ភ្នំពេញ ៖ ជនសង្ស័យម្នាក់ ក្នុងចំណោមបក្ខពួក៤នាក់ ក្រោយពីធ្វើសកម្មភាពឆក់ទូរស័ព្ទរបស់ជនបរទេសធ្វើដំណើរតាមម៉ូតូកង់បីបានសម្រេចហើយ ប៉ុន្តែរត់មិនរួច ត្រូវសមត្ថកិច្ចចាប់បាន កាលពីវេលាម៉ោង ១០និង៤០នាទីព្រឹក ថ្ងៃទី២៤ ខែតុលា ឆ្នាំ២០១៨ ស្ថិតនៅចំណុចមុខស្ដូបកម្ពុជា វៀតណាម ផ្លូវសុធារស ភូមិ២ សង្កាត់ចតុមុខ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យមានបក្ខពួកចំនួន៤នាក់ជិះម៉ូតូចំនួន៤គ្រឿង (ម្នាក់០១គ្រឿង) ដោយពេលនោះ ជនសង្ស័យម្នាក់ ដែលជិះម៉ូតូម៉ាក NEX ពណ៌ស បានធ្វើសកម្មភាពឆក់ទូរស័ព្ទដៃពីជនជាតិបារាំងម្នាក់ ភេទប្រុស អាយុ៣៣ឆ្នាំ ដែលកំពុងជិះម៉ូតូកង់បី (ម៉ូតូកង់បីឥណ្តា) បានសម្រេចហើយជនរងគ្រោះបានស្រែកឆោឡោ ហើយត្រូវបានកម្លាំងល្បាតរបស់ខណ្ឌដូនពេញ និងកម្លាំងល្បាតរបស់ប៉ុស្តិ៍ចតុមុខ រួមទាំងសណ្តាប់ធ្នាប់សាលាខណ្ឌដូនពេញ និងកម្លាំងការិយាល័យចរាចរណ៍ផ្លូវគោកដែលនៅក្បែរនោះឃើញហេតុការណ៍ ក៏បានដេញប្រផាប់ចាប់ប្រផីង បណ្តាលឲ្យជនសង្ស័យម្នាក់ ភ័យក៏ជិះម៉ូតូគេចខ្លួន ហើយបានដួលម៉ូតូ នៅចំណុចវង្វង់មូលវិមានឯករាជ្យ ផ្លូវសុរាម្រឹត ភូមិ៣ សង្កាត់ចតុមុខ ខណ្ឌដូនពេញ រាជធានីភ្នំពេញ បន្ទាប់មកកម្លាំងយើងបានអន្តរាគមន៍ភ្លាមៗ ដោយឃាត់ខ្លួនជនសង្ស័យម្នាក់ឈ្មោះលី ជីមី ភេទប្រុស អាយុ២៩ឆ្នាំដែលជាអ្នកជិះម៉ូតូបិទគូថ យកមកអធិការដ្ឋាននគរបាលខណ្ឌដូនពេញ ដើម្បីជៀសវាងកំហឹងប្រជាពលរដ្ឋ។ ចំណែកបក្ខពួកចំនួន០៣នាក់ទៀត ជិះម៉ូតូគេចខ្លួនដោយយកទូរស័ព្ទដៃ ដែលឆក់បានទៅជាមួយ។
សមត្ថកិច្ចបានឲ្យដឹងទៀតថា ជនសង្ស័យ ឈ្មោះ លី ជីមី ភេទប្រុស អាយុ២៩ឆ្នាំ មុខរបរមិនពិតប្រាកដ ស្នាក់នៅផ្ទះលេខ១២២អឺ៤ ផ្លូវលេខ១៣០ សង្កាត់ផ្សារកណ្តាលទី២ ខណ្ឌដូនពេញ រាជធានីភ្នំពេញ។ វត្ថុតាងចាប់យកបានម៉ូតូមួយគ្រឿងម៉ាក NEX ពណ៌ស ខ្មៅពាក់ស្លាកលេខ ភ្នំពេញ 1GP 8394។ ចំណែកជនរងគ្រោះ ឈ្មោះ DUS SART ភេទប្រុស អាយុ៣៣ឆ្នាំ ជនជាតិបារាំង មុខរបរទេសចរណ៍ កាន់លិខិតឆ្លងដែនលេខ 15F21787 ស្នាក់នៅណាហ្គា សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ និងសម្ភារបាត់បង់ ទូរស័ព្ទដៃមួយគ្រឿងម៉ាកអាយហ្វូន៨ ពណ៌ខ្មៅ (ត្រូវជនសង្ស័យជាបក្ខពួកយកជិះគេចខ្លួន)បាត់។
បច្ចុប្បន្នជនសង្ស័យដែលឃាត់ខ្លួនកំពុងកសាងសំណុំឯកសារចាត់ការតាមនីតិវិធី។ និងបក្ខពួកដែលនៅសេសសល់កំពុងតាមស្រាវជ្រាវចាប់ខ្លួនមកផ្តន្ទាទោសតាមផ្លូវច្បាប់៕
Source: Kampuchea Thmey Daily
0 Comments