បាត់ដំបង ៖ ផ្លូវ១ខ្សែ ដែលស្ថិតនៅតាមបណ្តោយមាត់ស្ទឹងសង្កែត្រើយខាងកើត កំពុងជួបនឹងបញ្ហាយ៉ាងធ្ងន់ធ្ងរដោយសារការបាក់ស្រុតទាំងផែនតែម្តង ក្រោយពីទឹកជំនន់បានច្រោះផ្នែកខាងក្រោម ដែលបច្ចុប្បន្នសូម្បីតែការបើកបររថយន្តបើខ្វះការប្រុងប្រយ័ត្ន ក៏អាចបង្កឲ្យមានការកល់ទ្រូងផងដែរ ដោយសារតែការស្រុតដីកាន់តែជ្រៅបន្តិចម្តងៗ។
ការបាក់ស្រុតផ្លូវមួយកន្លែងនេះ គឺនៅត្រង់ចំណុចភូមិឡឥដ្ឋ សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបងតាមបណ្តោយដងស្ទឹងសង្កែ ត្រើយខាងកើត ដែលផ្លូវមួយខ្សែនេះ ក៏មានសារៈសំខាន់ណាស់ដែរ សម្រាប់ការធ្វើដំណើររបស់ប្រជាពលរដ្ឋ ព្រោះតាមបណ្តោយផ្លូវនេះ មានប្រជាពលរដ្ឋរស់នៅយ៉ាងច្រើនសន្ធឹកសន្ធាប់គឺមិនអាចខ្វះផ្លូវនេះបាន។
ថ្មីៗនេះ គេសង្កេតឃើញថា នៅត្រង់ចំណុចខាងលើ គឺមានការបាក់ស្រុកដីយ៉ាងធំ មានលក្ខណៈជាត្រីកោណដោយមានជម្រៅកាន់តែជ្រៅឡើងៗ ដែលអាចបង្កឲ្យមានគ្រោះថ្នាក់ដល់អ្នកធ្វើដំណើរបាន បើពួកគេបើកបរលឿននៅពេលយប់ ហើយខ្វះការប្រុងប្រយ័ត្ន។
នៅទីនោះដែរ ក៏គេសង្កេតឃើញផ្ទះ និងអាហារដ្ឋាន ដែលបានសាងសង់ឡើងនៅលើដីចំណីស្ទឹង ចំនួន ៣ ខ្នង ក៏ត្រូវបិទទ្វារដែរ ដោយសារតែដីស្រុតនោះបានទាញអោយផ្អៀងរកកល់និងធ្លាក់ចូលទៅក្នុងស្ទឹងសង្កែទៅហើយម្យ៉ាងទៀត បើអង្គភាពជំនាញគ្មានវិធានការទាន់ពេលវេលាទេនោះ ផ្លូវនេះអាចប្រឈមនិងគ្រោះថ្នាក់យ៉ាងធ្ងន់ធ្ងរជាក់ជាមិនខាន។
ប្រជាពលរដ្ឋជាច្រើនដែលរស់នៅតាមបណ្តោយដងស្ទឹងត្រើយខាងកើត ក៏បានសំណូមពរដល់មន្ទីរសាធារណការពិសេសគឺអាជ្ញាធរខេត្ត មេត្តាដាក់កម្លាំងជំនាញចុះពិនិត្យ និងសិក្សាលើបញ្ហានេះផង ដើម្បីមានវិធានការទប់ស្កាត់បានទាន់ពេលវេលា មុននឹងផ្លូវនេះបាក់ធ្លាក់ទៅក្នុងស្ទឹងសង្កែ៕
Source: Kampuchea Thmey Daily
0 Comments