គ្រូបង្វឹក​ជនជាតិ​អេ​ស្ប៉ា​ញ​របស់​ក្រុម​ខេ​ម​បូ​ឌា​ន​ថា​យ​ហ្គឺ​រ ត្រឡប់​ទៅលេង​ស្រុកកំណើត​មួយរយៈ​ក្រោយ​ចប់​រដូវ​កាល

លោក Oriol Mohedano ជនជាតិ​អេ​ស្ប៉ា​ញ ដែលជា​គ្រូបង្វឹក​ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Cambodian Tiger FC) សមាជិក​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League 2018) បានធ្វើ​ដំណើរ​ត្រឡប់​ទៅលេង​ស្រុកកំណើត​មួយរយៈ​ ក្រោយ​បញ្ចប់​យុទ្ធនាកា​ក្នុង​រដូវ​កាល​ឆ្នាំ២០១៨​នេះ​មុន​រដូវ​កាល​ថ្មី​មកដល់​។

​លោក Oriol Mohedano មាន​ស្រុកកំណើត​នៅឯ​ទីក្រុង Barcelona ប្រទេស អេ​ស្ប៉ា​ញ។ បច្ចុប្បន្ន​លោក​មាន​វ័យ ៣១ ឆ្នាំ និង​ជា​គ្រូ​ដែល​កាន់​អាជ្ញាប័ណ្ណ UEFA A-License ជាមួយនឹង​បទពិសោធន៍​ជាច្រើន​នៅ​ប្រទេស​ប្រទេស​អេ​ស្ប៉ា​ញ​, ស្វី​ស និង ហ្វាំ​ង​ឡង់​ផងដែរ មុន​មកកាន់​ដំណែង​នៅ​ទ្វីបអាស៊ី​ជា​លើកដំបូង​ជាមួយ​ជាមួយ​ក្លិប​ភ្នំពេញ​ក្រោ​ន កាលពី​រដូវ​កាល​ឆ្នាំ​២០១៦​។



ក្រោយ​ចេញដំណើរ​នៅ​ល្ងាច​ថ្ងៃ​ព្រ​ហ​ស្បតិ៍ ទី​៤ ខែតុលា ឆ្នាំ ២០១៨ ថ្មីៗ​នេះ​តាម​ច្រក​អាកាស​យាន្ត​ដ្ឋា​ន​អន្តរជាតិ​ភ្នំពេញ លោក Oriol បាន​លើកឡើងថា​៖«​ជួបគ្នា​ឆាប់ៗ​ណា ក្នុង​ពេល​សម្រាក​នេះ​ខ្ញុំ​នឹក​ក្រុម​ទាំងមូល អ្នកគាំទ្រ និង​ប្រទេស​កម្ពុជា​។ ជួបគ្នា​ឆាប់ៗ​នៅពេល​ខាងមុខ​ណា»។ បុរស​ជនជាតិ​អេ​ស្ប៉ា​ញ​រូប​នេះ​ បាន​ធ្វើ​ដំណើរ​មក​ដឹកនាំ​ក្រុម​ខេ​ម​បូ​ឌា​ន​ថា​យ​ហ្គឺ​រ កាលពី​ខែមេសា ឆ្នាំ​២០១៧ កន្លងទៅ​ទៅ​ជំនួស​លោក Kenichi Yatsuhashi ជា​ជនជាតិ​ជប៉ុន គ្រូបង្វឹក​ចាស់​ដែល​ចាកចេញ​។



ក្រុម​ខេ​ម​បូ​ឌា​ន​ថា​យ​ហ្គឺ​រ ដែលមាន​ប្រធាន​ក្លិប​ជនជាតិ​ជប៉ុន បាន​បញ្ចប់​រដូវ​កាល​របស់​ខ្លួន​ក្នុង​លី​គ​កំពូល​កម្ពុជា ត្រឹម​ចំណាត់ថ្នាក់​លេខ​៨ ក្នុងចំណោម​ក្លិប​ទាំង​១២​នៅ​លី​គ​កំពូល​ល​កម្ពុជា រដូវ​កាល​នេះ ក្រោយ​ប្រកួត​បាន​២២​លើក ឈ្នះ​៧​លើក ស្មើ​បាន​៧​លើក និង​ចាញ់​៨​លើក មាន​២៨​ពិន្ទុ​ក្នុង​ដៃ​។ ចំណែក​ក្នុង​ពានរង្វាន់​សម្តេច​តេ​ជោ ហ៊ុន សែន វិញ​ក្រុម​នេះ​បាន​ធ្លាក់​ចេញ​ត្រឹម​វគ្គ​ពាក់កណ្ដាល​ផ្តាច់ព្រ័ត្រ ក្រោយ​ចាញ់​ក្រុមបាល់ទាត់​អគ្គីសនី​កម្ពុជា ២​ទល់​០​។

លោក Oriol កំពុងកាន់​អាជ្ញា​ប័​ណ្ឌ UEFA A-License ពេល​លោក​ធ្វើជា​គ្រូបង្វឹក​នៅ​ក្លិប​មួយ​នៅ​ប្រទេស​អេ​ស្ប៉ា​ញ​។ លោក​ធ្លាប់​ដឹកនាំ​ក្រុម Servette FC នៅ គ្រូ​ជំនួយ​ក្លិប​FC Legirus Inter នៅ​ប្រទេស ហ្វាំ​ង​ឡង់ មុននឹង​ចូលរួម​ជាមួយ​ក្លិប​ភ្នំពេញ​ក្រោ​ន នៅ​ឆ្នាំ​២០១៦​។ ក្រោយ​ចេញពី​កម្ពុជា លោក​បាន​ទៅធ្វើជា​ជំនួយ​គ្រូ​បង្គោល​ក្លិប SJK នៅ​ប្រទេស​ហ្វាំ​ង​ឡង់ បន្តទៅ​ចូលរួម​ក្លិប​Servette FC នៅ​ប្រទេស​ស្វី​ស មុន​ត្រឡប់មក​ចូលរួម​ជាមួយ​ក្រុម​ខេ​ម​បូ​ឌា​ន​ថា​យ​ហ្គឺ​រ នេះ​៕

Source: Kampuchea Thmey Daily