ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសេចក្តីសម្រេចមួយ បង្កើតក្រុមការងារចម្រុះ ដើម្បីទទួល និងដោះស្រាយរាល់បណ្តឹងតវ៉ាផ្សេងៗ នៅមុខភូមិគ្រឹះសម្តេច នៅវិមានឯករាជ្យ រាជធានីភ្នំពេញ និងក្រុងតាខ្មៅ ខេត្តកណ្តាល នេះបើយោងតាមសេចក្តីសម្រេចដែលការិយាល័យយើង ទើបទទួលបាននៅថ្ងៃទី១៨ ខែតុលា ។
តាមសេចក្តីសម្រេចចុះថ្ងៃទី១៦ ខែតុលា ឆ្នាំ២០១៨ បានឲ្យដឹងថា ក្រុមការងារចម្រុះនេះ មានភារកិច្ច ទទួលពាក្យបណ្ដឹងតវ៉ាផ្សេងៗ នៅមុខភូមិគ្រឹះសម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី នៅវិមានឯករាជ្យ រាជធានីភ្នំពេញ និងក្រុងតាខ្មៅ ខេត្តកណ្ដាល រួចបញ្ជូនទៅជំនាញពាក់ព័ន្ធ ដើម្បីពិនិត្យសម្រេច ឬធ្វើរបាយការណ៍ជូនសម្តេចតេជោ ហ៊ុន សែន, សហការជាមួយអាជ្ញាធរមានសមត្ថភាពពាក់ព័ន្ធទាំងអស់ ទប់ស្កាត់ក្រុមតវ៉ា មានបាតុករច្រើននាក់ ដែលមានបំណងមកដាក់ពាក្យបណ្ដឹងតវ៉ាផ្សេងៗជូនសម្តេចតេជោ និងសម្តេចកិត្តិព្រឹទ្ធបណ្ឌិត, ព្យាយាមពន្យល់នីតិវិធីជូនក្រុមអ្នកតវ៉ា ឱ្យយល់ពីភារកិច្ចរបស់ក្រុមការងារចម្រុះ និង ច្បាប់ជាធរមានផ្សេងៗ, ទប់ស្កាត់រាល់ការញុះញង់ពីក្រុមឆ្លៀតឱកាស ដែលកេងចំណេញមកលើក្រុមអ្នកតវ៉ា, អនុប្រធាន និងសមាជិក ក្រុមការងារចម្រុះត្រូវចូលរួមប្រជុំតាមការកោះអញ្ជើញរបស់ប្រធានក្រុមការងារ ។
ក្រុមការងារចម្រុះនេះ គឺមាននាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជានាយករងខុទ្ទកាល័យសម្តេចតេជោ ជាប្រធាន អនុប្រធាន៣រូប ដែលរួមមាន លោក ឃួង ស្រេង អភិបាលរាជធានីភ្នំពេញ, លោក ម៉ៅ ភិរុណ អភិបាលខេត្តកណ្តាល និងលោក ចៅ តុល នាយករងខុទ្ទកាល័យសម្តេចតេជោ និងជាមេបញ្ជាការរង បញ្ជាការដ្ឋានអង្គរក្ស និងមានសមាជិក១៨រូបទៀត។
សូមបញ្ជាក់ថា ការបង្កើតក្រុមការងារនេះ ត្រូវបានគេមើលឃើញថា ក្រោយពីប្រជាពលរដ្ឋស្វែងរកអន្តរាគមន៍ពីស្ថាប័ន ឬក្រសួងពាក់ព័ន្ធមួយចំនួន មិនបានសម្រេច ហើយពួកគាត់តែងតែប្រមូលផ្តុំ ឬហែក្បួនស្នើសុំអន្តរាគមន៍ផ្ទាល់ពីពីសម្តេចតេជោ ហ៊ុន សែន នៅមុខភូមិគ្រឹះ ជាញឹកញាប់៕
Source: Kampuchea Thmey Daily
0 Comments