ជនអន្តោប្រវេសន៍ហុងឌូរ៉ាសរាប់ពាន់នាក់បានដើរក្បួនទៅភាគខាងជើងកាលពីថ្ងៃពុធក្នុងការប៉ុនប៉ងដើម្បីឈានទៅដល់សហរដ្ឋអាមេរិកដែលនេះជាការផ្គើនទៅនឹងការគំរាមកំហែងពីប្រធានាធិបតីអាមេរិកលោក Donald Trump ដែលថាឈប់ផ្តល់ជំនួយដល់ប្រទេសណាដែលអនុញ្ញាតឲ្យពួកគេឆ្លងកាត់។
លោក Trump ដែលកំណត់គោលដៅលើប្រទេសហុងឌូរ៉ាស ហ្គាតេម៉ាឡានិងអែលសាល់វ៉ាឌ័រកាលពីថ្ងៃអង្គារបានបន្តការវាយប្រហាររបស់គាត់លើក្បួនមនុស្សនៅថ្ងៃបន្ទាប់ដោយនិយាយថា វាគួរតែជាបញ្ហាសំខាន់សម្រាប់បេក្ខជនគណបក្សសាធារណរដ្ឋនៅក្នុងការបោះឆ្នោតពាក់កណ្តាលអាណត្តិនាពេលខាងមុខ។
ដោយហត់នឿយនឹងការធ្វើដំណើររយៈពេលច្រើនម៉ោងក្រោមកំដៅព្រះអាទិត្យនិងភ្លៀងធ្លាក់, ជនជាតិហុងឌូរ៉ាសមួយក្រុមដែលមានគ្នាប្រហែលមួយពាន់នាក់បានចូលជ្រកកោណក្នុងជម្រកមួយដែលឧបត្ថម្ភដោយព្រះវិហារមួយនៅកណ្តាលរដ្ឋធានីរបស់ប្រទេសហ្គាតេម៉ាឡា។
លោក Denis Contreras ដែលបានភៀសខ្លួនចេញពីប្រទេសហុងឌូរ៉ាសជាមួយបងស្រីនិងក្មួយស្រីពីរនាក់របស់គាត់បាននិយាយថា “នេះគឺជាការចាប់ផ្តើមនៃការធ្វើដំណើរដែលកំពុងកើតមានពីព្រោះយើងមិនអាចទ្រាំទ្រនឹងអំពើហិង្សាបានច្រើនទៀតទេ”។
លោក Contreras បាននិយាយថា នឹងមិនវិលត្រឡប់ទៅកាន់ប្រទេសអាមេរិកកណ្តាលរបស់គាត់វិញទេដែលគាត់និយាយថា ត្រូវបានញាំញីដោយភាពក្រីក្រនិងអំពើហឹង្សា។ លោកបាននិយាយថា ការចាកចេញពីប្រទេសនេះគឺជារឿងល្អហើយការវិលត្រឡប់ទៅវិញនឹងក្លាយជាការកាត់ទោសប្រហារជីវិត។
គោលបំណងរបស់ពួកគេគឺដើម្បីទទួលបានភាពរឹងមាំនិងបន្តឆ្ពោះទៅកាន់ព្រំដែនជាប់ប្រទេសម៉ិកស៊ិក។
ក្រុមទីពីរបានធ្វើដំណើរឆ្លងកាត់ព្រំដែនទៅកាន់ប្រទេសហ្គាតេម៉ាឡានៅរសៀលថ្ងៃចន្ទហើយបានទៅដល់ទីក្រុង Esquipulas ។
យោងតាមមន្ត្រីអន្តោប្រវេសន៍អែលសាល់វ៉ាឌ័របានឲ្យដឹងថា មួយភាគបីនៃជនជាតិហុងឌូរ៉ាសជាង៤០០នាក់ក៏បានឆ្លងកាត់ប្រទេសអែលសាល់វ៉ាឌ័រដើម្បីចូលរួមផងដែរ៕ AFP
Source: Kampuchea Thmey Daily
0 Comments