ភ្នំពេញ ៖ ប្រជាពលរដ្ឋក្នុងមូលដ្ឋានខណ្ឌមានជ័យបានឲ្យកម្ពុជាថ្មីដឹងថា ជារៀងរាល់យប់ពួកគាត់តែងតែបានឃើញវត្តមានលោកពេជ្រ កែវមុនី អភិបាលនៃគណៈអភិបាលខណ្ឌមានជ័យ ដឹកនាំកម្លាំងចំរុះចុះការពារសន្តិសុខតាមបណ្តាមូលដ្ឋានដើម្បីរក្សាសន្តិសុខជូនដល់ប្រជាពលរដ្ឋ។
ទាក់ទិនទៅនឹងសកម្មភាពចុះយាមល្បាតខាងលើនេះ លោកពេជ្រ កែវមុនី អភិបាលនៃគណៈអភិបាលខណ្ឌមានជ័យបានមានប្រសាសន៍ថា ជារៀងរាល់យប់លោកតែងតែដឹកនាំកម្លាំងគណៈបញ្ជាការឯកភាពខណ្ឌចុះយាមល្បាតការពារសន្តិសុខតាមបណ្តាសង្កាត់ទាំង៧ ក្នុងមូលដ្ឋានខណ្ឌពិតប្រាកដមែន។
លោកអភិបាលខណ្ឌបានបញ្ជាក់ទៀតថា ចំពោះភារកិច្ចដែលបម្រើប្រជាពលរដ្ឋគឺលោកមិនខ្លាចនឿយហត់និងប្រកាន់ពេលវេលានោះឡើយ ធ្វើយ៉ាងណាឲ្យតែបងប្អូនប្រជាពលរដ្ឋបានសម្រាន្តលក់ស្រួលនិងមិនព្រួយបារម្ភនូវអំពើចោរកម្ម លួច ឆក់ ប្លន់នោះឡើយ។
លោកពេជ្រ កែវមុនី បានមានប្រសាសន៍បន្តទៀតថា ចំពោះកិច្ចការណាដែលបងប្អូនប្រជាពលរដ្ឋលោកចង់បាននោះពិសេសកិច្ចការសន្តិសុខគឺលោកបានខិតខំបំពេញដោយមិនខ្លាចនឿយហត់ទាំងថ្ងៃទាំងយប់ដោយមិនគិតពីពេលវេលាយប់ថ្ងៃឡើយ។ ការបែងចែកកម្លាំងការពារសន្តិសុខតាមបណ្តាមូលដ្ឋានគឺត្រូវបានបែងចែកកម្លាំងចុះល្បាតតាមដងផ្លូវកម្លាំងពួនស្ទាក់និងកម្លាំងមួយចំនួនដាក់ប្រចាំការតាមទីស្នាក់ការភូមិ សង្កាត់និងប៉ុស្តិ៍រដ្ឋបាលដើម្បីរង់ចាំជួយអន្តរាគមន៍ពេលមានហេតុការណ៍អ្វីកើតឡើង។
ទន្ទឹមនឹងនេះ លោកអភិបាលខណ្ឌមានជ័យបានសំដែងការអរគុណដល់កម្លាំងចំរុះរបស់ខណ្ឌដែលខិតខំបំពេញការងាររក្សារសន្តិសុខជូនដល់ប្រជាពលរដ្ឋក្នុងមូលដ្ឋានមិនឲ្យមានក្តីព្រួយបារម្ភពីការបាត់បង់ទ្រព្យសម្បត្តិនោះឡើយ។ ប្រជាពលរដ្ឋសូមធ្វើការកោតសរសើរដល់ការខិតខំបំពេញការងារការពារសន្តិសុខជូនប្រជាពលរដ្ឋរបស់លោកអភិបាលខណ្ឌមានជ័យដូចសព្វថ្ងៃនេះខ្លាំងណាស់។នេះពិតជាថ្នាក់ដឹកនាំដ៏ល្អនិងបម្រើប្រជាពលរដ្ឋពិតប្រាកដមែន៕
Source: Kampuchea Thmey Daily
0 Comments