កោះ​តៃវ៉ាន់​ស៊ើបអង្កេត​គ្រោះថ្នាក់​រថភ្លើង ​ដែល​សម្លាប់​មនុស្ស​១៨​នាក់

ប្រធានាធិបតី​តៃវ៉ាន់​បាន​ជំរុញ​ឲ្យ​មានការ​ស៊ើបអង្កេត​យ៉ាង​ឆាប់រហ័ស​មួយ​កាលពី​ថ្ងៃ​ចន្ទ​ បន្ទាប់ពី​រថភ្លើង​ល្បឿន​លឿន Puyuma Express រត់​ធ្លាក់​ផ្លូវ​ដោយ បាន​សម្លាប់​មនុស្ស​ចំនួន​១៨​នាក់​។​

គ្រោះថ្នាក់​នៅលើ​ផ្លូវ​ឆ្នេរសមុទ្រ​ភាគ​ខាងកើត​ដ៏​មាន​ប្រជាប្រិយ​មួយ​នេះ​បាន​បង្ក​របួស​មនុស្ស ១៨៧​នាក់​កាលពី​ថ្ងៃអាទិត្យ​នៅក្នុង​គ្រោះថ្នាក់​ផ្លូវដែក​ដ៏​អាក្រក់​បំផុត​របស់​កោះ​នេះ​ក្នុង​រយៈពេល​២៥​ឆ្នាំ​។​
​
ក្នុងចំណោម​អ្នកស្លាប់ អ្នក​ដែលមាន​វ័យក្មេង​បំផុត​គឺមាន​អាយុ​៩​ឆ្នាំ​។ យោងតាម​ក្រសួង​គមនាគមន៍​បាន​ឲ្យ​ដឹងថា សិស្ស​ពីរ​នាក់​ដែលមាន​អាយុ​១២​និង​១៣​ឆ្នាំ​មកពី​វិទ្យាល័យ​មួយ​ក្នុង​ទីក្រុង Taitung ក៏បាន​ស្លាប់​ផងដែរ​។​
​
លោកស្រី​ប្រធានាធិបតី Tsai Ing-wen បាន​ប្រាប់​ក្រុមអ្នកកាសែត​នៅពេល​លោកស្រី​ទៅដល់​កន្លែងកើតហេតុ​កាលពី​ថ្ងៃ​ចន្ទ​ថា “​មនុស្ស​គ្រប់រូប​មានការ​ព្រួយបារម្ភ​អំពី​មូលហេតុ​នៃ​ឧបទ្ទវហេតុ​នេះហើយ​ខ្ញុំ​បានស្នើ​សុំ​ឲ្យ​រដ្ឋអាជ្ញា​ធ្វើការ​បញ្ជាក់​ពី​ស្ថានភាព​នេះ​”​។​
​
រដ្ឋអាជ្ញា Chiang Jen-yu បាន​និយាយ​ខណៈ​ក្រុម​អ្នកស៊ើប​អង្កេត​ស្វែងរក​ភស្តុតាង​ថា “​ក្រុមការងារ​ពិសេស​និង​អង្គភាព​នីតិកម្ម​នឹង​កំណត់ថា​តើ​គ្រោះថ្នាក់​នេះ​គឺជា​ឧបទ្ទវហេតុ​ឬ​កំហុសឆ្គង​របស់​មនុស្ស​”​។​
​
មន្ត្រី​ម្នាក់​មកពី​រដ្ឋបាល​ផ្លូវដែក​តៃវ៉ាន់​បាន​និយាយថា អ្នកបើកបរ​រថភ្លើង​បាន​រាយការណ៍​ថា ឧបករណ៍​សម្ពាធ​ដែល​ប្រើ​សម្រាប់​ចាប់​ហ្វ្រាំង​គឺមាន​ភាពមិនប្រក្រតី​៣០​នាទី​មុនពេល​គ្រោះថ្នាក់​នេះ​កើតឡើង​ប៉ុន្តែ​ថា វា​មិនគួរ​បណ្តាល​ឲ្យ​រថភ្លើង​ទៅ​លឿន​ពេក​នោះទេ​។​
​
ក្រុមមន្ត្រី​បាន​និយាយ​កាលពី​ថ្ងៃ​ចន្ទ​ថា ការស្វែងរក​ជនរងគ្រោះ​បានបញ្ចប់​នៅ​កន្លែងកើតហេតុ​ក្នុង​តំបន់​ភាគ​ឦសាន Yilan ហើយ​ថា គ្មាន​អ្នកដំណើរ​បន្ថែមទៀត​ត្រូវបាន​គេ​រកឃើញ​នៅក្នុង​ទូរ​រថភ្លើង​នោះទេ​។​
​
ឡានស្ទូច​ត្រូវបាន​គេ​នាំ​ចូលទៅ​កន្លែងកើតហេតុ​ទាំងយប់​ដើម្បី​ស្ទូច​រថភ្លើង Puyuma Express ចេញពី​ផ្លូវដែក​។ ទូរ​រថភ្លើង​ទាំង​៨​បាន​ធ្លាក់​ផ្លូវ​។​
​
លោក Tsai បាន​ថ្លែងថា “​នៅពេល​ដ៏​លំបាក​នេះ សូម​ឲ្យ​យើងទាំងអស់គ្នា​អធិស្ឋាន​សម្រាប់​អ្នករងរបួស​ហើយ​សង្ឃឹមថា អ្នកស្លាប់​នឹង​ទៅកាន់​សុគតិភព​”​។​
​
ហេតុការណ៍​នេះ​គឺជា​គ្រោះថ្នាក់​ផ្លូវដែក​ដ៏​អាក្រក់​បំផុត​នៅ​កោះ​តៃវ៉ាន់​ចាប់តាំងពី​ឆ្នាំ​១៩៩១​មក នៅពេល​អ្នកដំណើរ​៣០​នាក់​បាន​ស្លាប់​និង​១១២​នាក់​រងរបួស​បន្ទាប់​ពី​រថភ្លើង​ពីរ​គ្រឿង​បុក​គ្នា​ក្នុង​ទីក្រុង Miaoli នៅ​ភាគ​ខាងលិច​កោះ​តៃវ៉ាន់​៕ AFP

​

Source: Kampuchea Thmey Daily