ភ្នំពេញ ៖ លោក BRINZER អនុប្រធានសភាពាណិជ្ជកម្មអឺរ៉ុបនៅកម្ពុជាថ្លែងបែបនេះ ជាការឆ្លើយតបសំណួរអ្នកសារព័ត៌មាននៅក្នុងកិច្ចពិភាក្សាមួយស្តីពីធុរកិច្ចអឺរ៉ុបនៅកម្ពុជា កាលពីព្រឹកថ្ងៃទី០៤ ខែតុលា ឆ្នាំ២០១៨ នៅសណ្ឋាគារសាន់វេ ដោយមានការអញ្ជើញចូលរួមពីលោក George EDGAR ឯកអគ្គរដ្ឋទូតសហភាពអឺរ៉ុបនៅកម្ពុជា និងតំណាងអង្គភាពអ្នកសារព័ត៌មានជាច្រើន។
លោក BRINZER ថ្លែងថា នៅប្រទេសកម្ពុជា មានលក្ខខណ្ឌ និងស្ថានភាពល្អប្រសើរជាងបណ្តាប្រទេសដទៃទៀតក្នុងអាស៊ាន ដែលក្រុមហ៊ុនអាចមកវិនិយោគដោយផ្ទាល់ និងអាចផ្ទេរដើមទុន ប្រាក់ចំណេញរបស់ខ្លួន តាមការចង់បាន។
លោកបញ្ជាក់ថា “ខ្ញុំមើលឃើញកម្ពុជា គឺជាកន្លែងល្អបំផុតសម្រាប់វិនិយោគ ជាកន្លែងដែលមានលក្ខខណ្ឌ ហើយបើមើលទៅលើពិន្ទុ មានកត្តាច្រើនណាស់ ដែលគេត្រូវយកមកដាក់ពិន្ទុ មិនត្រឹមតែលក្ខខណ្ឌ និងបរិយាកាសនៃការវិនិយោគប៉ុណ្ណោះទេ តែគេអាចរកបាននូវកម្មករ និយោជិត ដែលមានជំនាញ ដែលទទួលបានការបណ្ដុះបណ្ដាល និងទីផ្សារ ដែលបង្កដល់ការវិនិយោគស្មើភាពគ្នា ហើយគេគិតថា បើសិនក្រុមហ៊ុនបរទេសចូលមកវិនិយោគ តើក្រុមហ៊ុនក្នុងស្រុកធ្វើដូចគ្នាដែរឬទេ? ពីព្រោះនេះគឺជាបញ្ហាដ៏សំខាន់ ដូចបញ្ហាដទៃទៀតដែរ។ ដូច្នេះយើងរីករាយ នឹងមកកាន់ទីនេះ ប្រទេសកម្ពុជា គឺយើងបានមករាប់ឆ្នាំហើយ អាជីវកម្មរបស់អឺរ៉ុប ជាង២០ឆ្នាំហើយ ហើយក៏មានការរីកចម្រើនជាបន្តបន្ទាប់។ មានន័យថា យើងសហគមន៍អឺរ៉ុប មិនមានដៃគូថ្មីទេ គឺយើងមានវត្តមានយូហើយនៅទីនេះ យើងនឹងបន្តជួយកម្ពុជាឲ្យទទួលបានពិន្ទុកាន់តែល្អបន្ថែមទៀត គឺពិន្ទុដែលគេដាក់សម្រាប់ការវិនិយោគនេះ”។
លោក BRINZER បានលើកឡើងទៀតថា ក្នុងនាមលោកផ្ទាល់ លោកចង់ឃើញសហភាពអឺរ៉ុប វិនិយោគកាន់តែច្រើនបន្ថែមទៀត នៅប្រទេសកម្ពុជា ហើយនេះជាអ្វី ដែលផ្ដល់ផលប្រយោជន៍ទាំងសងខាង គឺទាំងភាគីអឺរ៉ុប និងកម្ពុជា ហើយយើងក៏ចាត់ទុកថា ឈ្នះឈ្នះ ទាំងអស់គ្នាផងដែរ។
ទាក់ទងទំហំពាណិជ្ជកម្មរវាងសហភាពអឺរ៉ុប ជាមួយកម្ពុជា លោក George EDGAR ឯកអគ្គរដ្ឋទូតសហភាពអឺរ៉ុបនៅកម្ពុជាបានលើកឡើងថា ឆ្នាំ២០១៧ កន្លងមក សម្រាប់ការនាំចេញពីកម្ពុជា ទៅអឺរ៉ុប មានប្រហែល៥,៥ប៊ីលានអឺរ៉ូ។ ចំណែកការនាំចេញពីអឺរ៉ុប មកកាន់កម្ពុជាវិញ មាន៨៥០លានអឺរ៉ូ ហើយ៩០ភាគរយនៃការនាំចេញរបស់កម្ពុជាទៅសហភាពអឺរ៉ុប គឺផ្ដោតទៅលើសំលៀកបំពាក់ និងផលិតផលស្បែកជើង ក្នុងនោះក៏មានកង់ និងអង្ករផងដែរ។តែក៏មានផលិតផលផ្សេងៗមួយចំនួនទៀតដូចជា ផលិតផលម្រេចកំពត និងសូត្រជាដើម ដែលជាផលិតផលសំខាន់ៗរបស់កម្ពុជា។
ចំណែកបញ្ហា EBA គឺការអនុគ្រោះពន្ធផ្នែកពាណិជ្ជកម្ម ដែលសហភាពអឺរ៉ុបផ្ដល់ទៅឲ្យប្រទេសអភិវឌ្ឍតិចតួច ដែលមានកម្ពុជាផងដែរនោះ លោក George EDGAR លើកឡើងថា អ្វីដែល EBA បានផ្ដល់ឱ្យបណ្តាប្រទេសទាំងនោះ គឺការនាំទំនិញពីបណ្តាប្រទេសទាំងនោះ ដោយមិនជាប់ពន្ធគយ និងមិនកំណត់កូតា។ EBA គឺជាការអនុគ្រោះពន្ធលើកលែងតែអាវុធយុទ្ធភណ្ឌ ហើយនៅប្រទេសកម្ពុជា សហភាពអឺរ៉ុប បានគិតបញ្ចូលគ្រប់មុខទំនិញទាំងអស់ លើកលែងតែអាវុធយុទ្ធភណ្ឌ។ លោកបញ្ជាក់ដែរថា កន្លងមកតែងតែមានការភាន់ច្រឡំមួយចំនួនដែលថា ប្រទេសកម្ពុជា មានការអភិវឌ្ឍន៍តិចតួច។ លោកពន្យល់ថា បើគិតតាមធនាគារពិភពលោក ចាប់ពីឆ្នាំ២០១៦មក ប្រទេសកម្ពុជាបានរួចផុតពីកំរិតកំណត់ហើយ។ មានន័យថាប្រទេសកម្ពុជា បានរត់ចេញពីប្រទេស ដែលមានចំណូលទាប ទៅចំណូលមធ្យម ដូច្នេះបើគិតតាមរង្វាស់របស់ធនាគារពិភពលោក ប្រទេសកម្ពុជា បានក្លាយទៅជាប្រទេស ដែលមានចំណូលមធ្យមកម្រិតទាប ប៉ុន្តែបើនិយាយពីប្រទេស ដែលមានការអភិវឌ្ឍន៍តិចតួច ដែលជាចំណាត់ថ្នាក់ ដាក់ដោយអង្គការសហប្រជាជាតិ ដែលគិតទាំងកត្តាដទៃផ្សេងទៀត និងសន្ទុះនៃការអភិវឌ្ឍមនុស្ស និងភាពងាយរងគ្រោះផងដែរ។ ដូច្នេះការចាត់ចំណាត់ថ្នាក់របស់ប្រទេសនីមួយៗនៅអង្គការសហប្រជាជាតិ គេកំណត់៣ឆ្នាំម្តង ហើយប្រទេសកម្ពុជា បើគិតតាមអង្គការសហប្រជាជាតិ រហូតដល់ឆ្នាំ២០២៧ ទើបងើបផុតពីប្រទេសអភិវឌ្ឍន៍តិចតួច ហើយដក EBA បាន។
ទោះជាយ៉ាងណា លោក BRINZER អនុប្រធានសភាពាណិជ្ជកម្មអឺរ៉ុបនៅកម្ពុជា បានអះអាងថា សភាពាណិជ្ជកម្មអឺរ៉ុប បានខិតខំយ៉ាងខ្លាំង ដោយយើងបានផ្សព្វផ្សាយ ដើម្បីទាក់ទាញអ្នកវិនិយោគអឺរ៉ុបមកកាន់កម្ពុជា និងបានរៀបចំកម្មវិធីពិពណ៌ពាណិជ្ជកម្មនៅអឺរ៉ុប ជួយផ្តល់ព័ត៌មានដល់អ្នកវិនិយោគនៅអឺរ៉ុប ដែលមានគោលបំណងមកកម្ពុជា ហើយក៏បានផ្សព្វផ្សាយពីការវិនិយោគនៅលើបណ្តាញព័ត៌មាន និងនៅសភាសភាពាណិជ្ជកម្មបារាំង និងអាល្លឺម៉ង់ជាដើម និងបានបញ្ជាក់ថា ប្រសិនបើអ្នកវិនិយោគនៅអឺរ៉ុប មានគោលបំណងមកកម្ពុជា សភាពាណិជ្ជកម្មអឺរ៉ុបនៅកម្ពុជា មានផ្តល់ព័ត៌មានដល់ពួកគេ ដើម្បីឲ្យពួកគេបានដឹងពីសក្តានុពលសម្រាប់ការវិនិយោគនៅកម្ពុជា៕
Source: Kampuchea Thmey Daily
0 Comments