លោកប្រធានាធិបតី Donald Trump កាលពីថ្ងៃពុធបានបដិសេធការបិទបាំងសម្រាប់សម្ព័ន្ធមិត្តអារ៉ាប៊ីសាអ៊ូឌីតនៅក្នុងករណីឃាតកម្មដ៏គួរឲ្យសង្ស័យលើអ្នកសារព័ត៌មានដ៏សំខាន់ម្នាក់ ហើយបាននិយាយថា គាត់រំពឹងថានឹងដឹងការពិតអំពីជោគវាសនារបស់លោក Jamal Khashoggi នៅក្នុងរយៈពេលប៉ុន្មានថ្ងៃខាងមុខនេះ។
ការអត្ថាធិប្បាយរបស់លោក Trump បានធ្វើឡើងបន្ទាប់ពីការបោះពុម្ពផ្សាយនៅក្នុងប្រព័ន្ធផ្សព្វផ្សាយទួរគីដែលបានអះអាងថា លោក Khashoggi មិនត្រឹមតែត្រូវបានសម្លាប់ដោយភ្នាក់ងារអារ៉ាប៊ីសាអ៊ូឌីតនៅស្ថានកុងស៊ុលរបស់ពួកគេក្នុងទីក្រុងអ៊ីស្តង់ប៊ុលប៉ុណ្ណោះទេប៉ុន្តែថែមទាំងត្រូវបានគេធ្វើទារុណកម្មនិងកាប់ចិញ្ច្រាំផងដែរ។
ប្រធានាធិបតីរូបនេះបាននិយាយថា គាត់នឹងទទួលបានរបាយការណ៍ពេញលេញពីរដ្ឋមន្ត្រីក្រសួងការបរទេស Mike Pompeo បន្ទាប់ពីការវិលត្រឡប់របស់អ្នកការទូតពីកិច្ចប្រជុំជាមួយមេដឹកនាំអារ៉ាប៊ីសាអ៊ូឌីតនិងទួរគីដែលអនុញ្ញាតឲ្យគាត់វាយតម្លៃអំពីអ្វីដែលពិតជាបានកើតឡើង។
លោក Trump បាននិយាយថា “យើងប្រហែលជាដឹងនៅត្រឹមចុងសប្ដាហ៍នេះ”។
យោងតាមរបាយការណ៍ចុងក្រោយបង្អស់បានឲ្យដឹងថា អ្នកកាសែតអារ៉ាប៊ីសាអ៊ូឌីតត្រូវបានធ្វើឃាតដោយក្រុមមួយដែលរួមមានទាំងភ្នាក់ងារមានទំនាក់ទំនងជាមួយព្រះអង្គម្ចាស់ Mohammed ដែលត្រូវជាបុត្រារបស់ស្ដេច Salman ផងដែរ។
ប៉ុន្តែលោក Trump បានច្រានចោលលទ្ធភាពនៃសកម្មភាពប្រឆាំងនឹងអារ៉ាប៊ីសាអ៊ូឌីតដែលគាត់សរសើរម្តងហើយម្តងទៀតថាជាអតិថិជនដ៏សំខាន់សម្រាប់ឧស្សាហកម្មសព្វាវុធអាមេរិក។
ប៉ូលិសទួរគីនិងអ្នកជំនាញផ្នែកនីតិកម្មកាលពីថ្ងៃពុធបានឆែកឆេរអគាររបស់ស្ថានកុងស៊ុលអារ៉ាប៊ីសាអ៊ូឌីតប្រចាំទីក្រុងអ៊ីស្តង់ប៊ុលហើយក៏បានឆែកឆេរស្ថានកុងស៊ុលរបស់ប្រទេសនេះជាលើកទីពីរផងដែរ។
លោកកុងស៊ុល Mohammed al-Otaibi បានចាកចេញពីទីក្រុងអ៊ីស្តង់ប៊ុលទៅកាន់ទីក្រុងរីយ៉ាដ តាមការគ្រោងទុកកាលពីរសៀលថ្ងៃអង្គារដោយទីក្រុងអង់ការ៉ាបានអះអាងថា គាត់មិនត្រូវបានគេបណ្តេញចេញទេប៉ុន្តែបានចាកចេញតាមជម្រើសរបស់គាត់៕ AFP
Source: Kampuchea Thmey Daily
0 Comments