ព្រះវិហារ ៖ ប្រជាពលរដ្ឋ និងអាជ្ញាធរមានសមត្ថកិច្ចនៅស្រុកគូលែនមានការភ្ញាក់ផ្អើលទៅនឹងសំឡេងផ្ទុះឮសូរខ្លាំងគ្រាំងៗពីលើអាកាស ហើយបានស៊ើបសួរតៗគ្នា ទើបដឹងថា មានបំណែកៗដែកយន្តហោះធ្លាក់មកដីកាលពីវេលាម៉ោង៦និង២០នាទីព្រឹកថ្ងៃទី២៥ ខែតុលា ឆ្នាំ២០១៨ ស្ថិតនៅឃុំស្រយង់ ស្រុកគូលែន ដោយមិនបង្កឱ្យមានមនុស្សរងគ្រោះថ្នាក់នោះទេ។
ហេតុការណ៍នេះ កើតឡើងជាលើកទីពីរហើយ នៅលើទឹកដីស្រុកគូលែនដូចគ្នាដែលលើកទីមួយកើតទ្បើងនៅឆ្នាំ2012 បន្ទាប់ពីកើតមានជម្លោះព្រំដែនប្រាសាទព្រះវិហារជាមួយភាគីថៃ។
ស្នងការនគរបាលខេត្ត ព្រះវិហារលោកឧត្ដមសេនីយ៍ទោយិនចំណានបានថ្លែងឱ្យដឹងនៅថ្ងៃនេះថាពិតជាមានហេតុការណ៍នេះកើតឡើងប្រាកដមែន ហើយពុំមានបង្កឱ្យមនុស្សណាម្នាក់គ្រោះថ្នាក់នោះទេ។
លោកស្នងការបន្តថា មិនទាន់សន្និដ្ឋានជាបំណែកអ្វីនៅទ្បើយទេ រង់ចាំគណៈកម្មាធិការខេត្តចុះស្រាវជ្រាវសិន។
មុនកើតហេតុលោកបានឮសំឡេងផ្ទុះខ្លាំងហាក់ដូចជាមានចម្ងាយឆ្ងាយពីទីរួមខេត្ត បន្ទាប់មកថ្នាក់ក្រោមបានរាយការណ៍មកភ្លាមៗថា មានបំណែកដែកធ្លាក់ពីលើអាកាសមកដីស្ថិតនៅឃុំស្រយង់ស្រុកគូលែន។
លោកស្នងការនគរបាលខេត្តថ្លែងបញ្ជាក់ថា ខណៈពេលនេះសមត្ថកិច្ចស្រុកគូលែនកំពុងគ្រប់គ្រងបំណែកទាំងនោះយ៉ាងមានសុវត្ថិភាពដើម្បីស្រាវជ្រាវនិងពិសោធន៍។
ហេតុការណ៍នេះកើតទ្បើងជាលើកទីពីរហើយនៅស្រុកគូលែនដែលលើកទីមួយកើតឡើងកាលពីប៉ុន្មានឆ្នាំមុន។
អភិបាលស្រុកគូលែនលោកប៉ាងយៀតបានឱ្យដឹងថា មុនពេលធ្លាក់បំណែកមកដីកាលពីវេលាម៉ោងជាង06ព្រឹកនេះ លោកបានឮសូរសំឡេងផ្ទុះនៅលើអាកាសយ៉ាងទ្រហឹងផ្ទួនៗគ្នា និងសន្និដ្ឋានថា វាអាចជាបំណែកយន្តស៊ើបការណ៍គ្មានមនុស្សបើក។ យ៉ាងណាក៏ដោយគ្មានមនុស្សណាម្នាក់រងគ្រោះថ្នាក់ចំពោះហេតុការណ៍អាក្រក់នេះទេ៕
Source: Kampuchea Thmey Daily
0 Comments