កីឡាករ ទៀត គឹម​ហេង រំពឹងថា​នឹង​ព្យាយាម​ពង្រឹងសមត្ថភាព​របស់​ខ្លួន​ក្រោយ​ទទួល​ឱកាស​លេង​ក្នុង​ក្លិប​អាជីព

​កីឡាករ ទៀត គឹម​ហេង សមាជិក​ក្នុង​ក្រុមយុវជន​មជ្ឈមណ្ឌល​និង​សាលា​បាល់ទាត់​ជាតិ​បាទី បានសម្រេច​ចិត្ត​ចូលរួម​ជាមួយ​ក្រុម​វិសាខា សមាជិក​ពានរង្វាន់​លី​គ​កំពូល​កម្ពុជា (Metfone Cambodian League) កាលពីពេល​ថ្មីៗ ខណៈ​កីឡាករ​រូប​នេះ​តាំងចិត្ត​ខ្លួន​នឹង​ពង្រឹងសមត្ថភាព​បន្ថែមទៀត​ដើម្បី​ដណ្តើមបាន​ឱកាស​លេង​ក្នុង​ប្រកួត​សំខាន់ៗ​។

កីឡាករ​មកពី​ខេត្ត​ព្រះសីហនុ រូបនេះ​បាន​លើក​ឡើង​ថា «​សម្រាប់​ខ្ញុំ​មិន​ខ្វល់​ពី​កីឡាករ​មកពីណា​ទេ សំខាន់​ខ្ញុំ​ត្រូវតែ​មានចិត្ត​មួយ​ហ្វឹកហាត់​អស់ពី​សមត្ថភាព អ្វី​ដែល​ខ្ញុំ​មាន​ឲ្យ​គ្រូ​បានឃើញ​ពេល​ហ្វឹកហាត់​។ ខ្ញុំ​ចូល​វិសាខា​នេះ​ដោយសារ​ជា​ក្លិប​លី​ក​កំពូល​មួយ និង ជា​ក្លិប​ថ្មី​។ អ៊ីចឹង​កីឡាករ​ពួកគាត់​ដែល​នាំ​ចូល​មក​ដូច​ខ្វះខាត​ដែរ ដូច្នេះ​ខ្ញុំ​នឹង​ព្យាយាម​ធ្វើ​ឲ្យ​បាន​ល្អ​នៅ​ក្លិប​មួយ​នេះ​»​។ កីឡាករ ទៀត គឹម​ហេង ស្ថិត​ក្នុង​ចំណោម​អតីត​យុវជន​បាទី​៦​រូប​ដែល​រំសាយ​កាលពី ពេល​ថ្មីៗ បាន​ចូលរួម​ជាមួយ​វិសាខា គឺ គង់ ពី​លត់​, ទូច គឹម​ឆាយ​, ឡុង ម៉េង​ហាវ​, ផុន តៃនិញ និង អាត អូន​តូច​។



កីឡាករ ទៀត គឹម​ហេង គិតថា​ការ​ចាប់​យក​កៅអី​១១​នាក់​ដំបូង​ពុំ​ងាយស្រួល​ឡើយ​ពេល​ចូលរួម​ជាមួយ​ក្រុម​វិសាខា ព្រោះថា​ក្លិប​នេះ​មាន​កីឡាករ​ជើងចាស់​ជាច្រើន​ដែល​មាន​បទពិសោធន៍​នៅ​តំបន់​កណ្តាល​ដែល​តួនាទី​ដូចដែល​ខ្លួន​ធ្លាប់​លេង ក្នុងនោះ​មាន​សិស្ស​ច្បង​ដូចជា ទិ​ត្យ ឌី​ណា​, សាន ភី​សា ជាដើម​។

កីឡាករ ទៀត គឹម​ហេង ធ្លាប់​ជាប់​បង្ហាញខ្លួន​នៅក្នុង​ប្រកួត​លើ​ឆាក​អន្តរជាតិ​ជាច្រើន​ជាមួយ​ក្រុម​ជម្រើសជាតិ​យុវជន​កម្ពុជា ព្រមទាំង​ក្នុង​ពានរង្វាន់​ជើងឯក​អាស៊ី ជើង​តំបន់​អាស៊ាន និង​ពានរង្វាន់​ក្រៅផ្លូវការ​មួយចំនួន​ផង​ដែរ ជាក់ស្តែង​ដូចជា​ក្នុង​ពានរង្វាន់ AFF U16 Championship, AFC U16 Championship, AFF U17, AFF U18, និង AFF U19 Championship ឆ្នាំ​២០១៨​នៅ​ប្រទេស​ឥណ្ឌូណេស៊ី​ ​ក្នុង​ខែ​កក្កដា កន្លង​ទៅ​នេះ៕

Source: Kampuchea Thmey Daily