អង្គការក្រៅរដ្ឋាភិបាលមួយបាននិយាយនៅថ្ងៃសុក្រថា រដ្ឋាភិបាលនានាត្រូវតែផ្តល់ការវិនិយោគសំខាន់ៗក្នុងការកាត់បន្ថយហានិភ័យនៃគ្រោះទឹកជំនន់ដើម្បីជួយសង្គ្រោះទីក្រុងឆ្នេរសមុទ្រនៅជុំវិញពិភពលោកខណៈដែលការកើនឡើងនៃទឹកសមុទ្រនិងតំបន់ទីក្រុងដែលកំពុងជន់លិចបានបង្កការគំរាមកំហែងមិនធ្លាប់មានពីមុនមកដល់ផ្ទះរាប់លានខ្នង។
ទីក្រុងនានាដូចជាហ្សាការតាដែលបានលិច២៥សង់ទីម៉ែត្រជារៀងរាល់ឆ្នាំ, ទីក្រុងបាងកក, ហ៊ូស្តុននិងស៊ាងហៃកំពុងប្រឈមនឹងការជន់លិចក្នុងរយៈពេលប៉ុន្មានទសវត្សរ៍ទៀតដោយសារតែការធ្វើផែនការមិនល្អ ព្យុះកំណាចនិងជំនោរខ្ពស់បានបង្កការបំផ្លិចបំផ្លាញ។
អង្គការសប្បុរសធម៌ Christian Aid ដែលមានមូលដ្ឋាននៅទីក្រុងឡុងដ៍បានសិក្សាលើទីក្រុងឆ្នេរសមុទ្រចំនួន៨នៅជុំវិញពិភពលោកដែលកំពុងលិច។
Kat Kramer អ្នកដឹកនាំផ្នែកអាកាសធាតុនៅអង្គការ Christian Aid បានប្រាប់ AFP ថា “ផលប៉ះពាល់នៃការប្រែប្រួលអាកាសធាតុនឹងត្រូវបានគេឃើញនៅទូទាំងពិភពលោកហើយដូចដែលអ្នកបានឃើញនៅរដូវក្តៅនេះអញ្ចឹង យើងក្តៅណាស់នៅអឌ្ឍគោលខាងជើង។ ទីក្រុងធំៗជាច្រើននៅក្នុងប្រទេសកំពុងអភិវឌ្ឍគឺងាយរងគ្រោះខ្លាំងបំផុតចំពោះការប្រែប្រួលអាកាសធាតុ។ នេះជាមូលហេតុដ៏សំខាន់ដែលពួកគេត្រូវផ្តល់ការគាំទ្រដើម្បីសម្របខ្លួននិងកសាងភាពធន់ទ្រាំ”។
Kramer បន្ថែមថា “ជីវិតកំពុងបាត់បង់រួចទៅហើយដោយព្រឹត្តិការណ៍អាកាសធាតុអាក្រក់”។
ការអំពាវនាវនេះគឺស្របគ្នាជាមួយនឹងការចេញផ្សាយរបាយការណ៍របស់អង្គការសហប្រជាជាតិនៅសប្តាហ៍ក្រោយដែលគេរំពឹងថានឹងជំរុញឲ្យរដ្ឋាភិបាលនានាបង្កើនកិច្ចខិតខំប្រឹងប្រែងរបស់ខ្លួនដើម្បីកំណត់ការកើនឡើងនៃសីតុណ្ហភាពសកល។
ឯកសារថ្ងៃព្រហស្បតិ៍បានកំណត់យកទីក្រុងហ្សាការតា បាងកក ឡាហ្គោស ម៉ានីល ដាកា ស៊ាងហៃ ហ៊ូស្តុននិងឡុងដ៍ដែលបូកចូលគ្នាមានប្រជាជនសរុបជាង១០០លាននាក់ថាជាទីក្រុងដែលប្រឈមនឹងហានិភ័យជាពិសេស។
អង្គការនេះបានគូសបញ្ជាក់ពីកត្តាមូលដ្ឋានជាច្រើនដែលរួមចំណែកដល់ការលិចលង់ដែលភាគច្រើនបង្កឡើងដោយមនុស្ស៕ AFP
Source: Kampuchea Thmey Daily
0 Comments