អ្នក​សរសេរ​ប្លុក​ប្រឆាំង​វៀតណាម ​ធ្វើដំណើរ​ទៅ​អាមេរិក ​បន្ទាប់ពី​ត្រូវ​បាន​ដោះលែង

ប្រភព​នានា​បាន​ប្រាប់ AFP ថា អ្នក​សរសេរ​ប្លុក​ប្រឆាំង​វៀតណាម​ម្នាក់​ ដែល​ត្រូវ​បាន​គេ​ស្គាល់​ថា “Mother Mushroom” កំពុង​ធ្វើ​ដំណើរ​ដោយ​សេរីភាព​ទៅ​សហរដ្ឋអាមេរិក​កាលពី​ថ្ងៃ​ពុធ​ បន្ទាប់ពី​ត្រូវបាន​ដោះលែង​ពី​ពន្ធនាគារ​ ដែល​នាង​ត្រូវ​ជាប់​រយៈពេល​១០​ឆ្នាំ​សម្រាប់​ការឃោសនា​ប្រឆាំង​នឹង​រដ្ឋ។

វា​ជា​រឿង​ដ៏​កម្រ​សម្រាប់​អ្នក​ទោស​នយោបាយ​ដែល​ត្រូវបាន​ដោះលែង​ពី​ពន្ធនាគារ​មុនពេល​កំណត់​នៅក្នុង​ប្រទេស​វៀតណាម​ដែលជា​រដ្ឋ​ឯក​បក្ស​ហើយ​មេដឹកនាំ​អភិរក្ស​បានធ្វើការ​បង្ក្រាប​យ៉ាង​ឃោរឃៅ​ទៅលើ​អ្នក​រិះគន់​ក្នុង​រយៈពេល​ពីរ​ឆ្នាំ​កន្លងមកនេះ​ដែលជា​ហេតុ​បង្ក​កំហឹង​ពី​សម្ព័ន្ធមិត្ត​លោកខាងលិច​និង​ក្រុម​សិទ្ធិមនុស្ស​។​

ប៉ុន្តែ​ការដោះលែង​លោកស្រី Nguyen Ngoc Nhu Quynh បាន​កើតឡើង​ចំពេល​រដ្ឋមន្ត្រី​ការពារជាតិ​អាមេរិក​លោក Jim Mattis កំពុង​ធ្វើ​ទស្សនកិច្ច​ប្រទេស​វៀតណាម​។ វៀតណាម​ចង់​កសាង​ចំណងទាក់ទង​ជាមួយ​អតីត​សត្រូវ​របស់ខ្លួន​គឺ​ទីក្រុង​វ៉ាស៊ីនតោន​ព្រោះ​ខ្លួន​កំពុង​សម្លឹងមើល​ទាំង​ភ័យខ្លាច​ចំពោះ​ការកើនឡើង​នៃ​ប្រទេស​ចិន​ដែលជា​ប្រទេសជិតខាង​ដ៏​ធំ​របស់ខ្លួន​។​
Mother Mushroom បាន​ក្លាយជា​អ្នក​រិះគន់​ឥត​សំចៃមាត់​របស់​ប្រទេស​វៀតណាម​មុនពេល​នាង​ត្រូវបាន​ឃុំខ្លួន​ក្នុង​ឆ្នាំ​២០១៧​ដោយសារ​ការសរសេរ​របស់​នាង​លើ​ប្រធាន​នៃ​ការស្លាប់​មនុស្ស​នៅក្នុង​មន្ទីរឃុំឃាំង​ប៉ូលិស បរិស្ថាន​និង​នយោបាយ​។​

ប្រភព​ស្ថានទូត​អាមេរិក មិត្តភក្តិ​និង​មន្ត្រី​វៀតណាម​បាន​ប្រាប់ AFP ថា នាង​ត្រូវបាន​គេ​ដោះលែង​ពី​ពន្ធនាគារ​កាលពី​ថ្ងៃ​ពុធ​ហើយ​បានធ្វើ​ដំណើរ​ទៅ​សហរដ្ឋអាមេរិក​។​

មន្ត្រី​រដ្ឋាភិបាល​វៀតណាម​ម្នាក់​បាន​ប្រាប់ AFP ក្នុង​លក្ខខណ្ឌ​មិន​បញ្ចេញ​ឈ្មោះថា “​លោកស្រី Quynh ត្រូវបាន​បញ្ជូនទៅ​សហរដ្ឋអាមេរិក​នៅពេល​ព្រឹក​”​។​

គួរ​បញ្ជាក់ថា Mother Mushroom ត្រូវបាន​ចាប់ខ្លួន​នៅ​ខែតុលា​ឆ្នាំ​២០១៦​បន្ទាប់ពី​បាន​ទៅសួរសុខទុក្ខ​សកម្មជន​ជា​មិត្ត​ម្នាក់​នៅក្នុង​ពន្ធនាគារ​ប៉ុន្តែ​បើទោះបីជា​ចេញពី​គុក​ក៏ដោយ នាង​នៅតែ​រក្សា​ការប្រឆាំង​ចំពោះ​រដ្ឋាភិបាល​កុម្មុយនីស្ត​៕ AFP

​

Source: Kampuchea Thmey Daily