ភ្នំពេញ ៖ យុវជនម្នាក់ត្រូវបានក្រុមចោរប្លន់ប្រដាប់អាវុធស្លៀកពាក់ឯកសណ្ឋានសមត្ថកិច្ចប៉ូលិសពីរនាក់ជិះម៉ូតូដេញម៉ូតូជនរងគ្រោះធ្វើជាតាមឆែកឆេររកគ្រឿងញៀនហើយបង្ខំឲ្យឡើងជិះម៉ូតូទៅជាមួយខ្លួន លុះដល់កន្លែងស្ងាត់បានធ្វើសកម្មភាពភ្ជង់ឲ្យជនរងគ្រោះចុះចេញពីលើម៉ូតូហើយយកម៉ូតូជនរងគ្រោះទៅបាត់ស្រមោល កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២២ ខែតុលា ឆ្នាំ២០១៨ ស្ថិតនៅតាមបណ្ដោយផ្លូវជាតិលេខ៤ចំណុច មុខវត្តស្ងួនពេជ្រក្នុងសង្កាត់កន្ទោក ខណ្ឌពោធិ៍សែនជ័យ។
ជនរងគ្រោះមានឈ្មោះសុខ ឡេង អាយុ១៩ឆ្នាំ មុខរបរធ្វើការរោងចក្រស្នាក់នៅភូមិបែកចានស្រុកអង្គស្នួល ខេត្តកណ្ដាល។
តាមការរៀបរាប់ពីជនរងគ្រោះបានឲ្យដឹងថា មុនពេលកើតហេតុរូបគាត់បានជិះម៉ូតូនិចពណ៌សលាយខ្មៅ ពាក់ស្លាកលេខ ភ្នំពេញ1GH-4337 បានជិះចេញពីបែកចានគោលបំណងទៅទិញម្ជូរនៅម្ដុំលក់សាច់ក្រកដោយធ្វើដំណើរពីលិចទៅកើត ខណៈមកដល់ចំណុចកើតហេតុខាងស្រាប់តែលេចមុខជនសង្ស័យពីរនាក់ជិះម៉ូតូហុងដាឌ្រីមសេ១២៥ ស៊េរីឆ្នាំ២០១៨ មួយគ្រឿងមិនចាំស្លាកលេខមកពីក្រោយបានធ្វើកម្មភាពជិះដេញឲ្យឈប់។
ប្រភពនេះបន្ដថា ពេលនោះដោយសារតែរូបគាត់មិនហ៊ានឈប់កន្លែងងងឹតបានព្យាយាមបើកមកកន្លែងភ្លឺដែលមានមនុស្សអ៊ូអរស្រាប់តែជនសង្ស័យបានបើកបំបុកម៉ូតូឲ្យដួលរួចធ្វើជាឆែករកគ្រឿងញៀន តែរូបគាត់គ្មានគ្រឿងញៀននោះទេ ហើយជនសង្ស័យទាំងនោះបានបង្ខំរូបគាត់ឲ្យឡើងម៉ូតូយកទៅខណ្ឌរូបគាត់ក៏ព្រមឡើងម៉ូតូព្រោះគាត់គ្មានគ្រឿងញៀន ហើយក៏គ្មានខុសអ្វីដែរសុខចិត្តឡើងម៉ូតូទៅជាមួយ ខណៈមកដល់ចំណុចកើតហេតុខាងលើកន្លែងស្ងាត់ផងនោះបានឲ្យគាត់ចុះរួចដកកាំភ្លើងខ្លីភ្ជង់ក្បាលរួចជិះគេចខ្លួនបាត់ស្រមោលតែម្ដង។
ក្រោយកើតហេតុជនរងគ្រោះបានមកដាក់ពាក្យបណ្ដឹងនៅប៉ុស្តិ៍កន្ទោកដើម្បីឲ្យ សមត្ថកិច្ចជួយស្រាវជ្រាវរកម៉ូតូរបស់ខ្លួនវិញ៕
Source: Kampuchea Thmey Daily
0 Comments