គ​.​ជ​.​ប បង្ហាញ​លទ្ធផល​បណ្ដោះអាសន្ន នៃ​ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត​ឆ្នាំ​២០១៨

ភ្នំពេញ ​៖ គណៈកម្មាធិការ​ជាតិ​រៀបចំ​ការបោះឆ្នោត គ​.​ជ​.​ប នៅ​ថ្ងៃទី​០៥ ខែតុលា ឆ្នាំ​២០១៨​នេះ បង្ហាញ​លទ្ធផល​បណ្ដោះអាសន្ន នៃ​ការពិនិត្យ​បញ្ជី​ឈ្មោះ និង​ការ​ចុះឈ្មោះ​បោះឆ្នោត ឆ្នាំ​២០១៨ សម្រាប់​ថ្ងៃទី​៤ ខែតុលា ឆ្នាំ​២០១៨ ក្នុង​នៅ​ក្របខ័ណ្ឌ​ទូទាំង​ប្រទេស​ប្រជាពលរដ្ឋ​អញ្ជើញ​ទៅ​ចុះឈ្មោះ​បោះឆ្នោត​ថ្មី​មាន​ចំនួន​៩,៩១៩​នាក់​។



សម្រាប់​រយៈពេល​៤​ថ្ងៃនេះ ចាប់ពី​ផ្តើម​ចុះឈ្មោះ តួលេខ​នៃ​អ្នក​ចុះឈ្មោះ​បោះឆ្នោត​ថ្មី មាន​ចំនួន​២៨,៤៣២​នាក់ ហើយ​អ្នក​ដែល​បាន​លុប​ចេញពី​បញ្ជី​មាន​ចំនួន​៣,៦៦៧​នាក់ និង​អ្នក​ដែល​បានកែតម្រូវ​ទិន្នន័យ​មាន​ចំនួន​២៩៩​នាក់​។ គ​.​ជ​.​ប បាន​បញ្ជាក់ថា ប្រជាពលរដ្ឋ​អាច​ចូល​ទៅ​កាន់​គេហទំព័រ www.necelect.org.kh ដើម្បី​ពិនិត្យមើល​តារាង​សម្អិត ប្រចាំថ្ងៃ​នៃ​ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត​។



ចំណែក​ប្រជាពលរដ្ឋ ដែលមាន​ឈ្មោះ​ក្នុង​បញ្ជី​បោះឆ្នោត ឆ្នាំ​២០១៧ អាច​ទៅ​ពិនិត្យ​បញ្ជី​ឈ្មោះ​បោះឆ្នោត​នៅ​លើ​គេហទំព័រ គ​.​ជ​.​ប www.voterlist.org.kh និង​តាមរយៈ​កម្មវិធី​ទូរស័ព្ទ​ដៃ Voterlist KH (app)​។ ជាមួយគ្នា​នោះ គ​.​ជ​.​ប បាន​អំពាវនាវ​ឲ្យ​ប្រជាពលរដ្ឋ​ទៅ​ចុះឈ្មោះ ពិនិត្យ​បញ្ជី​ឈ្មោះ និង​កែ​ទិន្នន័យ​ផងដែរ ប្រសិនបើ​មាន​កំហុសឆ្គង​។



សូម​ជម្រាប​ថា ការពិនិត្យ​បញ្ជី​ឈ្មោះ និង​ការចុះឈ្មោះ​បោះឆ្នោត ឆ្នាំ​២០១៨ ត្រូវ​បាន​ប្រព្រឹត្តទៅ​ចាប់ពី​ថ្ងៃទី​០១ ដល់​ថ្ងៃទី​១៨ ខែតុលា ឆ្នាំ​២០១៨ នៅតាម​សាលាឃុំ​សង្កាត់ និង​នៅ​តាម​ភូមិ​មួយចំនួន​ក្នុង​ឃុំ សង្កាត់​ទូទាំងប្រទេស​៕

Source: Kampuchea Thmey Daily