នាយករដ្ឋមន្ត្រីជប៉ុនលោក ស៊ីនហ្សូ អាបេ នៅថ្ងៃពុធ បានបញ្ជូនតង្វាយសាសនាទៅកាន់ទីសក្ការបូជាដ៏ចម្រូងចម្រាសមួយដើម្បីគោរពដល់ឧក្រិដ្ឋជនសង្គ្រាម លោកលើកទី២ដែលការធ្វើបែបនេះបានធ្វើឲ្យប៉ះពាល់ដល់ប្រទេសជិតខាងអាស៊ីដូចជាចិននិងកូរ៉េខាងត្បូង។
លោក អាបេ មិនបានទៅទីសក្ការបូជា Yasukuni ដោយផ្ទាល់ទេចាប់តាំងពីខែធ្នូឆ្នាំ២០១៣មក ហើយបច្ចុប្បន្ននាយករដ្ឋមន្ត្រីរូបនេះកំពុងស្ថិតនៅទ្វីបអឺរ៉ុប។ ការធ្វើដំណើរណាមួយទៅកាន់ទីសក្ការបូជានេះបានធ្វើឲ្យមានភាពល្អក់កករក្នុងទំនាក់ទំនងជាមួយទីក្រុងប៉េកាំង។
ទោះបីជាយ៉ាងណាក៏ដោយ អ្នកនាំពាក្យទីសក្ការបូជានេះបានប្រាប់ AFP ថា លោកបានបញ្ជូនដើមឈើ “masakaki” ដ៏ពិសិដ្ឋមួយដោយភ្ជាប់ជាមួយឈ្មោះរបស់គាត់នៅពេលចាប់ផ្តើមពិធីបុណ្យរយៈពេល៤ថ្ងៃ។
មិនមានរបាយការណ៍អំពីសមាជិកគណៈរដ្ឋមន្ត្រីរបស់លោក អាបេ ធ្វើដំណើរទៅកាន់ទីសក្ការបូជានេះទេបើទោះបីជាអ្នកនយោបាយជាន់ខ្ពស់មួយចំនួនក៏បានបញ្ជូនតង្វាយទៅក៏ដោយ។
ទីសក្ការបូជានេះបានផ្តល់កិត្តិយសដល់អ្នកស្លាប់ក្នុងសង្គ្រាមចំនួន២.៥លាននាក់ប៉ុន្តែក៏មានឧក្រិដ្ឋជនសង្គ្រាមលោកលើកទី២ផងដែរហើយជាញឹកញាប់វាជាប្រភពនៃទំនាក់ទំនងដ៏ជូរចត់ជាមួយបណ្តាប្រទេសដែលរងគ្រោះពីអំពើឃោរឃៅរបស់កងទ័ពជប៉ុន។
ថ្មីៗនេះ ទីសក្ការបូជា Yasukuni បានបង្កការចាប់អារម្មណ៍នៅក្នុងប្រទេសជប៉ុននិងអន្ដរជាតិបន្ទាប់ពីលោកអាចារ្យជាន់ខ្ពស់របស់ខ្លួនបាននិយាយថា លោកនឹងលាលែងបន្ទាប់ពី “ភាសាមិនសមរម្យបំផុត” ដែលគាត់រិះគន់ដល់ព្រះចៅអធិរាជត្រូវបានលេចធ្លាយក្នុងទស្សនាវដ្តីមួយ។
នៅក្នុងការចេញផ្សាយនាពេលថ្មីៗនេះ ទស្សនាវដ្តីប្រចាំសប្តាហ៍ Shukan Post បានដកស្រង់សម្តីរបស់អាចារ្យ Kunio Kohori អាយុ៦៨ឆ្នាំដែលបាននិយាយនៅក្នុងកិច្ចប្រជុំបិទទ្វារមួយកាលពីខែមិថុនាថា “ព្រះចៅអធិរាជកំពុងព្យាយាមបំផ្លាញទីសក្ការបូជា Yasukuni”។
ព្រះចៅអធិរាជ Akihito មិនដែលទៅទីនោះទេចាប់តាំងពីការសោយរាជ្យក្នុងឆ្នាំ១៩៨៩ខណៈបិតារបស់ទ្រង់ព្រះនាម Hirohito មិនបានវិលត្រឡប់ទៅទីសក្ការបូជានេះឡើយក្រោយពីឧក្រិដ្ឋជនសង្គ្រាមត្រូវបានរក្សាទុកនៅទីនោះនៅពាក់កណ្តាលទសវត្សរ៍ឆ្នាំ១៩៧០៕ AFP
Source: Kampuchea Thmey Daily
0 Comments