សៀមរាប ៖ ផ្ទះឈើប្រក់ស័ង្កសី ថ្មក្រោមដែលមានទំហំ៧ម៉ែត្រគុណ៩ម៉ែត្រ ត្រូវបានអគ្គិភ័យឆាបឆេះអស់ទាំងស្រុង ហើយករណីនេះ សមត្ថកិច្ចមូលដ្ឋានបានអះអាងថា បណ្តាលមកពីម្ចាស់ផ្ទះអុជធូបទុកចោល រួចទៅធ្វើការ។
ហេតុការណ៍នេះ កើតឡើងនៅវេលាម៉ោង៩និង៣០នាទីព្រឹកថ្ងៃទី២៥ ខែតុលា ឆ្នាំ២០១៨ ស្ថិតនៅភូមិស្ពានជ្រាវ សង្កាត់សៀមរាប ក្រុងសៀមរាប។
លោកអនុសេនីយ៍ឯក ម៉ី ស្សាវរី នាយប៉ុស្តិ៍រដ្ឋបាលសង្កាត់សៀមរាបបានឲ្យដឹងថា ផ្ទះឈើប្រក់ស័ង្កសី ថ្មក្រោមដែលមានទំហំ៧ម៉ែត្រគុណ៩ម៉ែត្រ ត្រូវបានអគ្គិភ័យឆាបឆេះអស់ទាំងស្រុង ហើយករណីនេះបណ្តាលមកពីម្ចាស់ផ្ទះអុជធូបទុកចោល រួចចាក់សោផ្ទះទៅធ្វើការបាត់។
លោកបន្តថា ករណីនេះ មិនមាននរណាម្នាក់រងរបួសឬក៏រាលដាលទៅផ្ទះអ្នកជិតខាងនោះឡើយ។លោកបន្តថា ម្ចាស់ផ្ទះមានឈ្មោះ ផាន់ លាំ ភេទស្រី អាយុ៨០ឆ្នាំ មានសមាជិកគ្រួសារចំនួន៣នាក់។
ថ្វីត្បិត មានការជួយអន្តរាគមន៍ពីក្រុមពន្លត់អគ្គិភ័យនៃស្នងការដ្ឋានខេត្តសៀមរាបនិងអ្នកជិតខាងយ៉ាងសស្រាក់សស្រាំ ប៉ុន្តែមិនអាចសង្គ្រោះបានដែរ គឺដោយសារតែក្នុងហេតុការណ៍នោះភ្លើងឆាបឆេះលឿនពេក។
លោកបន្ថែមថា សម្ភារៈដែលខូចខាតរួមមាន ៖ សំបុត្រកំណើត,ប្លង់ដី,ប្រាក់ ៧៥០០ដុល្លារនិងសម្ភារៈមួយចំនួនទៀត។ ឯម៉ូតូត្រូវបានបាត់ទឹកជួយពន្លត់ទាន់។ ក្នុងហេតុការណ៍នោះ បានប្រើប្រាស់រថយន្តពន្លត់អគ្គិភ័យនៃស្នងការដ្ឋានខេត្តសៀមរាប ចំនួន៣គ្រឿង ហើយរលត់ទៅវិញនៅម៉ោង១០និង៣០នាទី ថ្ងៃដដែល៕
Source: Kampuchea Thmey Daily
0 Comments