៅ​ជំរំ​ភ្នំ Everest​។​

គួរ​បញ្ជាក់ថា អ្នក​ឡើង​ភ្នំ​រាប់ពាន់នាក់​នាំគ្នា​ប្រមូលផ្តុំ​ជា​រៀងរាល់ឆ្នាំ​ទៅកាន់​ប្រទេស​នេ​ប៉ាល់​ដែលជា​កន្លែង​មាន​ភ្នំ​ខ្ពស់បំផុត​ចំនួន​៨​ក្នុងចំណោម​កំពូលភ្នំ​ខ្ពស់បំផុត​ទាំង​១៤​នៅលើ​ពិភពលោក​ដែល​បង្កើតបានជា​ឧស្សាហកម្ម​ទេសចរណ៍​ភ្នំ​ប្រកបដោយ​ផលប្រយោជន៍​ហើយ​ជា​ប្រភព​សាច់ប្រាក់​ដ៏​សំខាន់​សម្រាប់​ប្រទេស​ក្រីក្រ​មួយ​នេះ​៕ AFP

​

Source: Kampuchea Thmey Daily