គយ​នូ​វែ​ល​ហ្សេ​ឡង់​ទទួលបាន​អំណាច​ដើម្បី​ទាមទារ​លេខ​កូដ​ឧបករណ៍​អេឡិចត្រូនិក

ក្រុម​ឃ្លាំមើល​សិ​ទិ្ធ​ស៊ីវិល​របស់​ប្រទេស​នូ​វែ​ល​ហ្សេ​ឡង់​បានលើកឡើង​ក្តី​ព្រួយបារម្ភ​អំពី​ច្បាប់​ថ្មី​ដែល​អនុញ្ញាត​ឲ្យ​មន្ត្រី​គយ​ទាមទារ​លេខ​កូដ​សម្រាប់​ឧបករណ៍​អេឡិចត្រូនិក​ដូចជា​កុំព្យូទ័រ​យួរដៃ​ឬ​ទូរស័ព្ទ​ចល័ត​ជាដើម​នៅតាម​ព្រំដែន​។​

ការខកខាន​មិនបាន​ធ្វើតាម​បទបញ្ជា​ដែល​គេ​ហៅថា “​ច្បាប់​ឆែកឆេរ​ឌីជីថល​” នេះ​ដែល​បាន​ចូល​ជាធរ​មាននៅ​សប្តាហ៍​នេះ​អាច​នាំ​ឲ្យ​មានការ​ពិន័យ​ជា​ប្រាក់​ចំនួន​៥,០០០​ដុល្លារ​នូ​វែ​ល​ហ្សេ​ឡង់ (៣,២៤០​ដុល្លារ​អាមេរិក​) រួមបញ្ចូល​ទាំង​ការ​រឹបអូស​និង​ការបំផ្លាញ​ឧបករណ៍​ផងដែរ​។​
​ទោះបីជា​យ៉ាងណាក៏ដោយ ក្រុមប្រឹក្សា​សេរីភាព​ស៊ីវិល​នូ​វែ​ល​ហ្សេ​ឡង់​បាន​ពិពណ៌នា​អំណាច​នេះ​ថា “​ហួសហេតុ​ពេក​” និង​មិន​សមាមាត្រ​។​

ប្រធាន​ក្រុមប្រឹក្សា​នេះ​លោក Thomas Beagle បាន​និយាយថា វា​ជាការ​ឈ្លានពាន​ដ៏​ហួសហេតុ​មួយ​លើ​ភាពជា​ឯកជន​ដើម្បី​ផ្តល់​ឲ្យ​មន្ត្រី​គយ​នូវ​លទ្ធភាព​ទទួលបាន​ព័ត៌មាន​លើ​ស្មា​ត​ហ្វូ​ន​ដែល​អាច​រាប់បញ្ចូល​ទាំង​ទិន្នន័យ​នានា​ដូចជា កំណត់ត្រា​វេជ្ជសាស្ត្រ អ៊ីមែល​និង​សំបុត្រ​ផងដែរ​។​
​មន្ត្រី​គយ​ត្រូវមាន​មូលហេតុ​សម​ហេតុផល​ដើម្បី​សង្ស័យថា មាន​បទល្មើស​ត្រូវបាន​ប្រព្រឹត្ត​។​

យ៉ាងណាក្តី លោក Beagle បាន​និយាយថា ប៉ូលិស​និង​សេវា​ស៊ើបការណ៍​សម្ងាត់​ត្រូវ​ប្រឈម​នឹង​ឧបសគ្គ​កាន់តែ​តឹងតែង​មុនពេល​ពួកគេ​អាច​ទាមទារ​លេខ​កូដ​បាន​។​

លោក​បាន​និយាយថា “​ភាព​ពិត​នៃ​ច្បាប់​នេះ​គឺថា វា​ផ្តល់​ឲ្យ​គយ​នូវ​អំណាច​ដើម្បី​ចាប់យក​និង​បង្ខំ​ឲ្យ​ដោះ​សោ​ទូរស័ព្ទ​ទំនើប​របស់​មនុស្ស​ទាំង​ដោយ​គ្មាន​យុត្តិកម្ម​ឬ​ការ​អង្វរករ​”​។​

គយ​នូ​វែ​ល​ហ្សេ​ឡង់​បាន​និយាយថា មន្ត្រី​នៅក្នុង​ប្រទេស​ជាច្រើន​អាច​ទាមទារ​ឲ្យ​មានការ​ចូល​មើល​ឧបករណ៍​អេឡិចត្រូនិក​ប៉ុន្តែ​ច្បាប់​ថ្មី​នេះ​ត្រូវបាន​គេ​ជឿថា​គឺជា​លើកដំបូង​ហើយ​ដែល​ការផ្តល់​លេខ​កូដ​ត្រូវបាន​បញ្ជាក់​យ៉ាងច្បាស់​នៅក្នុង​ច្បាប់​មួយ​។​

អ្នកនាំពាក្យ​គយ​លោក Terry Brown បាន​និយាយថា នូ​វែ​ល​ហ្សេ​ឡង់​បាន​ស្វាគមន៍​ភ្ញៀវទេសចរ​អន្ដរជាតិ​ចំនួន​៦.៦​លាន​នាក់​នៅ​ឆ្នាំ​២០១៧​ហើយ​បាន​ឆែកឆេរ​ឧបករណ៍​អេឡិចត្រូនិក​ត្រឹមតែ​៥៣៧​គ្រឿង​ប៉ុណ្ណោះ​៕ AFP

​

Source: Kampuchea Thmey Daily