ក្លិបបាល់ទាត់ភ្នំពេញក្រោន សមាជិកក្នុងពានរង្វាន់លីគកំពូលកម្ពុជា (Metfone Cambodian League) បានប្រកាសនៅលើវិបសាយផ្លូវការរបស់ខ្លួនថា ក្លិបសម្រេចចែកផ្លូវជាមួយគ្រូពេទ្យផ្នែកកាយសម្បទា របស់ខ្លួនដែលជាជនជាតិអង់គ្លេសគឺលោកSamuel Mannings ក្រោយបញ្ចប់រដូវកាលឆ្នាំ២០១៨ថ្មីៗនេះ។
យោងតាមសេចក្តីជូនដំណឹងរបស់ក្លិបធ្លាប់បានបញ្ជាក់ថាលោក Samuel Mannings ដែលមកពីសកលវិទ្យាល័យ Hertfordshire សិក្សាលើផ្នែក Sports Therapy។ លោក Samuel Mannings បានចូលរួមជាមួយក្លិបភ្នំពេញក្រោន តាំងពីដើមឆ្នាំ២០១៨ ដើម្បីធ្វើការលើផ្នែកវេជ្ជសាស្ត្រ ពោលគឺមានតួនាទីក្នុងការថែទាំសុខភាពក៏ដូចជាព្យាបាលរាល់បញ្ហាផ្សេងៗដែលកើតមានឡើងលើកីឡាករទាំងឈុតធំនិង ក្រុមយុវជន។ មួយវិញទៀតលោកគឺជាជំនួយការផ្នែកវេជ្ជសាស្ត្រនិង ជាអ្នកបង្ការរាល់ការរងរបួសផ្សេងៗរបស់កីឡាករលើទីលានផងដែរ។
សូមរំលឹកថា កាលពីដើមខែមករា ក្លិបភ្នំពេញក្រោន បានចែកផ្លូវជាមួយលោក Yuki Nakamura ដែលជាគ្រូពេទ្យជនជាតិរបស់ក្លិបក្រោយរួមរស់ជាមួយគ្នាបានរយៈពេល៤ខែ បន្ទាប់ពីចប់រដូវកាលឆ្នាំ២០១៧ ពោលគឺមុនដំណើរមកដល់របស់លោក Samuel Mannings។ ដូច្នេះនៅពេលនេះតំណែងគ្រូពេទ្យប្រចាំក្រុមនិងគ្រូបង្វឹកអ្នកចាំទីនៅក្លិបភ្នំពេញក្រោន កំពុងតែទំនេរ ខណៈគណៈកម្មការការប្រកួតបាល់ទាត់ជាតិកម្ពុជា (CNCC) នៅមិនទាន់បានបញ្ជាក់កាលបរិច្ឆេទនៃការចាប់ផ្តើមរដូវកាលឆ្នាំ២០១៩ នៅឡើយនោះទេ។
សូមបញ្ជាក់ថា នៅរដូវកាលឆ្នាំ២០១៨ ថ្មីៗនេះក្នុងពានរង្វាន់លីគកំពូលកម្ពុជា ក្រុមភ្នំពេញក្រោន រក្សាចំណាត់ថ្នាក់លេខ៥ក្រោយប្រកួតបាន២២លើក ឈ្នះបាន១១លើក ស្មើគ្នា៣លើកនិងចាញ់៨លើកមាន៣៦ពិន្ទុ ពោលគឺចាញ់ក្រុមកំពូលតារាងណាហ្គាវើល រហូតដល់២០ពិន្ទុ។ ភ្នំពេញក្រោន ទាត់បញ្ចូលទីគូប្រកួតបាន៤១គ្រាប់ ហើយគេទាត់ចូលវិញចំនួន៣៣គ្រាប់។ ចំណែកនៅក្នុងពានរង្វាន់សម្តេចតេជោ ហ៊ុន សែន (Hun Sen Cup)វិញក្រុមក្រុមភ្នំពេញក្រោន បានធ្លាក់ចេញត្រឹមវគ្គ៨ក្រុមចុងក្រោយ បន្ទាប់ពីចាញ់ក្រុមអង្គរថាយហ្គឺរ ដែលមកពីខេត្តសៀមរាប ដោយបាល់ប៉េណាំងទីកាត់សេចក្តី៤ទល់៣ ក្រោយប្រកួតស្មើគ្នាទាំង២ជើង៤ទល់៤៕
Source: Kampuchea Thmey Daily
0 Comments