ប្រធានាធិបតីរុស្ស៊ីលោកវ្ល៉ាឌីមៀរពូទីន បានចាប់ផ្តើមដំណើរទស្សនកិច្ចថ្នាក់រដ្ឋជាលើកដំបូងរបស់លោកទៅកាន់ប្រទេសអ៊ូបេគីស្ថាននៅថ្ងៃព្រហស្បតិ៍ ខណៈវិមានក្រឹមឡាំងព្យាយាមចាប់ផ្ដើមទំនាក់ទំនងឡើងវិញជាមួយកិច្ចព្រមព្រៀងពាណិជ្ជកម្មទឹកប្រាក់រាប់ពាន់លានដុល្លារ។
ពេលវេលាចុងក្រោយបំផុតដែលលោក ពូទីន ឈានជើងចូលសាធារណរដ្ឋមានប្រជាជនច្រើនបំផុតនៅអាស៊ីកណ្តាលដែលជាអតីតសូវៀតមួយនេះគឺកាលពីឆ្នាំ២០១៦ដែលពេលនោះ អ៊ូបេគីស្ថានស្ថិតនៅក្នុងភាពមិនច្បាស់លាស់ខាងនយោបាយបន្ទាប់ពីការស្លាប់របស់មេដឹកនាំយូរអង្វែងលោក Islam Karimov។
បច្ចុប្បន្ន ប្រទេសទាំងពីរកំពុងរៀបចំចុះហត្ថលេខាលើកិច្ចសន្យាដែលមានតម្លៃជាង២០ពាន់លានដុល្លារដែលក្នុងនោះមានជាងពាក់កណ្តាលគឺសម្រាប់ស្ថានីយ៍អាតូមិកមួយដែលត្រូវបានសាងសង់ដោយហិរញ្ញប្បទានរបស់រុស្ស៊ីនៅភាគខាងលិចនៃប្រទេស។
លោក Karimov ដែលជាអ្នកផ្តាច់ការមានភាពប្រុងប្រយ័ត្នចំពោះឥទ្ធិពលរបស់ក្រុងមូស្គូគឺបានក្លាយជាមេដឹកនាំកំពូលរបស់អ៊ូបេគីស្ថានមុនពេលទទួលបានឯករាជ្យជាផ្លូវការពីវិមានក្រឹមឡាំងក្នុងឆ្នាំ១៩៩១។
ជាងពីរឆ្នាំបន្ទាប់ពីមរណភាពរបស់គាត់ លោក Shavkat Mirziyoyev ដែលជាអ្នកស្នងតំណែងបានប្រើកំណែទម្រង់នយោបាយនិងសេដ្ឋកិច្ចដ៏សំខាន់ដើម្បីដាក់ខ្លួនឯងថាជាមេដឹកនាំគ្មានជម្លោះរបស់សាធារណរដ្ឋមួយនេះ។
យោងតាមលោក Konstantin Kalachev ប្រធានក្រុមអ្នកជំនាញផ្នែកនយោបាយដែលមានមូលដ្ឋាននៅទីក្រុងមូស្គូបានឲ្យដឹងថា បើទោះបីជាអ្នកទាំងពីរជួបគ្នានៅទីក្រុងមូស្គូកាលពីឆ្នាំមុនក៏ដោយ ដំណើរទស្សនកិច្ចរយៈពេលពីរថ្ងៃនេះមានសារៈសំខាន់ណាស់ជាពិសេសសម្រាប់អ្នកទាំងពីរ។
លោកបាននិយាយថា “ចំពោះលោក ពូទីន វាមានសារៈសំខាន់ដែលបង្ហាញថា គាត់មានដៃគូ។ ចំពោះលោក Mirziyoyev វិញ វាសំខាន់ណាស់ដែលបង្ហាញពីការគោរពរបស់គាត់ចំពោះក្រុងមូស្គូ”។
លោក Kalachev បានបញ្ជាក់ថា ក្នុងរយៈពេលវែង គោលបំណងរបស់ក្រុងមូស្គូគឺនឹងប្រែក្លាយប្រទេសអ៊ូបេគីស្ថានពីដៃគូមួយទៅជាសម្ព័ន្ធមិត្តមួយ។
គួរបញ្ជាក់ថា ចំណុចសំខាន់នៃដំណើរទស្សនកិច្ចរបស់លោកពូទីននេះ គឺទំនងជាពិធីបុកគ្រឹះសម្រាប់រោងចក្រថាមពលនុយក្លេអ៊ែរ៕ AFP
Source: Kampuchea Thmey Daily
0 Comments