ឯម ឡេង​លី និង ម៉ន សា​ម៉េ​ត វាយ​ថៃ​អោយ​បោះបង់​ការប្រកួត​ក្នុង​ទឹក​ទី​៤​ដូចគ្នា

​អ្នក​ប្រដាល់​ជើង​ខ្លាំង​កម្ពុជា​២​រូប គឺ​ឯម ឡេង​លី អ្នក​ប្រដាល់​ក្លិប​ថ្មគោល​ពោធិ​សែន​ជ័យ និង ជើងចាស់​ម៉ន សា​ម៉េ​ត អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក បាន​វាយ​ឈ្នះ​ដៃគូ​ប្រកួត​ថៃ​ក្នុង​ទឹក​ទី​៤​ដូចគ្នា ក្នុង​ការជួប​ប្រកួត​គ្នា​លើស​ង្វៀន​Wurkz កាលពី​រសៀល​ថ្ងៃទី ២១ តុលា ២០១៨។

អ្នក​ប្រដាល់​ជើង​ខ្លាំង​ស្រករ​ក្រោយ ឯម ឡេង​លី ក្លិប​ថ្មគោល​ពោធិ​សែន​ជ័យ បាន​ផ្តួល​យកឈ្នះ​អ្នក​ប្រដាល់​ថៃ Chai Suo ឲ្យ​បោះបង់ចោល​ការប្រកួត​ក្នុង​ទឹក​ទី​៤ បន្ទាប់ពី​ត្រូវ​ឡេង​លី ទាត់​ជើង​ក្រោម និង​វាយ​ដៃ ព្រមទាំង​កែង ត្រូវ​ច្រើនពេក​នោះ។

Chai Suo ត្រូវ​អាជ្ញាកណ្តាល​រាប់​៨​ក្នុង​ទឹក​ទី​៤ ចំនួន​២​ដង និង​ដួល​ម្តងទៀត អាជ្ញាកណ្តាល​ក៏​បញ្ឈប់​លែងអោយ​ប្រកួត​តែម្តង ។ ពួកគេ​ទាំងពីរ ប្រកួត​គ្នា​ក្នុង​ទម្ងន់​៧១​គីឡូក្រាម ។

ចំពោះ ម៉ន សា​ម៉េ​ត​វិញ គេ​ប្រកួត​ឈ្នះ​អ្នក​ប្រដាល់​ថៃ​ចំណូល​ថ្មី Yorth Savich​ក្នុង​ទឹក​ទី​៤​ដែរ បន្ទាប់ពី​ត្រូវ​សា​ម៉េ​ត​វាយ​អាជ្ញាកណ្តាល​រាប់​ជាច្រើនលើក​តាំងពី​ក្នុង​ទឹក​ទី​២​ដល់ ទឹក​ទី​៥​នោះ ។ ម៉ន សា​ម៉េ​ត និង Yorth Savich ប្រកួត​គ្នា​ក្នុង​ប្រភេទ​ទម្ងន់​៥៧​គីឡូក្រាម ។​

មាស សុជាតិ ផ្តួល Ha Chhlam ក្នុង​ទឹក​ទី​១​ ខណៈ​សូត្រ​ខេ​វិ​ន​សងសឹក​សេន កុសល​មិនបាន​សម្រេច​
​ ​អ្នក​ប្រដាល់​ជើង​ខ្លាំង​កម្ពុជា​មាស សុជាតិ ក្លិប​ឃ្លាំងមឿង​កីឡា​ខេត្តពោធិសាត់ បាន​ប្រើពេល​ប្រហែល​មួយ​នាទី​ប៉ុណ្ណោះ ផ្តួល​អ្នក​ប្រដាល់​ថៃ​Ha Chhalam អោយ​បោះបង់​ការប្រកួត​ក្នុង​ទឹក​ទី​១ នៅក្នុង​ការជួប​ប្រកួត​គ្នា​ក្នុង​កម្មវិធី​ប្រដាល់​Boostrong Fighter On Fire នៅលើ​សង្វៀន​SEA-TV ព្រឹក​ថ្ងៃអាទិត្យ ទី​២១​តុលា​២០១៨​។

មាស សុជាតិ និង Ha Chhlam ត្រូវ​ជួប​ប្រកួត​គ្នា​ក្នុង​ប្រភេទ​ទម្ងន់​៦៣,៥០០​គីឡូក្រាម ។​សុជាតិ បាន​ទាត់​ជើង​ក្រោម​របស់​Ha Chhlam ប្រមាណ​២-៣​ជើង​បណ្តាលអោយ​ភ្លៅ​របស់ អ្នក​ប្រដាល់​ថៃ​រូបនេះ ដួល​ក្រោយ​លែងរួច​តែម្តង ។ ទម្ងន់​ជើង​របស់​សុជាតិ ពិតជា​ខ្លាំង​មែន ដែល​ធ្វើអោយ​អ្នក​ប្រដាល់​ជើង​ខ្លាំង​ថៃ​ដួល​បោះបង់​ការប្រកួត​តែម្តង ។​Ha Chhlam គេ​ធ្លាប់​មក​ប្រកួត​នៅ​ភ្នំពេញ​ម្តង​ពីរដង​ហើយ​ហើយ​ដែល​ការ​មក​លើកចុងក្រោយរ​បស់​គេ​នោះ គឺ​វាយ​ឈ្នះ​ទេស ជីវ៉ា អ្នក​ប្រដាល់​ក្លិប​កងពលតូច​លេខ​៧០​ក្នុង​ទឹក​ទី​៣ ។​

ចំពោះ​សូត្រ ខេ​វិ​ន អ្នក​ប្រដាល់​ក្លិប​បក្សី​ស្លាប​ដែក ដែល​ឡើង​សងសឹក​សេន កុសល អ្នក​ប្រដាល់​ក្លិប​មោងឫស្សី​មរតក​គុន​ខ្មែរ ខេត្តបាត់ដំបង​នោះ គឺ​សងសឹក​មិនបាន​សម្រេច​នោះឡើយ ។ សូត្រ ខេ​វិ​ន ចាញ់​សេន កុសល​នេះ គឺ​ចាញ់​ដោយសារតែ​កម្លាំង​ស៊ុ​ហ្វ​ខ្សោយ​ប៉ុណ្ណោះ ។​

ភួង ពិសិដ្ឋ អ្នក​ប្រដាល់​ក្លិប​រាជសីហ៍ ខេត្តរតនគិរី ប្រកួត​ចាញ់​ពុទ្ធ ម៉ា​ណូយ អ្នក​ប្រដាល់​ក្លិប​ពុទ្ធ​សេរី​វង្ស​កីឡា ក្នុង​ទឹក​ទី​៣ ។ ពីរ​នាក់​នេះ ជួបគ្នា​ក្នុង​ទម្ងន់​៦០​គីឡូក្រាម ។​

ដោយឡែក សេក សារ៉ាន់ ក្លិប​អង្គរ​មានជ័យ​ខេត្តសៀមរាប បាន​វាយ​ឈ្នះ​សល់ ស្រស់ ក្លិប​សាល​វ័​ន្ត​កីឡា ដោយ​ពិន្ទុ ក្នុងការ​ជួបគ្នា​ទម្ងន់​៥១​គីឡូក្រាម ហើយ​ជា វិ​រៈ​បុត្រ ក្លិប​អមតៈ​គុន​ខ្មែរ ខេត្តសៀមរាប ក៏​ប្រកួត​ចាញ់ សំខាន់ ពិសិដ្ឋ ក្លិប​រ៉ា​ហាប់​ស្វាយប៉ាក ក្នុង​ទឹក​ទី​២ ក្នុងការ​ជួបគ្នា​ទម្ងន់​៥៤​គីឡូក្រាម៕ ​



Source: Kampuchea Thmey Daily