កំពង់ស្ពឺ ៖ ប្រតិបត្តិការបង្ក្រាបមុខសញ្ញាគ្រឿងញៀនមួយសំបុកដ៏ធំ របស់សមត្ថកិច្ចនគរបាលស្រុកភ្នំស្រួច ស្ថិតនៅក្នុងឃុំត្រែងត្រយឹង ស្រុកភ្នំស្រួច ឃាត់ខ្លួនមនុស្ស១១នាក់ និងដកហូតវត្ថុតាងថ្នាំញៀន១២កញ្ចប់ រួមទាំងឧបករណ៍ពាក់ព័ន្ធជាច្រើនទៀត។
នគរបាលបានឲ្យដឹងថា ដោយអនុវត្តតាមបទបញ្ជា លោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ កម្លាំងសហការរួមមានផ្នែកសន្តិសុខជំនាញគ្រឿងញៀន ចុះដឹកនាំប្រតិបត្តិការបង្ក្រាបក្រុមមុខសញ្ញាផ្ដល់ទីតាំងចែកចាយជួញដូរសារធាតុញៀនខុសច្បាប់មួយសំបុក នៅចំណុចផ្ទះឈ្មោះ ហេង ឈាង ភេទស្រី មុខរបរ មិនពិតប្រាកដ កាលពីថ្ងៃអាទិត្យ ៤រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ២៥៦២ វេលាម៉ោង១៦និង០៥នាទី ស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច។
ក្នុងកិច្ចប្រតិបត្តិការខាងលើ សមត្ថកិច្ចធ្វើការឃាត់ខ្លួនមនុស្សចំនួន១១នាក់ ស្រី០២នាក់ រួមមាន ៖ ១-ឈ្មោះ សុខ ចិត្រា ភេទប្រុស អាយុ១៩ឆ្នាំ នៅភូមិថ្មី ឃុំចំបក់, ២-ឈ្មោះ សុខ គឹម ភេទប្រុស អាយុ ២៣ឆ្នាំ នៅភូមិថ្មី ឃុំចំបក់, ៣-ឈ្មោះ ប៊ូ វឿន ភេទប្រុស អាយុ៣០ឆ្នាំ នៅភូមិទី២ ឃុំត្រែងត្រយឹង, ៤-ឈ្មោះ រឹម សារិន ភេទប្រុស អាយុ៣១ឆ្នាំ នៅភូមិទី៤ ឃុំត្រែងត្រយឹង, ៥-ឈ្មោះ នៅ វ៉ាត ភេទប្រុស អាយុ២៣ឆ្នាំ នៅភូមិទី៣ ឃុំត្រែងត្រយឹង, ៦-ឈ្មោះ អេង សុគុន្ធី ភេទប្រុស អាយុ៣២ឆ្នាំ នៅភូមិទី១ ឃុំត្រែងត្រយឹង, ៧-ឈ្មោះ លួន បូរា ភេទប្រុស អាយុ៣៧ឆ្នាំ នៅភូមិទី៤ ឃុំត្រែងត្រយឹង, ៨-ឈ្មោះ ចាន់ រី ភេទប្រុស អាយុ៣៨ឆ្នាំ នៅភូមិទី៤ ឃុំត្រែងត្រយឹង, ៩-ឈ្មោះ ភេន សំភាស់ ភេទប្រុស អាយុ ២០ឆ្នាំ នៅភូមិទី៣ ឃុំត្រែងត្រយឹង, ១០-ឈ្មោះ ហេង ឈាង ភេទស្រី អាយុ ៣៤ឆ្នាំ នៅភូមិទី៤ ឃុំត្រែងត្រយឹង(ម្ចាស់ផ្ទះ)’ ១១-ឈ្មោះ សៀវ ហៀង ភេទស្រី អាយុ៣៥ឆ្នាំ នៅភូមិទី៤ ឃុំត្រែងត្រយឹង។
ចំណែកវត្ថុតាងដកហូតរួមមាន ៖ គ្រឿងញៀនចំនួន១២កញ្ចប់ ,ជញ្ជីងថ្លឹងគ្រឿងញៀន០១ ,ម៉ូតូម៉ាក០៦គ្រឿង, ទូរស័ព្ទដៃ០៦គ្រឿង ឧបករណ៍ប្រើប្រាស់ និងសម្ភារៈវេចខ្ចប់គ្រឿងញៀនមួយចំនួនទៀត។
នគរបាលបានបញ្ជាក់ថា ការបង្ក្រាបសំបុកធំនេះ គឺកម្លាំងជំនាញបានតាមដាន និងស៊ើបអង្កេតជាច្រើនថ្ងៃរហូតកំណត់បានមុខសញ្ញា និងទីតាំងច្បាស់លាស់ឈានដល់ការបង្ក្រាបតែម្តង។
បច្ចុប្បន្នមុខសញ្ញាពាក់ព័ន្ធទាំង១១នាក់ រួមជាមួយវត្ថុតាង កម្លាំងនគរបាលស្រុកបានកសាងសំណុំរឿងបញ្ជូនទៅការិយាល័យជំនាញប្រឆាំងគ្រឿងញៀនខេត្តចាត់ការតាមនីតិវិធី៕
Source: Kampuchea Thmey Daily
0 Comments