ភ្នំពេញ ៖ អ្នកនាំពាក្យ និងជាមន្ត្រីជាន់ខ្ពស់គណបក្សប្រជាជនកម្ពុជា លោក សុខ ឥសាន បានអះអាងថា ការតវ៉ា ឬការធ្វើបាតុកម្មណាមួយប្រឆាំងរដ្ឋាភិបាល វាជារឿងធម្មតា សម្រាប់សង្គមប្រជាធិបតេយ្យ នៅគ្រប់ប្រទេសនៅលើពិភលោក ហើយរាល់សំណូមពរ អាចត្រូវរដ្ឋាភិបាលយកមកពិនិត្យ ពីព្រោះការតវ៉ាគ្រាន់តែជាការសម្តែងមតិប៉ុណ្ណោះ មិនមានផលប៉ះពាល់អ្វីទេ។
អ្នកនាំពាក្យគណបក្សប្រជាជនកម្ពុជា លើកឡើងបែបនេះ បន្ទាប់ពីមានក្រុមបាតុករមួយក្រុមតូច បាននាំគ្នាបាតុកម្មនៅប្រទេសប៊ែលហ្សិក នៅគ្រាដែលសម្តេចតេជោ ហ៊ុន សែន បានដឹកនាំគណៈប្រតិភូទៅចូលរួមប្រជុំកំពូលអាស៊ី-អឺរ៉ុប។
តាមលោក សុខ ឥសាន “វាជារឿងធម្មតាទេ នៅក្នុងសង្គមប្រជាធិបតេយ្យ វាតែងតែមានមតិចម្រុះ មិនមានការឯកភាពគ្នាទាំងស្រុងនោះទេ។ នៅតាបណ្តាប្រទេសលើពិភពលោក ក៏តែងតែមានពហុមតិដែរ ប៉ុន្តែជាការកត់សម្គាល់ អ្នកតវ៉ាប្រឆាំងហ្នឹង គឺជាក្រុមជនភាគតិច ហើយការតវ៉ាវា គ្រាន់តែចាត់ទុកជាការសម្តែងមតិប៉ុណ្ណោះ និងមិនមានផលប៉ះពាល់អ្វីទេ ហើយសកម្មភាពប្រឆាំងទាំងនោះ គោរពតាមគោលការណ៍របស់អាជ្ញាធរមូលដ្ឋាន។ បើមិនគោរពទេ សមត្ថកិច្ច នឹងត្រូវបង្ក្រាបមិនខាន”។
លោក សុខ ឥសាន អះអាងថា “បើគ្រាន់តែចាត់ទុកជាការសម្តែងមតិ ដូច្នេះវាមិនមែនជាការចាប់បង្ខំ ឲ្យសមត្ថកិច្ច និងរដ្ឋាភិបាលត្រូវតែធ្វើតាមខ្លួននោះឡើយ តែរាល់សំណូមពរអាចត្រូវរដ្ឋាភិបាលយកមកពិនិត្យប៉ុណ្ណោះ។ ដូច្នេះសកម្មភាពបាតុកម្ម និងរាល់ការប្រឆាំងជារឿងធម្មតានៅគ្រប់ប្រទេសនៅលើពិភពលោក មិនមែនជាហេតុផលនាំឲ្យខូចខាតមុខមាត់របស់រាជរដ្ឋាភិបាលនោះទេ។ ផ្ទុយទៅវិញពួកអ្នកតវ៉ា និងពួកអ្នកធ្វើសកម្មភាពអនាធិបតេយ្យទៅវិញទេ ដែលចង់បំផ្លាញមុខមាត់ប្រទេសជាតិរបស់ខ្លួន ដោយសារតែហេតុផលផលប្រយោជន៍ក្រុមខ្លួន ឬបក្សពួកខ្លួន។ ក៏ប៉ុន្តែរាល់ការតវ៉ា និងប្រឆាំងមិនមានបានការ ឬមានប្រសិទ្ធភាពអ្វីឡើយ”។
សូមបញ្ជាក់ថា នៅគ្រាដែលសម្តេចតេជោ ហ៊ុន សែន បានដឹកនាំគណៈប្រតិភូទៅចូលរួមប្រជុំកំពូលអាស៊ី-អឺរ៉ុប នោះ មានបងប្អូនប្រជាពលរដ្ឋខ្មែរ ដែលរស់នៅក្នុងតំបន់អឺរ៉ុប យ៉ាងច្រើនកុះករ បានទៅទទួលស្វាគមន៍យ៉ាងកក់ក្ដៅចំពោះវត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕
Source: Kampuchea Thmey Daily
0 Comments