ក្រុមអ្នកការទូតបាននិយាយថា ប្រទេសរុស្ស៊ីត្រូវបានគេថ្កោលទោសនៅឯអង្គការសហប្រជាជាតិកាលពីថ្ងៃព្រហស្បតិ៍ បន្ទាប់ពីហៅក្រុមអ្នកស្ម័គ្រចិត្តជួយសង្គ្រោះស៊ីរីដែលត្រូវបានគេស្គាល់ថាជាក្រុមមួក.សថាជា “ការគំរាមកំហែង” និងទាមទារឲ្យដកពួកគេចេញពីប្រទេសដែលហែកហួរដោយសង្គ្រាមមួយនេះ។
យោងតាមអ្នកការទូតដែលមានវត្តមាននៅឯកិច្ចពិភាក្សាបានឲ្យដឹងថា តំណាងរបស់រុស្ស៊ីបាននិយាយនៅក្នុងកិច្ចប្រជុំបិទទ្វារមួយរបស់ក្រុមប្រឹក្សាសន្តិសុខអង្គការសហប្រជាជាតិដែលកោះប្រជុំដោយក្រុងមូស្គូថា “វត្តមានរបស់ក្រុមមួក.សគឺជាប្រភពនៃការគំរាមកំហែង”។
អ្នកការទូតបានដកស្រង់សម្តីរបស់បេសកជនរុស្ស៊ីដែលបាននិយាយថាថា “យើងសូមអំពាវនាវឲ្យបណ្តាប្រទេសលោកខាងលិចដកក្រុមមួក.សចេញពីប្រទេសស៊ីរី។ ក្រុមភេវរជនគួរតែត្រូវដកចេញ។ វាមិនមែនជាគំនិតល្អទេដែលត្រូវមានពួកគេនៅក្នុងសង្គមស៊ីវិល”។
យោងតាមអ្នកការទូតម្នាក់ទៀតដែលនិយាយក្នុងលក្ខខណ្ឌអនាមិកបានឲ្យដឹងថា តំណាងរបស់ទីក្រុងមូស្គូបានសង្កត់ធ្ងន់ពីវត្តមានរបស់ពួកគេនៅក្នុងខេត្ត អ៊ីដលីប ដែលជាទីតាំងរឹងមាំចុងក្រោយរបស់ពួកឧទ្ទាមនៅក្នុងប្រទេសស៊ីរី។
ដោយបង្កើតឡើងនៅក្នុងឆ្នាំ២០១៣, ក្រុមការពារស៊ីវិលស៊ីរីឬក្រុមមួក.សបានជួយសង្គ្រោះអ្នកដែលរងរបួសនៅក្នុងការវាយប្រហារលើតំបន់ឧទ្ទាម។
ទោះបីជាយ៉ាងណាក៏ដោយ រុស្ស៊ីមិនបានចាត់ទុកសមាជិកដែលមានវត្តមាននៅក្នុងតំបន់ឧទ្ទាមរបស់ស៊ីរីថាជាអ្នកជួយសង្គ្រោះទេហើយបានចោទប្រកាន់ពួកគេជាច្រើនលើករួចមកហើយថាមានជាប់ពាក់ព័ន្ធនឹងក្រុមភេរវកម្ម។
យោងតាមប្រភពការទូតជាច្រើនបានឲ្យដឹងថា សហរដ្ឋអាមេរិក ចក្រភពអង់គ្លេសនិងបារាំងបានប្រតិកម្មដោយកំហឹងនិងស្រងាកចិត្ត។
យោងតាមប្រភពព័ត៌មានបានឲ្យដឹងថា “សហរដ្ឋអាមេរិកបានថ្កោលទោសចំពោះការចោទប្រកាន់មិនពិតនិងខុសឆ្គងរបស់ប្រទេសរុស្ស៊ី។ ក្រុមមួក.សគឺជាអង្គការមនុស្សធម៌ហើយប្រទេសរុស្ស៊ីកំពុងបន្តផ្សព្វផ្សាយព័ត៌មានមិនពិត”។
ទន្ទឹមនឹងនេះដែរ ចក្រភពអង់គ្លេសបានអំពាវនាវឲ្យរុស្ស៊ីបញ្ឈប់ការខ្ជះខ្ជាយពេលវេលារបស់ក្រុមប្រឹក្សានេះខណៈបារាំងបាននិយាយថា ខ្លួនមានការភ្ញាក់ផ្អើលនិងស្រងាកចិត្តហើយបន្ថែមថា ក្រុមនេះបានជួយសង្គ្រោះមនុស្សរាប់រយនាក់៕ AFP
Source: Kampuchea Thmey Daily
0 Comments