កណ្តាល ៖ លោក គឹម រត្ន័ណារិន ចៅក្រមស៊ើបសួរ និងជាអនុប្រធានសាលាដំបូងខេត្តកណ្តាលកាលពីថ្ងៃទី១៥ ខែតុលា ឆ្នាំ២០១៨ បានសម្រេចចេញដីកាបង្គាប់អោយធ្វើការ ឃុំខ្លួនបុរសម្នាក់ជាបណ្តោះអាសន្នពីបទ"ប្រទូស កេរខ្មាស មានស្ថានទម្ងន់ទោស" ដែលប្រព្រឹត្តនៅ ភូមិរាំងដេក ឃុំគគីរធំ ស្រុកកៀនស្វាយ ខេត្តកណ្តាល កាលពីថ្ងៃទី១២ តុលា ២០១៨ តាមមាត្រា២៤៧ នៃក្រមព្រហ្មទណ្ឌ។
ជនត្រូវចោទឈ្មោះ អ៊ួន រឿន ភេទប្រុស អាយុ៣២ឆ្នាំ ជនជាតិខ្មែរ មានទីលំនៅភូមិ ឃុំកើតហេតុខាងលើ មុខរបរកសិករ ត្រូវនគរបាលស្រុកកៀនស្វាយ ឃាត់ខ្លួនយោងតាមពាក្យបណ្តឹងរបស់អាណាព្យបាលកុមារីអាយុ៦ឆ្នាំម្នាក់ប្តឹងចោទប្រកាន់វិធីលួងលោមរំលោភសេពសន្ថវៈ។
កុមារីរងគ្រោះ ឈ្មោះឆ ក ម រ ន ជនជាតិខ្មែរ មានទីលំនៅភូមិ រាំងដេក ឃុំគគីរ
ធំ ស្រុកកៀនស្វាយ ខេត្តកណ្តាល។ នគរបាលស្រុកកៀនស្វាយបានអោយដឹងថា កាលពីថ្ងៃទី១២ខែតុលាឆ្នាំ២០១៨ ជនរងគ្រោះស្នាក់នៅជាមួយជីតានៅភូមិ ឃុំកើតហេតុ។ ចំណែក ជនសង្ស័យត្រូវជាអ៊ំរបស់ជនរងគ្រោះ បានមកសុំជនរងគ្រោះពីជីតាថា ឲ្យជនរងគ្រោះទៅដេកជាមួយ១យប់ ពេលនោះជីតាជនរងគ្រោះបានឯកភាពជនសង្ស័យបាន នាំជនរងគ្រោះមកដេកលើគ្រែពូករបស់ខ្លួនរួចប្រើវិធីលួងលោមរំលោភសេពសន្ថវៈរហូតបានសម្រេច។
លុះដល់ថ្ងៃទី១៣ តុលា ២០១៨ អ៊ំស្រីរបស់ជនរងគ្រោះឃើញជនរគ្រោះដេកមានការសង្ស័យក៏សួរនាំជនរងគ្រោះទើបដឹងថា ជនសង្ស័យបានធ្វើសកម្មភាពចាប់រំលោភក្មួយខ្លួនឯងមែនក៏ផ្តល់ដំណឹងទៅឪពុកម្តាយជនរងគ្រោះដែលទៅរកស៊ីនៅភ្នំពេញដាក់ពាក្យបណ្តឹងដល់សមត្ថកិច្ចអោយជួយអន្តរាគមន៍។
នគរបាលស្រុកកៀនស្វាយបញ្ជាក់ថា ក្រោយទទួលបានពាក្យបណ្តឹងកម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលគគីរធំឃាត់ខ្លួនជនសង្ស័យបាននៅវេលាម៉ោង៦និង០០នាទីថ្ងៃទី១៤ តុលា២០១៨បញ្ជូនមកអធិការដ្ឋាននគរបាលស្រុកដើម្បីបន្តចាត់ការតាមនីតិវិធី៕
Source: Kampuchea Thmey Daily
0 Comments