ភ្នំពេញ ៖ សម្តេចតេជោនាយករដ្ឋមន្ត្រីហ៊ុន សែន បានប្រកាសលុបចោលការសិក្សាបង្កើតខេត្តថ្មីចំនួនពីរបន្ថែមទៀតដែលបំបែកចេញពីខេត្តកណ្តាលនិងមណ្ឌលគីរី ហើយសម្តេចក៏បានឲ្យទីស្ដីការគណៈរដ្ឋមន្ត្រីធ្វើនិរាករណ៍ចោលទាំងអស់នូវអ្វីដែលបានប្រកាសអំពីការបង្កើតខេត្តថ្មីពីរបន្ថែម។
ការថ្លែងរបស់សម្តេចនាយករដ្ឋមន្ត្រី បែបនេះបានធ្វើឡើងនៅក្នុងទិវាគ្រូបង្រៀនពិភពលោក កាលពីព្រឹកថ្ងៃទី៥ ខែតុលានេះនៅវិទ្យាស្ថានជាតិអប់រំ។ សម្តេចតេជោបានថ្លែងថា កាលពីម្សិលមិញ(៤តុលា)សម្តេចបានទូរស័ព្ទទៅសម្តេចក្រឡាហោម ស ខេង មុនថាថ្ងៃនេះខ្ញុំឲ្យបញ្ចប់ការសិក្សាបែងចែកខេត្តកណ្ដាលនិងខេត្តមណ្ឌលគិរីទាំងអស់។សម្តេចបានបញ្ជាក់ថាគ្មានការបង្កើតខេត្តថ្មីទៀតទេ។
សម្តេចតេជោនាយករដ្ឋមន្ត្រីមានប្រសាសន៍ថា «ហេតុអី?កាលពេលយើងបង្កើតខេត្តត្បូងឃ្មុំនោះ គឺវាស្ងាត់ជ្រាបរហូតដល់ចេញព្រះរាជក្រឹត្យបង្កើតខេត្ត។ ក៏ប៉ុន្តែលើកនេះចំណារយល់ព្រមពីនាយករដ្ឋមន្ត្រីមក បែកចេញអស់រលីង... បើនិយាយពីគណបក្សខេត្តកណ្តាលវិញគឺត្រូវធ្ងន់តែម្តង គេសរសេរក្នុងនាមគណបក្សហើយចុះហត្ថលេខា...ឲ្យអ្នកណាធ្វើចៅហ្វាយខេត្តថ្មី។ ចំណារត្រឡប់ទៅវិញអក្សរក្រហម ប្រញាប់ងាប់ទៅណា?... ឯងមិនទាន់ទាំងធ្វើស្អីផង មិនទាន់ទាំងសម្រេចបង្កើត ឬមិនបង្កើតផង វាចែកគ្នាធ្វើចៅហ្វាយខេត្ត ធ្វើអនុខេត្តទៅហើយ។ ឥឡូវនេះរាលដាលដល់ស្ថាប័នព្រោះបើត្រូវធ្វើ ធ្វើឲ្យបានមុនបោះឆ្នោត... ។ ឥឡូវឈប់នៅឲ្យស្ងៀមបានហើយ មហាផ្ទៃបិទកុំព្យូទ័រចោលឲ្យអស់ថ្ងៃនេះ កុំធ្វើអ្វីបន្តទៅទៀត ខ្ញុំគ្មានពេលស៊ីញ៉េគ្មានពេលអីទៀតទេ ។ រួចហើយមន្ត្រីទីស្តីការគណៈរដ្ឋមន្ត្រីយកសេចក្តីប្រកាសរបស់ខ្ញុំថ្ងៃនេះ(៥ តុលា) ចេញស.ជ.ណ មួយបញ្ចប់តែម្តងទៅ ...។ ថ្ងៃនេះមិនចាំបាច់ ខេង (សម្តេចក្រឡាហោមសខេង)យកទៅឲ្យខ្ញុំស៊ីញ៉េទេយកសេចក្តីប្រកាសរបស់នាយករដ្ឋមន្ត្រីនៅព្រឹកថ្ងៃទី៥ខែតុលានេះចេញស.ជ.ណ បញ្ចប់ការស្រាវជ្រាវលើការបែងចែកខេត្តកណ្តាលនិងខេត្តមណ្ឌលគីរីឲ្យឆាប់ចប់»។
សម្តេចតេជោនាយករដ្ឋមន្ត្រីបានបន្តទៀតថា អាក្រុមខិលខូចមួយចំនួនដែលចាប់ផ្តើមផ្គូផ្គងហើយលុយនោះតាមយកត្រឡប់មកវិញ។ សម្តេចបន្តថា កុំបាច់យកហេតុផលបង្ខិតសេវាទៅជិតប្រជាជន បញ្ហាវានៅត្រង់ថាយើងធ្វើឬមិនធ្វើតែប៉ុណ្ណឹងទេ... ។ សម្តេចបន្តថា សម្តេចស្មានតែគេយល់ទៅធ្វើការស្រាវ ជ្រាវស្ងាត់ៗដូចការខេត្តត្បូងឃ្មុំ តែបែរជាយកទៅផ្សព្វផ្សាយមិនបាន ២៤ ម៉ោងផងបែកធ្លាយ ប៉ាតណា ប៉ាតណី... ។ ... វាបានក្លាយទៅជាសាច់ជ្រូកបីជាន់សម្រាប់អាមន្ត្រីខិលខូចទៅទៀត ហើយបើខេត្តកណ្តា លវាទៅម៉ាគណបក្សតែម្តង ...។ វាទៅជាឆ្កួតអស់តែម្តងទៅណាព្រោះវារាលដាលទៅដល់ស្ថាប័នផ្សេងៗ ប្រធានមន្ទីរ អនុប្រធានមន្ទីរ ...។
សូមជម្រាបថា ក្រសួងមហាផ្ទៃបានធ្វើលិខិតចុះថ្ងៃទី២៧ ខែសីហា ឆ្នាំ២០១៨ គោរពជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាស្នើសុំគោលការណ៍អនុញ្ញាតដ៏ខ្ពង់ខ្ពស់ដើម្បីសិក្សាលទ្ធភាពរៀបចំបង្កើតខេត្តថ្មីចំនួនពីរ។ ពាក់ព័ន្ធសំណើនេះសម្តេចតេជោ ហ៊ុន សែន បានយល់ព្រមអនុញ្ញាតឲ្យធ្វើការសិក្សាលទ្ធភាពក្នុងការរៀបចំបង្កើតខេត្តថ្មីពីរ ដោយខេត្តថ្មីទីមួយគឺបំបែកចេញពីខេត្តកណ្ដាល ចំណែកខេត្តមួយទៀតគឺដោយពិនិត្យលើកត្ដាភូមិសាស្ត្រនិងប្រជាសាស្ដ្ររបស់ស្រុកកោះញែកនៃខេត្តមណ្ឌលគិរីនិងស្រុកលំផាត់នៃខេត្តរតនគិរី។
សម្ដេចតេជោនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែសីហា ២០១៨ បានចារយល់ព្រមតាមសំណើរបស់ក្រសួងមហាផ្ទៃដើម្បីសិក្សាលទ្ធភាពរៀបចំបង្កើតខេត្តថ្មីចំនួន២ហើយ។ ប៉ុន្ដែដោយបែកធ្លាយបញ្ហារត់ការបែងចែកតំណែងតួនាទីគ្នាមុនការបង្កើតខេត្ដនោះ ទើបសម្ដេចសម្រេចលុបចោលវិញ។
ក្រសួងមហាផ្ទៃបានបញ្ជាក់ថា ការសិក្សាលទ្ធផលបង្កើតខេត្តថ្មីចំនួន២នេះគឺដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាលការថែរក្សាសន្ដិសុខសណ្ដាប់ធ្នាប់សាធារណៈ ការជំរុញអភិវឌ្ឍនៅមូលដ្ឋាននិងការផ្ដល់សេវាសាធារណៈឲ្យខិតជិតជូនប្រជាពលរដ្ឋ។
ក្នុងលិខិតនោះ បញ្ជាក់ទៀតថា ការរៀបចំសិក្សាលទ្ធភាពបង្កើតខេត្តនេះ នឹងធ្វើឲ្យចប់សព្វគ្រប់នៅខែមករា ឆ្នាំ២០១៩ ដើម្បីទុកពេលវេលាសមស្របសម្រាប់រាជរដ្ឋាភិបាលកំណត់ចំនួនអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៣ ដែលតាមអាណត្តិកំណត់ក្នុងច្បាប់ គឺក្នុងអំឡុងខែឧសភា ឆ្នាំ២០១៩ ខាងមុខ។
បន្ទាប់ពីការប្រកាសរបស់ប្រមុខរាជរដ្ឋាភិបាលមិនបានប៉ុន្មានម៉ោងផង ទីស្តីការគណៈរដ្ឋមន្ត្រីបានចេញ ស ជ ណ មួយសម្រេចបញ្ឈប់ការសិក្សាស្រាវជ្រាវបង្កើតខេត្តថ្មីដែលគ្រោងបំបែកចេញពីខេត្តកណ្តាល និងខេត្តមណ្ឌលគិរី-រតនគិរី។
នៅក្នុង ស.ជ.ណ របស់រាជរដ្ឋាភិបាលផ្ញើជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃទី០៥ ខែតុលា ឆ្នាំ២០១៨នេះបានបញ្ជាក់យ៉ាងដូច្នេះ «ទីស្តីការគណៈរដ្ឋមន្ត្រីសូមជម្រាបជូនសម្តេចក្រឡាហោម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃជ្រាប ចំពោះករណីស្នើសុំបង្កើតថ្មីចំនួន២ចេញពីខេត្តកណ្តាល ខេត្តមណ្ឌលគិរី និងខេត្តរតនគិរី រាជរដ្ឋាភិបាលសម្រេចបញ្ឈប់ការសិក្សាស្រាវជ្រាវចាប់ពីពេលនេះតទៅ»។
បើតាមប្រសាសន៍របស់សម្តេចតេជោ ហ៊ុន សែន ការសម្រេចលុបនេះដោយសារតែមានដំណើរការនៃការសិក្សាត្រូវបានទម្លាយឯកសារយ៉ាងព្រោងព្រាតផ្ទុយពីការសិក្សាបង្កើតខេត្តត្បូងឃ្មុំ។ មួយវិញទៀតគ្រាដែលខេត្តមិនទាន់ទាំងសម្រេចបង្កើត ឬយ៉ាងណាផងនោះ បែរជាមានអ្នករត់ការយកតំណែងគ្រប់គ្រងក្នុងខេត្តទាំងនេះ។ ការបញ្ឈប់ការស្រាវជ្រាវនេះក៏បានធ្វើឲ្យមេខ្យល់រត់ការឡើងតំណែងត្រូវប្រកាច់ស្អាតតែម្តងព្រោះត្រូវសងលុយទៅគេវិញ៕
Source: Kampuchea Thmey Daily
0 Comments