គណៈប្រតិភូ​គណបក្ស​ប្រជាជន​កម្ពុជា នឹង​អញ្ជើញ​ចូលរួម​មហាសន្និបាត ICAPP លើក​ទី​១០ នៅ​ទីក្រុង​ម៉ូស្គូ រយៈពេល​៤​ថ្ងៃ

ភ្នំពេញ​ ៖ គណៈប្រតិភូ​គណបក្ស​ប្រជាជន​កម្ពុជា ដឹកនាំ​ដោយ​លោកស្រី ឃួន សុ​ដា​រី សមាជិក​គណៈកម្មាធិកា​រ​អចិន្ត្រៃយ៍​នៃ​គណបក្ស​ប្រជាជន​កម្ពុជា និង​ជា​អនុប្រធាន​គណៈកម្មាធិការ​អចិន្ត្រៃយ៍​នៃ​អង្គការ​សន្និសីទ​អន្តរជាតិ នៃ​គណបក្សនយោបាយ​អាស៊ី (​អាយ​កាប់​-ICAPP) នឹង​អញ្ជើញ​ចូលរួម​មហាសន្និបាត ICAPP លើក​ទី​១០ នៅ​ទីក្រុង​ម៉ូស្គូ សហព័ន្ធរុស្ស៊ី ចាប់ពី​ថ្ងៃទី​២៤ ដល់​ថ្ងៃទី​២៧ ខែតុលា ឆ្នាំ​២០១៨ នេះ​បើតាម​សេចក្តីប្រកាស​របស់​គណ​បក្ស​។

សេចក្តីប្រកាស​របស់​គ​ណ​បក្ស​ចុះ​ថ្ងៃទី​២២ ខែតុលា ឆ្នាំ​២០១៨ បាន​ឲ្យ​ដឹងថា មហាសន្និបាត ICAPP នេះ ផ្ដោតលើ​ប្រធានបទ​សំខាន់ៗ​ចំនួន​ពីរ គឺ​ទី​១, តួនាទី​គណបក្សនយោបាយ​នៅក្នុង​ការកាត់បន្ថយ​ភាព​តានតឹង​អន្តរជាតិ និង​ការប្រយុទ្ធប្រឆាំង​ភាពជ្រុលនិយម និង​ទី​២, សារសំខាន់​នៃ​កិច្ចសហប្រតិបត្តិការ​រ​វាង​បណ្ដា​គណបក្សនយោបាយ​នៅ​អាស៊ី ក្នុងការ​បង្កើត និង​អភិវឌ្ឍន៍​ចំណង​នយោបាយ​សេដ្ឋកិច្ច និង​សង្គម​រវាង​រដ្ឋ និង​រដ្ឋ​។

ក្រៅ​ពី​នេះ គណៈប្រតិភូ នឹងចូលរួម​កិច្ចប្រជុំ​គណៈកម្មាធិការ​អចិន្ត្រៃយ៍ ICAPP លើក​ទី​៣១ ដើម្បី​ពិភាក្សា​អំពី​ប្រធានបទ​មួយចំនួន ទាក់ទិន​នឹង​សន្តិភាព កិច្ចសហប្រតិបត្តិការ​ក្នុង​តំបន់ និង​ពិភពលោក ផ្ដោតលើ​គោលដៅ​រួម ដើម្បី​បម្រើ​ផលប្រយោជន៍​របស់​ប្រជាជន​។ គណៈប្រតិភូ នឹងចូលរួម​ផងដែរ ក្នុង​កិច្ចប្រជុំ​មួយចំនួនទៀត​ដូចជា ទី​១, កិច្ចប្រជុំ​លើក​ទី​៤ នៃ​សម្ព័ន្ធ​យុវជន ICAPP ទី​២, កិច្ចប្រជុំ​លើក​ទី​៤ នៃ​វេទិកា​សារព័ត៌មាន ICAPP ទី​៣, កិច្ចប្រជុំ​លើក​ទី​៥ នៃ​សម្ព័ន្ធ​ស្ត្រី ICAPP និង​ទី​៤, កិច្ចប្រជុំ​លើក​ទី​១ នៃ​គណៈកម្មការ​សម្របសម្រួល​រវាង​គណបក្សនយោបាយ​នៅ​អាស៊ី ទ្វីបអាមេរិក​ឡាទីន និង​ទ្វីបអាហ្វ្រិក (ICAPP-COPPPAL-CAPP)​។

នៅក្នុង​មហាសន្និបាត​នេះដែរ គណៈប្រតិភូ​កម្ពុជា នឹង​ផ្ដល់​របាយការណ៍​វឌ្ឍនភាព​អំពី​ការបង្កើត​ក្រុមប្រឹក្សា​វប្បធម៌​អាស៊ី (Asian Cultural Council.ACC) ដែលមាន​សម្ដេច​អគ្គមហាសេនាបតី​តេ​ជោ ហ៊ុន សែន ជា​ប្រធាន​ស្ថាបនិក​កិត្តិយស​។ ក្រុមប្រឹក្សា​វប្បធម៌​អាស៊ី មាន​គម្រោង​ចុះហត្ថលេខា​លើ​កិច្ច​សហប្រតិបត្តិការ​ជាមួយ​អង្គការ UNESCO ក្នុង​គោលបំណង​លើកកម្ពស់​កិច្ច​សហប្រតិបត្តិការ​វប្បធម៌ ការអភិរក្ស​កេរ្តិ៍ដំណែល​វប្បធម៌ និង​ប្រវត្តិសាស្ត្រ នៅក្នុង​ទ្វីបអាស៊ី ហើយ​ក្រុមប្រឹក្សា​វប្បធម៌​អាស៊ី​មាន​អគ្គលេខាធិការដ្ឋាន​នៅ​កម្ពុជា​។

សូមបញ្ជាក់​ថា គណបក្ស​ប្រជាជន​កម្ពុជា គឺជា​សមាជិក​ដ៏​សកម្ម​របស់​អង្គការ ICAPP ចាប់ពី​ឆ្នាំ​២០០៥ មក ហើយ ICAPP គឺជា​ក្រុម​គណបក្ស​នយោបាយ​ដ៏​ធំជាងគេ​មួយ​នៅលើ​ពិភពលោក ដែលមាន​គណបក្សនយោបាយ​ចំនួន​៣៥២ ជា​សមាជិក​មកពី​៥២ ប្រទេស​នៅ​អាស៊ី​។ ICAPP មាន​គោលបំណង​ជំរុញ​កិច្ចពិភាក្សា ដើម្បី​សន្តិភាព និង​កិច្ចសហប្រតិបត្តិការ​ណ៍​ក្នុង​តំបន់​តាមរយៈ​បណ្តា​គណបក្សនយោបាយ​៕

Source: Kampuchea Thmey Daily