តាកែវ ៖ ជនសង្ស័យប្រើអំពើហិង្សាប៉ុនប៉ងសម្លាប់មនុស្សមួយករណី ត្រូវបានសមត្ថកិច្ចចាប់ខ្លួនកសាងសំណុំរឿងបញ្ជូនឡើងតុលាការ ក្រោយយកស្នចាប់ត្រីទៅចាក់ជនរងគ្រោះបណ្តាលឲ្យរងរបួសធ្ងន់។
ហេតុការណ៍នេះកើតឡើងនៅថ្ងៃទី១៤ ខែតុលា ឆ្នាំ២០១៨ វេលាម៉ោង១៣និង១០នាទី ស្ថិតនៅភូមិកំពង់លាវ ឃុំកំពង់រាប ស្រុកព្រៃកប្បាស ខេត្តតាកែវ ដែលបង្កឡើងដោយជនសង្ស័យឈ្មោះ ឃ្លោក ហួយ ភេទប្រុស អាយុ២៥ឆ្នាំ រស់នៅភូមិជំនីក ឃុំកំពង់រាប ស្រុកព្រៃកប្បាស។ ចំណែកជនរងគ្រោះដែលត្រូវជនសង្ស័យធ្វើសកម្មភាពយកស្នចាក់ត្រីចាក់នោះមានឈ្មោះ ឌឹម បូរី ភេទប្រុស អាយុ២៥ឆ្នាំ រស់នៅភូមិ-ឃុំកើតហេតុខាងលើ បណ្តាលឲ្យរងរបួសធ្ងន់ដោយត្រូវចំមុខខាងស្ដាំចំនួន០៣កន្លែង។ ក្រោយកើតហេតុភ្លាមកម្លាំងជំនាញនៃអធិការដ្ឋាននគរបាលស្រុកព្រៃកប្បាស សហការជាមួយកម្លាំងប៉ុស្ដិ៍នគរបាលរដ្ឋបាលកំពង់រាប ចុះអន្តរាគមន៍ ឃាត់ខ្លួនជនសង្ស័យខាងលើ ព្រមទាំងដកហូតវត្ថុតាងស្នចាក់ត្រីចំនួន០១ ដើម្បីកសាងសំណុំរឿងតាមនីតិវិធី។
ប៉ូលិសបានបញ្ជាក់ថា មូលហេតុដែលឈានដល់បង្កអំពើហិង្សាយ៉ាងធ្ងន់ធ្ងរនេះគឺបណ្តាលមកពីមានជម្លោះពេលស្រវឹងស្រា៕ វីរៈ
Source: Kampuchea Thmey Daily
0 Comments