ភ្នំពេញ ៖ អ្នកដែលបើកបរគោរពច្បាប់ចរាចរណ៍បានធ្វើការរិះគន់ទៅលើអ្នកដំណើរដទៃទៀតដែលមិនគោរពច្បាប់ចរាចរណ៍។
ជាក់ស្តែងនៅក្នុងរូបភាពខាងលើនេះ គឺគេបានឃើញម៉ូតូ៣គ្រឿងនេះ បានឈប់លើគំនូសសំរាប់អ្នកថ្មើរជើងឆ្លងកាត់ហើយក្នុងនោះមានមន្ត្រីសមត្ថកិច្ចយោធាមួយរូបអត់ពាក់មួកការពារសុវត្ថិភាពថែមទៀតផង។
បងប្រុសម្នាក់បាននិយាយថា តើដល់ពេលណាទើបអ្នកបើកបរទាំងឡាយនាំគ្នាគោរពច្បាប់ចរាចរណ៍ ហើយបើឈប់លើគំនូសបែបនេះគឺនគរបាលចរាចរណ៍មានសិទ្ធិផាកពិន័យប៉ុន្តែប៉ះចំនគរបាលស្លូតទើបអ្នកល្មើសច្បាប់នៅតែបន្តខុសរហូតទៅ។
ទាក់ទិនទៅនឹងករណីល្មើសច្បាប់ចរាចរណ៍នេះលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅទទួលបន្ទុកសណ្តាប់ធ្នាប់ចរាចរណ៍បានឲ្យកម្ពុជាថ្មីដឹងថា រាល់ថ្ងៃនេះកម្លាំងនគរបាលរបស់បានចុះឃាត់ចាប់អ្នកបើកបរមិនគោរពច្បាប់ចរាចរណ៍ មិនតិចជាង៥០នាក់នោះទេ។ អ្នកបើកបរដែលមិនគោរពច្បាប់នេះភាគច្រើនបើកបរបញ្ច្រាសទិសនិងមិនពាក់មួកការពារសុវត្ថិភាព។
លោកអធិការងបានបន្តថា អ្នកបើកបរដែលមិនគោរពច្បាប់គឺភាគច្រើនជាក្មេងស្ទាវនិងស្ត្រីតែក្នុងនោះអ្នកគោរពច្បាប់ គឺមានច្រើន។ ចំពោះអ្នកបើកបរបញ្ច្រាសទិសច្រើនតែពេលកកស្ទះចរាចរណ៍ម្តងៗគឺអ្នកបើកបរម៉ូតូនាំគ្នាជិះបញ្ច្រាសដែលបង្កឲ្យកាន់តែកកស្ទះចរាចរណ៍បន្ថែមទៀត។
លោកអធិការរងបានឲ្យដឹងថា ចាប់តាំងពីថ្ងៃកាន់បិណ្ឌ១រហូតមកដល់បិណ្ឌ៩នេះគឺក្នុងទឹកដីខណ្ឌច្បារអំពៅពុំមានជួបករណីគ្រោះថ្នាក់ចរាចរណ៍រហូតដល់បាត់បង់ជីវិតនោះឡើយ គឺគ្រាន់តែរងរបួសហើយករណីគ្រោះថ្នាក់នេះផ្តើមចេញពីអ្នកបើកបរមានជាតិស្រវឹង៕
Source: Kampuchea Thmey Daily
0 Comments