ប្រទេសទួរគីនិងសហរដ្ឋអាមេរិកកាលពីថ្ងៃព្រហស្បតិ៍បានបង្កើនសម្ពាធលើប្រទេសអារ៉ាប៊ីសាអ៊ូឌីតឲ្យពន្យល់ពីរបៀបដែលអ្នកកាសែតម្នាក់បាត់ខ្លួនបន្ទាប់ពីចូលស្ថានកុងស៊ុលរបស់ខ្លួនក្នុងទីក្រុងអ៊ីស្តង់ប៊ុលកាលពីសប្តាហ៍មុន ខណៈលោកប្រធានាធិបតី Recep Tayyip Erdogan បានអំពាវនាវឲ្យមានការបញ្ចេញវីដេអូកាមេរ៉ាសុវត្ថិភាព CCTV ពីបេសកកម្មនេះ។
កាសែត Washington Post ដែលលោក Khashoggi សរសេរអត្ថបទឲ្យបានរាយការណ៍ថា រាជទាយាទអារ៉ាប៊ីសាអ៊ូឌីតព្រះអង្គ Mohammed bin Salman បានបញ្ជាឲ្យមានប្រតិបត្តិការមួយដើម្បី “ទាក់ទាញ” អ្នកកាសែតដ៏សំខាន់ម្នាក់នេះឲ្យត្រឡប់មកផ្ទះវិញ។
លោក Khashoggi ដែលជាជនជាតិអារ៉ាប៊ីសាអ៊ូឌីតហើយអត្ថបទរបស់គាត់បានរិះគន់ព្រះអង្គម្ចាស់អង្គនេះនោះគឺមិនត្រូវបានគេឃើញទេចាប់តាំងពីថ្ងៃទី២ខែតុលាមកនៅពេលដែលគាត់ចូលទៅស្ថានកុងស៊ុលក្នុងទីក្រុងអ៊ីស្តង់ប៊ុលដើម្បីទទួលយកឯកសារផ្លូវច្បាប់សម្រាប់អាពាហ៍ពិពាហ៍របស់គាត់។
ក្រុមមន្ត្រីទួរគីបាននិយាយថា គាត់ត្រូវបានសម្លាប់ដោយក្រុមធ្វើឃាតមួយមានគ្នា១៥នាក់ដែលមកដល់តាមយន្តហោះចំនួនពីរគ្រឿងប៉ុន្តែក្រុងរីយ៉ាដបានបដិសេធចំពោះការអះអាងនេះ។
លោក Erdogan បានជំរុញឲ្យអារ៉ាប៊ីសាអ៊ូឌីតផ្តល់នូវរូបភាពកាមេរ៉ា CCTV ដើម្បីគាំទ្រដល់ការអះអាងរបស់ខ្លួនដែលថា លោក Khashoggi បានចាកចេញពីស្ថានកុងស៊ុលដោយសុវត្ថិភាព។ លោកបញ្ជាក់ថា លោកមិនបានរកឃើញថា ការបកស្រាយនាពេលបច្ចុប្បន្នរបស់អារ៉ាប៊ីសាអ៊ូឌីតគឺគ្រប់គ្រាន់ទេ។
លោកសួរថា “តើអាចមានប្រព័ន្ធកាមេរ៉ាសុវត្ថិភាពនៅស្ថានកុងស៊ុលឬក្នុងស្ថានទូតទេ? ”។
ស្ថានកុងស៊ុលបាននិយាយថា កាមេរ៉ា CCTV មិនដំណើរការទេនៅថ្ងៃនោះហើយបានច្រានចោលការអះអាងអំពីករណីឃាតកម្មថា “គ្មានមូលដ្ឋាន”។
ករណីនេះក៏គំរាមកំហែងផងដែរដល់ទំនាក់ទំនងដ៏រឹងមាំដែលរដ្ឋបាលរបស់លោក Trump បានកសាងឡើងជាមួយនឹងព្រះអង្គម្ចាស់ Mohammed បន្ទាប់ពីព្រះអង្គចង់ប្រែក្លាយនគរអភិជនសម្បូរប្រេងមួយនេះទៅជាមជ្ឈមណ្ឌលសម្រាប់ការច្នៃប្រឌិតនិងកំណែទម្រង់។
ប្រធានាធិបតីសហរដ្ឋអាមេរិកលោក Donald Trump បានសម្តែងនូវការប្តេជ្ញាចិត្តដើម្បីឈានទៅដល់ការដោះស្រាយបញ្ហានេះ៕ AFP
Source: Kampuchea Thmey Daily
0 Comments